[1] 'Deerka hooyoo buurenye minki Waakhe buure goya kasooyeede herti Waakhe teebee leeyeede daage, wihi us iyidah, “Nyaama, irda, holi Waakhe baakhuulleti teebee kijiro, harra kakhuba!”
[2] Herti Waakhe oraat la iratte, wihi baakhuliche kijire harra kakhubte. Jiisohoo uskule weyti bolokhe 'doo'di sumatti binaat khabo toro iyookkoti binahaas wahte sar kasoofoofeen.
[3] Herti Waakhe lammaatteet wihi baakhuuliche kijire beyti buure kakhubte. Bey tuumman i'di diiggi eti yumuy titahye, wihi goya kijiro rubey khabo tuumman la tuumeen.
[4] Herti Waakhe seyyahnaatteet la wihi baakhuuliche kijire hawohi 'dulo ichoow indohi biccheet kakhubte. Icho la urgiyeene, diig yitaaheen.
[5] 'Deerka herti Waakhe bicche itolosso ichehi waha elatti daage, “Atihi Munyee, ki toolla jiro, goorat tuumman laka jire, at a fissantahe jeenteti sinayyoha at 'doo'di ati kigaran ikagoosse u.
[6] A mehe icho diiggi 'doo'daah ichoow 'doo'di kiyeyyeedo harra ikhubeene, at la diiggi icho damaane siisse. Waha a wihi rumanka icho imale.”
[7] Ani la hooyoo koondihi ga'daar ka sooyeede daage, “Aa, Kamuri Waakhenye Miig Tuumman Leh, hukkunka at 'doo'd igoosse a wihi rummaate toro fissan.”
[8] Herti Waakhe affarnaatteet wihi baakhuuliche kijire orrah kakhubte. Orrah la miigti iche 'dab ka enenyet weyti gubto lasiiche.
[9] Kuleeli weyti buure enenyet gube, icho la magahi Waakkhi sinayyoha khuccho igafeen. I'daasenyi icho uskeelicho kasoonokhan ichoow Waakkhi icho weynaachaan 'dii'deen.
[10] Herti Waakhe channaatteet wihi baakhuuliche kijire komborti antoote too binahi oraate kakhubte. Harrati binaha dakhtaan tuumman la mug'di kalday titah. Jeenteti bolokkhi uskul u enenyet harrabbe iskhaniine.
[11] Toro la jeenteti bolokkhichoki uskul ichoow jiissichuu, Waakkhi goobi Waakh igafeen. I'daasenyi wihi icho yeelaan ma kasoonokhan ba.
[12] Herti Waakhe lihnaatteet wihi baakhuuliche kajire hawti buurenye 'dusso Yuufereet kakhubte, bicchehiche angageene, 'dee karnatohi beri kayamiit jit iyeessa.
[13] Ani la 'deerka ginna seyyah rah iyoog arge. Too afi khorojebsi goya kasoobahte, too la afi binahi oraate goya kasoobahte, ti addan la afi eti eti Waákh íyeyyeedo iskaayyeelo goya kasoobahte.
[14] Icho a rubeyohi ginnayyohi girmo tuso. Ginnayyoha karnatohi harra tuummane iirtaane, 'dee ibeenki weene Waakkhi Miig Tuumman Leh ka diho iururichaan.
[15] Yeessohi Kamure wihi us essi kallaayo, “Nabah suda! An saggi eti walah hato iamiit. Eti iur'dine, gaaddiis marte, 'dee murukh isohanne, lakhaanyotiis 'dow liikasoobihin a liimaala.”
[16] Ginnayyoha 'deerka karnatoha meessi afi Ibiraaniya ka Harmageedo layadeeh ka isikeeneen.
[17] Herti Waakhe teebannaatteet wihi baakhuuliche kijire, hafar kakhubte. Hooyoo buure minki Waakhe buure goyaka komborti antoote Waakhe ka usuhi sooyeedo daage, wihi us yidah, “Walah tuumman a massateen.”
[18] 'Deerka ankhad ichoow boroo'd ichoow karkaraho ba soobaheene, harra la weyti sesseehte. Uu' Waakh harra soouume, injire harra geedda ma sesseehin, a mehe harra saggoo uskule isesseehte.
[19] Ilkerengeetti weene Baabiloon meel seyyahe ikharradde, ilkerengeetohi yaafohi harra la bar waayeen. Waakh uskeeli 'doo'di ilkerengeetti Baabiloon yeele tuumman ma kadabine, 'doo'di ilkerengeetta farsoti sabiibe kokkoob buuhto holi Waakh itolosso siiche.
[20] Kurohi bicche goya kijiro tuumman firdeene, halal tuumman la baabeen.
[21] Dagahti burbuurenye baraafo, kooba geeddi kiilo tomon affare serey ka enenyet kasookhubatte. Enenyet jeenteti sinata weyti buurenye dagahti baraafo keentuu Waakh igafe, a mehe sina weyti suuj eheet.