[1] Waha 'dubicho ka, herti Waakhe affarenye harra 'dollohiche affarcho tolosso arge. Herta Waakh la hafarreti affarenye harra iche harrati angagan ichoow beyohi burbuure ichoow wihi geeye kajeyissa.
[2] Hertoo Waakhe addan ichehi beri kasookorto arge. Iche la reenki 'doo'di Waakkhi jiro lakasunto khabta. Herta Waakh la herti Waakhe affarenye harra 'dollohiche tolosso Waakh antohi iche harra ichoow beyohi burbuure weyti kagaameerto siiche hooyi buure ka kariirte, wihi iche icho itidah,
[3] “Harra ommos beyohi burbuure ommos geeyo agaameerina, ichoowka falfayyohi Waakh tuumman sumatti Waakh miin a gelinno.”
[4] Ani la tiri 'doo'di sumat lagesse a daage, a et alif kudoo ichoow alif tomon affar ichoow alif affarenye yaafohi Issiraayel tuumman kayimiy.
[5] Saggi yaafohi Issiraayel sumat liigesse a i'da. Yaaf Yuuda a et alif tomon ichoow alif lamma, yaaf Ruuben a et alif tomon ichoow alif lamma, yaaf Gaad a et alif tomon ichoow alif lamma,
[6] yaaf Aacha a et alif tomon ichoow alif lamma, yaaf Naftaali a et alif tomon ichoow alif lamma, yaaf Manaasseh a et alif tomon ichoow alif lamma,
[7] yaaf Siimiyon a et alif tomon ichoow alif lamma, yaaf Laawi et alif tomon ichoow alif lamma, yaaf Issakhar a et alif tomon ichoow alif lamma,
[8] yaaf Seebulon a et alif tomon ichoow alif lamma, yaaf Yuussuf a et alif tomon ichoow alif lamma, yaaf Beenjameen la a et alif tomon ichoow alif lamma.
[9] Waha 'dubicho ka an yeye, orteey ka ururi weyti buurenye ekkees liiubaa'dane ilal tuumman ichoow yaafo tuumman ichoow 'doo'di fil tuummane ichoow afaf tuumman kayimiyye komborti Waakhe antoot ichoow Heleem ortiis ba toollo arge. Icho la kabuu'ddeti daddakhane gessateene toro la seytohi geeyi baare dahanohicho ka khucchaan.
[10] Icho la hooyi buure ka riireene, wihi icho yidaaheen, “Waakkheenki komborti antoot kafiddiyo ichoow Heleem, ribnaanki inno laribo icho on leh.”
[11] Herti Waakh tuumman komborti Waakhe antoot ichoow ewweenki tomon lamma ichoow affare ichoow wahanyeyyohi affarenye lasoouume rubey khabo khaaricheene, tolossateen. Komborti Waakhe antoot orche ka il gu'ddeene, Waakh wahteene,
[12] wihi icho yidaaheen, “Aamiin! Saa'do ichoow weynaan ichoow khara ichoow kala'd ichoow inkaanyit ichoow miig ichoow anto Waakkheenki jirtuu tuumman jiro a mu'danyahe. Aamiin!”
[13] 'Deerka ewweenkaas kichokoo wihi us iworsate, “'Doo'da kabuu'ddeta khabo a ayyo illeh? Toro la intoh kayimaateen?”
[14] Wihi an ilaabe, “Eti ween, ati a garatta.” Ulla wihi us isoolaabe, “Waha a 'doo'di sinati buure goya kasoobahe, a 'doo'di kabuu'ddeticho diiggi Heleem lakadikhe, ladakhnaache.
[15] Maantaka, “icho komborti Waakhe antoote ortiis toollaane, maalim ichoow ibeen minkiiski buure ka usu ihilaan. Waakkhi kombor kafiddiyo la eematiis ka icho a ogooga.
[16] Icho jirtuu toro ma ankayaane, jirtuu toro ma subgaataan. Orrah ommos kuleeli uskul, sarticho ma gubo.
[17] A mehe Heleenki komborti antoot kafiddiyo ersinkichooda yateehe, ulla issi bicchehi jiro laka'helo icho iwoya. Waakh la ilmohicho tuumman indohicho a kahiyyaaya.”