[1] Wihi kasookhuccho an arge a eti komborti antoot kafiddiyo dahantiisti miigeeet ka khadaaboo yuubane amam lammacho chiirane meel teeba hanja lakadagche khabo.
[6] 'Deerka komborti Waakhe antoot orche ka Heleenki wahanyeyyohi affarenye lasoouume rubey khabo ichoow ewweenki tomon lamma ichoow affare ba khaaricheen arge. Heleenka ki lasoorriyooche iyoogyahe. Ulla gaas teeba ichoow il teeba khaba. Indoha teebee la, a rubeyohi Waakhe teebeenye harra tuumman liierge.
[7] Ulla yimiyye, khadaabi dahanti miigeete eti komborti antoot kafiddiyo kakhaate.
[8] Chu'us khaate ka, wahanyeyyohi affarenye lasoouume rubey khabo ichoow ewweenki tomon lamma ichoow affare ba Heleem ortiis ka il gu'ddeen. Kooba la reenkoo 'haab layadeehe chirri geeyo ladowo lagu'ddo ichoow baakhuuli 'dahabe uyuuggi lagubo kajiro iche khaba. Uyuugga la weysihi 'doo'di Waakhe itoolla.
[9] Icho la geeyoo husub doween, “Ati mu'dane khadaabaas khaatta, hanjayyohaas bukkhissa. I'di tahe goorat a lakisoorriyooche, diiggaah ka la weeli enenyete yaafo tuummane ichoow afaf tuummane ichoow filal tuummane ichoow ilal tuummamba Waakh a igatte.
[10] At la icho karnato ichoow kuhaaniyyohi usu harra leedakhti toro la Waakkhi Aabbaheene ihilo kayeesse, icho la berri harra a dakhtaan.”
[11] An la yeye, hooyi herti Waakhe ittaaw ka ekkees liiubaa'dan daage. Herta Waakhe ittaawe la komborti antoot ichoow wihi lasoouume rubey khabo affare ichoow ewweenki tomon lamma ichoow affare khaarisse.
[12] Herta Waakhe ittaawe la hooyi buure ka wihi iche dowatti, “Heleenki goorat lasoorriyooche, miig ichoow kamurroon ichoow khara ichoow anto ichoow inkaanyit ichoow saa'do 'helin a mu'dayyahe.”
[13] 'Deerka wihi lasoouume serey kajiro ichoow wihi harra sarche kijiro ichoow wihi harra iliche kajiro ichoow wihi beyohi burbuure goya kijiro tuumman la ichohi waha dowti daage, “Waakkheenki komborti antoot kafiddiyo ichoow Heleem ba, a lasaa'do, a liinkaanyito, a laweynaacho, miig ticho a titaahe jirtuu tuummamba.”
[14] Wahanyeyyohi affarenye lasoouume rubey khabo la, “Aamiin,” yidaaheene, ewweenki tomon lamma ichoow affare la il gu'dde Waakh ichoow Heleem ba wahte.