[1] Ani la hertoo Waakh ichehi goobi Waakh kasookhubatti arge. Iche la furoti ankhari dahane ieleelin ichoow biingotoo miigenye khabta.
[2] Herta Waakh la khorojebsihi archiiy jire magahiis ki 'doo'd hanti ommos Seytaan layadeeh khabatte, gu'h alifoo hidde.
[3] Ankhari dahane ieleelin goya isaate, af hidde toro 'duu'dde, 'dee kola yaafohi harra ma ekkeesti ichoowka gu'hassi alifoowe kutaan. Maanti gu'hassaas kuteen, geeddoor toro a lasoofura.
[4] 'Deerka komborohi antoot arge, 'doo'di komboroha kafiddiyo la, antohi icho 'doo'd kahukkumaan a lasiiche. Toro 'doo'di jeenteti us wori rummaate koo Yeessee ichoow Yeedi Waakh icheeko matahenye laaggooche arge. 'Doo'da la a ki binahi oraat ommos iyookkoti binahaas iwahanne toro sumatti binahaas miinassicho ommos dahanohicho ka i'helin. Icho la omoot a lakasookahche, gu'h alifoo Kiriisto harra leedakhtaan.
[5] Waha a koli oraate Waakh 'doo'd omoot kasookahche. Eheetteey laka, 'doo'di addane tuume omoot ma kasookahine ichoowka gu'hassa alifoowe kuteen.
[6] 'Doo'di Waakh imaalo toro la munyee a ki 'doo'di oraate Waakh omoot kasookahcho goya kijiro. Omootti lammaatteet icho anto ma kakhabto, i'daasenyi Waakh ichoow Kiriisto ortiis ka kuhaaniyyohi hili Waakh haaggicho yateehiin. Icho la gu'h alifoo Kiriisto harra leedakhtaan.
[7] Inkoo gu'hassa alifoowe kuteen, Seytaan inti goorat us kahidanyahe ka a lasoofura,
[8] ulla baha yaafohi harra 'dollohiche affarcho kijiro Goog ichoow Magoog layadeeh ekkeesta, 'dee yaafoha diho iururicha. Icho la ittaaw ka a geeddi yoohti beyti buure afiche kijiro.
[9] 'Doo'da la harra kataa'he, furi 'doo'di Waakhe ilkerengeetti weene Waakh weyti 'doono khaaricheen. I'daasenyi 'daboo goobi Waakh on kasookhubte 'doo'da tuumman bar tire.
[10] Seytaanki 'doo'da ekkeeste la beyti 'dabe i'di lahawti kibirii'd ibolokhto binahi oraat ichoow eti eti Waákh íyeyyeedo iskaayyeelo lakalug'de usu laka goya liiseye. Icho la jirtuu tuumman, maalim ichoow ibeen ba, bolokhe latusa.
[11] 'Deerka kombortoo antoote buurenye dakhane etoo kafiddiyo arge. Harra ichoow sereye ba eta ortiis kafirdeene, i'daasenyi meel icho isi'heleen mele.
[12] Anna 'doo'di tuume, ki mimmiige ichoow ki 'da'ddaran ba usuhi komborta antoot ortiis toollo arge. Buuggag la laaffure. Buuggoo addane magahenyeti 'doo'di jiroti imassan 'helo kachiiranyahe lafure. 'Doo'di tuume ebba wihi us goorat yeele buuggag goya kachiiran ka lahukkume.
[13] Beye 'doo'di tuume goyahiche kijire soo'diisse. Omoot ichoow meessi omooteet la 'doo'di tuume goyahicho kijiro soo'diicheene, Waakh la ebba hukkume. Hukkunka ichoow wihi goorat icho yeeleen ba a israahaan.
[14] Waakh 'deerka omoot ichoow meessi omooteet ba beyti 'dab goya iseye. Beyta 'dab a omootti lammaatteet.
[15] Chi' etoo magahiis buuggi 'doo'di jiroti jirtuu imassan 'helo goya liika'helin, beyti 'dabe goya liiseye.