[1] Waha 'dubicho ka toro fooltabchotoo afafhi goobi Waakhe furan arge. Hooyi kootte saggi arabi laafuufo iyeedo an daage toro ileeyeede, wihi us iyidah, “Inta saraat amiite, wihi Waakh gooche inkoo waha kuteen sooyateeh a kituso.”
[2] Chirraas on Rubeyti Waakh iwoyte, orteey ka wihi jire a kombortoo antoote goobi Waakh ka etoo kafiddiyo.
[3] Ki intaas fiddiyo la mehe iyoogyahe ya, banayhoo dagahtoo gato miigenye ulhaw ichoow too guu'ddan. Moosi Waakh i'di daakkoo ulhawe weyti bildiikhuu, komborti antoote kamarsanyahe.
[4] Toro kombortaas antoot komborohoo addane antoote tomon lamma ichoow affarenye, tooba la ewweenkoo kafiddiyo iche kamarsan. Ewweenka la gaaddi daddakhan ichoow 'duubi 'dahab lakahaaggiche iche matahenye kakhaba.
[5] Kombortaas antoot la ankhad ichoow boroo'd ichoow karkaraho kasoobahe. Kombortaas orche ka la oor teeba 'dab kabolkho jirta. Oorassa la a rubeyohi Waakhe teebee.
[6] Wihi addane komborta orche kijiro, a wohoo beytoo buurenye kiyoowe gato miige iyooge warraakhe. Ukkur ka, wihi komborti antoot kamarsan a wahanyeyyohoo affarenye lasoouume rubey khabo sar orche ichoow 'dubiche indo buuhaan.
[7] Wihi oraate lasoouume rubey khabo a i'di bahassi, wihi lammaatteet la a i'di heere, wihi seyyahnaatteet la fooli enenyete khabaane, wihi affarnaatteet la a i'di gabaddi serey katari'd.
[8] Wahanyeyyoha affarenye lasoouume rubey khabo, kooba barbar lihe khaba. Indo la sar tuumman ichoow barbarre iliche ka laka a kakhabaan. Icho la maalim ichoow ibeen ba koloo kalday laka ma nasaane, Waakh on saa'daane, wihi icho essaan, “Kamuri Waakhenye Miig Tuumman Leh, at a munya, at a munya, at a munya! At a Waakkhi goorat tuumman jire, toolla jiro, jirtuu tuumman la soojiro.”
[9] Chirbaaw wahanyeyyoha affarenye lasoouume rubey khabo Waakkhi jirtuu tuumman jiro komborti antoot kafiddiyo saa'daane, inkaanyit tusaane, toro la kala'd ilaabaan,
[10] ewweenki tomon lamma ichoow affare Waakh ortiis ka jilbo il kagu'dda, Waakkhi jirtuu tuumman jiro wahtaan. 'Duubassicho komborti antoot orche yassilliine, wihi icho dowtaan,
[11] “Kamuraanyaaw ichoow Waakkhaanyaaw, saa'do ichoow inkaanyit ichoow miigti at 'hesso a kimaleen. A mehe ati on walah tuumman soouunte, 'doonintaah ka walah tuumman a soouunte, toro la walah tuumman jiro a khabaan.”