[1] Waha a wori Yeesso Kiriisto miinsane ani liisoobabbakkaahiche. Waakh Yeesso Kiriisto waha a siiche, 'dee falfayyohiis wihi dowwanoha ka sooyateeh tusa. Kiriisto la hertiistoo Waakhe ilbooyiiski Yoohana layadeeh isooerge, wora icheeke.
[2] Yoohana la wihi us arge tuummane cheeke. Yeedi Waakh ichoow runti Yeesso Kiriisto usu tuse iche chiire.
[3] Waakh eti buugga eti Waákh íyeyyeedo chiire soomo a imaala. Toro la Waakh 'doo'di wahaas daago toro wihi buugga goya kachiiran raaho a imaala. I'di tahe ibeenki waha yateehiin, a soodowwaate.
[4] Buugga eti atin isoochiiro a Yoohana. Ururre Kiriistoti an ichiiro la a ti teebeenye ili Aassiya kijirto. Waakkhi toolla jiro, goorat laka jire, toro jirtuu tuumman soojiro, ichoow rubeyohi teebeenye kombortiisti antoot ortiis kijiro ba atin imaalaane nebey atin kakaalaan.
[5] Yeesso Kiriisto a inno 'doona toro la diiggiis ka uskeel a inno kasoofure.
[6] Toro la karnat ichoow kuhaaniyyohi usu harra leedakhti toro la Waakkhi Aabbahiise ihilo inno kayeele. Us ba lakoolicha, miigtiis la laarga jirtuu tuummamba. Aamiin.
[7] Yeya, Yeesso mirise leeyamiite, weeli enenyet tuumman usu a arga, 'doo'di goorat usú 'hune laka usu a arga. Jeentetiis u yaafohi harra tuumman a ooyaan. I'daas la a titaahe gi'de! Aamiin.
[8] “Ani Uumaccheenye toro ani on 'Da'ddabee. An goorat tuumman a jire, toolla la a jira, toro la a soojira, a Waakkhi Miig Tuumman leh,” iche Kamuri Waakhe essa.
[9] Ani a Yoohanahi i'diin u ani ichoow Kiriisto wohoo kalday nahe. Sina inno loomhicha. Inno a garrahsanna. Inno tuumman la dakhi Waakh a iskaleejirra. Wahaas dakkhan a isleegisanna. 'Deerka jeenteti an Yeedi Waakh ichoow runti Yeesso miinsan icheeko, iche kurti bey goya kijirto Baatimos layadeeh liigeeche.
[10] Ibeenki Kamur ka Rubeyti Waakh iwoyte, 'dubeey ka hooyoo buurenye i'di arabi laafuufee daage.
[11] Hooyaas la wihi us yidah, “Wihi at sooagarto khadaaboo layuubo kachiire, ururre Kiriistoti ilkerengeetohi teebee kijirto iereg. Ururreta teebee la a ururi Efeesso ichoow ki Simiriina ichoow ki Bergamum ichoow ki 'Diyaa'dira ichoow ki Sardi ichoow ki Filadeelfiya ichoow ki Lawodeechiya.”
[12] An la urgiye, eti ileeyyeedo yowde. Cha'an urgiye ka, reemassi taa lakorcho 'dahab lakahaaggiche teeba arge.
[13] Reemassa dahcho ka, etoo “Ínam Aadam iyooge,” toolla. Eta la kabuu'doo deere 'da'ddabbe eleelo khaba, kacchiis ka la saabi 'dahabe khaba.
[14] Matakkiis ichoow tintiis a waha dakhane i'di yooleetenye, indohiis la a i'di 'dabi weyti bolkho.
[15] Luhlohiis la weyti bildiikhaane, i'di birtoo boorane lasiguu a ankhadaane, hooyiis la a i'di 'duleyi weyti buure.
[16] Dahantiisti miigeet ka bakkaal teeba khuccha, afiis la birlabi af lehe leeyimiy. Fooliis la a i'di banayhi orrahti maalimeete weyti bildiikhto.
[17] Chirri an usu arge ka, an i'di eti yumuy u, ortiis kasoodihe. Ulla dahantiisti miigeet ikorche, wihi us iyidah, “Roorro akhabin. Ani Oreyenye toro ani Salaahime.
[18] An a Ki Jiro Leh. Ani a umuyye, yeya jirtuu tuumman la a jira. Ani omoot anto a kakhaba, toro fureyyohi meessi 'doo'di tuume kijiro a khaba.
[19] “Maantaka, wihi at agarte, wihi toolla jiro ichoow wihi sooyateeh chiir.
[20] Wihi dagsane at agarte, bakkaalleti teebeenye an dahanti miigeet kakhuccho ichoow reemassi 'dahabe teebeenye taa lakorcho miinsan kallaayo. Bakkaalleti teebee, herti Waakhe ururre Kiriistoti ilkerengeetohi teebee iche itoollaan. Reemassi teebeenye taa lakorcho la, ururreti teebeenye kooba ururoo itoolla.”