[1] Wussoo i'di reenkoo walah lakarerreegee liisiiche, wihi liidah, “Nyaame, minki Waakhe buure ichoow koondihi ga'daar rerreege, 'doo'di intaakka Waakh wahti laka ekkaay.
[2] I'daasenyi uranti minki Waakhe buure khariis tuumman geeddiis arerreegin. I'di tahe ani intaas 'doo'di Waakh igaranne siiche. Icho la hay tomon affar ichoow hay lamma tuumman, ilkerengeetti weene lagan a yabtaan.
[3] Ani la 'doo'deeyki lammeenye garti runteey laabo miig a siicha, icho la maan alifoo ichoow kud lamma ichoow lih Waákhe íyeyyeedaan. Icho la inga'daa'diyyo gessataan.”
[4] 'Doo'da lammeenye runti Waakh babbakkaahicho a i'di geeyohi lammeenye oolif ichoow reemassi lammeenye taa lakorcho Kamuri harra tuumman dakhti ortiis toollo.
[5] Chi' etoo icho gaameerin 'doono, 'dab 'doo'da lammatiis afichooda kasoobaha, chiiyticho bakkicha. Eti tuummane icho gaameerin 'doono saggane liiyagiis.
[6] 'Doo'da la miigti icho geedda icho Waakh iyeyyeedaan sereyta daayan kahidaane 'dee hir i'deyin a khabaan. Icho la toro miigti icho bicche diig kayeelaan a khabaane, miigti icho 'doo'di harra sinayyohi yeerare ikeenaan la a khabaan. Waha la maanti icho 'doonaan tuumman a yeelaan.
[7] Inkoo icho farniinki Waakh cheekeene icho massicheen, binahi keleyenye ankhari dahane ieleelin kasoobaho 'doo'da lammee a diha, sooricha, bakkicha.
[8] Sarticho la jiti ilkerengeetti weene Yeerusaleeme goorat Kamuricho laka massalaaba lakakaahe iche jiifta. Ilkerengeettaas wihi Waakh miinsan ka ilkerengeetti Soodom ichoow ili Miissiri liiokkanaache.
[9] Maan seyyah ichoow nyuus 'doo'di fil tuummane ichoow yaafo tuumman ichoow afaf tuumman ichoow ilal tuumman kayimiy la sarti 'doo'dane 'dey'doocha, ichohi il liilaabo 'dii'daan.
[10] Weeli enenyete harra kijiro tuumman la omootti 'doo'da lammee weyti kahamaada, siimohi icho isiergaan ka sukuuku bahchaan. I'di tahe 'doo'da lammeenye Waákh íyeyyeedo 'doo'di harra kijiro tuumman weyti bolokh ikeene.
[11] I'daasenyi inkoo ibeenneta seyyah ichoow nyuuse kuteen ka, Waakh 'doo'da lammee neebsihi jiro kaafuufe, icho la sootolossateene, eti tuummane icho arge la weyti nahe.
[12] 'Doo'da lammee 'deerka hooyoo buurenye goobi Waakh ka icho leeyyeedo, “Inta saraat amiita,” idowo daage. Icho la chiiyticho 'dey'doossaayi, mirisoo ka goobi Waakh ikoreen.
[13] Saha'ddaas on harra weyti sesseehte, ilkerengeettaas ween goonan tomon goyaka goonankoo bar waaye. Harrataas sesseehte ka 'doo'di elif teebee tuume, ki soo'hade la weyti nahe, Waakkhi goobi Waakh ka harra dakhti koolicheen.
[14] Sinati lammaatteet a kutte, sinati seyyahnaatteet la dowwanoha ka a tamiit.
[15] Herti Waakhe teebannaatteet arabiche afuufte, hooyassi buure la goobi Waakh ka sooyeedeene, wihi icho yidaaheen, “Dakhi harra, dakh Kamureen ichoow koo Lasubhehiissa yitaaheen. Ulla jirtuu tuummane harra dakhta.”
[16] Ewweenki tomon lamma ichoow affarenye Waakh ortiis ka komborohichoki antoot kafiddiyo la, jilbo il kagu'dde Waakh wahte,
[17] wihi us yidah, “Kamuri Waakhenye Miig Tuumman Leh, ki toolla jiro goorat tuumman jire, jeenteti at miigtaahti buure ikhaatte, enenyet dakkhan isookhabattuu kala'de kisoolaabna.
[18] Yaafohi Waakh igaran a holloweene, holaah la a yimiy. Ibeenki at 'doo'di tuume hukkunto, at 'doo'di falfayyohaahenye kiyeyyeedo, ichoow 'doo'di Waakh ichoow eti tuummane kaarooro, ki ween ichoow ki rucchul ba at kala'd gutto a yitah. Toro la ibeenki at 'doo'di harra ka enenyet bakkicho baabiisso a yitah.”
[19] 'Deerka minki Waakhe buurenye goobi Waakh kijiro lafure, saanduukhi ayyinti Waakh gooche tuso, minki Waakhe buure goya kajiro laarge. Ankhad il gu'ddeene, boroo'd ichoow karkaraho yeedeene, harra sesseehte, dagahti baraafo laka weyti serey kasookhubatte.