[1] “Herti Waakhe keleyenye urur Kiriistoki Sardi itolosso waha ichiir. Ki rubeyohi Waakhe teebee khuccho toro la bakkaalleti teebee khuccho farniinkiis a kan. Wihi atin yeessaan a garda. 'Doo'd kol atin jiro khabtaane koogyahe, i'daasenyi atin a tuunteen.
[2] Omoot kasookaha! Geedda marahe atin kasoo'hadde sootamuut miigoocha. I'di tahe wihi an arge, Waakkheey ortiis ka wihi atin yeesseen ma buuhaan.
[3] Maantaka wihi goorat atin laabche toro atin daagteen kasoo'hela raaha, uskeeliin la kasoonokhda. I'daasenyi cha'atin ineybaan, i'di eti hatto leh u, doglaan on atin soogela, saha'ddi an amiit la ma garattaan.
[4] I'daasenyi Sardi ka 'doo'doo rucchule uskeel iskasoohosse a khabtaan. 'Doo'da gaaddi daddakhane gessata ileesohta, a mehe waha a wihi icho imale.
[5] Eti tuummane sooricho la, i'daasu gaaddi dakhane sar lakorcha. Ani magahiis buuggi magahenyeti 'doo'di jiroti jirtuu imassan khabo, kachiiranyahe goya ma kabahcho. Ani Aabbaheey ichoow herti Waakh orcho ka saggi us eteey iyahe a cheeka.
[6] Eti dogo khabo, wihi Rubeyti Waakh ururre Kiriisto idowto a daago gi'de.
[7] “Herti Waakhe keleyenye urur Kiriistoki Filadeelfiya itolosso waha ichiir. Waha a farniinki ki munyeenye toro rum leh. A usuhi furoti antoote too karnati Dawuude khuccho. Wihi us furo et hidin yabuu'd mele, wihi us hido la et furin yabuu'd mele.
[8] Wihi atin haaggisaan tuumman a garda. Yeya ani ortiin ka afaf a atin ifure, etoo kalday laka ma hido. Saggi atin miigtoo rucchul on ikhabtaan a garda, i'daasenyi atin yeedeey a raahteene, toro la magaheey ma 'dii'din.
[9] Idagansada! 'Doo'di minki weysiite Seytaan dakhti a 'doo'di Ya'huud essi, i'daasenyi 'doo'di Ya'huud ieheynane been goocho a jira. An 'doo'daas a sookhaata, ortiin ka jilbo il kagu'ddaane, toro la saggi an atin i'doono abtaan.
[10] Atin amureey a raahteene garrahsatteen gone, maanti sinayyohi khar kayamiit 'doo'di harra yaal tuumman isoobahaane 'dee kajaan, an a atin toorriba.
[11] An dowwa soonokhda. Wihi atin khabtaan jurkhicha, uus etoo kalday laka 'duubiinki kala'deet atin kakhaatine.
[12] Eti tuummane sooricho la minki buurenye Waakkheey ka tirrinki dagaheete kayeela, ulla jirtuu tuumman intaas ma kakaho. Ani la magah Waakkheey ichoow magah ilkerengeetti weene Waakkhaaya usu kachiira. Ilkerengeettaas la a ilkerengeetti weene Yeerusaleeme husube Waakkheey goobiis kasooyagcho. Toro la magaheeyki husub laka usu kachiira.
[13] Eti dogo khabo wihi Rubeyti Waakh ururre Kiriisto idowto a daago gi'de.
[14] “Herti Waakhe keleyenye urur Kiriistoki Lawodeechiya itolosso waha ichiir. Ki farniinka sooergo, a ki Aamiin layadeeh. A ki lakakhuufo, garti runti Waakh laabo. A uumacchoti wihi Waakh soouume tuumman.
[15] Wihi atin yeessaan tuumman a garda. Wihi atin yeessaan ka atin kuleel menye toro la khobo mee. Incheenka atin a khobo ommos a kuleel.
[16] Maantaka atin a tangiigo, kuleel menye khobo la mee gone, afeey ka a atin sootufa.
[17] Atin, ‘Nah a kamurre, hoolahi buurenye khabna, walah nah kaankhan mele!’ elattaan. I'daasenyi atin waha ma kasin, atin rumanka a marahtahiine, a 'doo'di liisonaho, a miskiine, a 'doo'di indo laa, a murukh.
[18] Wihi an atin kawaanicho 'dahabi 'dab ka lagube ki rummaat yitah ikagadda, 'dee kamurrowa. Gaaddi daddakhane atin gessattaan laka ikagadda, 'dee a atin loogoogo lakhaanyoti murukkhiin uus lasoobakkaahin. Ildawahi atin indo kawelweelattaane atin mujjum il agartaan laka ikagadda.
[19] 'Doo'di an 'doono a leejaakha toro sirbi gessa. 'Deerka taba uurassiin tuumman ka ichoow walah tuumman ka tuum uskeel kasoonokhda.
[20] An kalla! Ani min khariissa toolla, atin waha. Chi' etoo hooyeey daage, min isoogesse, an a soogela, lammateenyo isleegolossanna.
[21] Eti tuummane sooricho, antohi ullaka komborteeyti antoot ikaleeorronti siicha, saggaas ani laka isooriche komborti antoot Aabbaheey ikaleeorronduu.
[22] Eti dogo khabo wihi Rubeyti Waakh ururre Kiriisto idowto a daago gi'de.”