[1] Waha 'dubicho ka, hertoo Waakhe addan ichehi goobi Waakh kasookhubatti arge. Herta Waakh la antohi buurenye khabta, ababnaanki iche ababto la harra tuumman banaynoocheen.
[2] Herta Waakh hooyi buure ka riirte, wihi iche tidah, “A massatte! Ilkerengeetti Weene Baabiloon bar a waayte! Furi ginnayyoot ichoow furi meleykayyoote titahye, chimbirohi bi'dirreenye toro weyti la'dii'do kola intaas igela.
[3] I'di tahe yaafo tuumman, farsoticheti sabiibe soho'ddarriti holi Waakh keento iche dameen. Karnatohi harra tuumman la makhaabassaas soho'ddarri kaleessohteen. 'Doo'di bacchaara harra tuumman la jeenteti soho'ddarriticheeda ikamurrowe.”
[4] Toro hooyoo goobi Waakh ka sooyeedo daage wihi us yidah, “'Doo'daaw, kaaleya Baabiloon goya kasoobaha, 'dee uskeeli iche kajirto, aleegelina, 'dee sinati Waakh iche kawaaricho la a'helina.
[5] A mehe uskeeliche a iskore, ichoowka goobi Waakh eleele. Waakh la suujoonki 'doo'di Baabiloon yeele ma kadabin.
[6] I'di iche atin yeesse, atin laka iche iyeela. Suujoonki iche atin iyeesse, kol lammatiis iche iyeela. Farsoti uskule iche kokkoobiche atin ikawarasse, kol lammatiche ikawarsa.
[7] Geeddi iche iskoolisse, iche kamurroonki soho'ddarri kijirte, iche geeddaas sina ichoow bolokh tusa. A mehe uuriche ka a eylajja, mehe elatta ya, ‘An saggi makhaabassi karnatenye ijira. An muunkho menye, jirtuu la ma ooyo.’
[8] Maantaka ibeenkoo kaldach on sinayyohiche iche kahataataane, omoot ichoow oytim ichoow abaár ikeena. Iche 'dabe yaham, a mehe Kamuri Waakhenye ween iche a hukkuma.”
[9] “Karnatohi harra goorat iche soho'ddarri kaleessohte, kamurronkiche leegisme maanti icho uunki 'dabi ilkerengeettaas yaham argaan a uuwwichaane iche ooyaan.
[10] Jeenteti icho bolokkhi ilkerengeettaas weyti ikanahaan u, foga tolossataane riiraane wihi icho essaan, “Uuwwiy! Uuwwiy! Ilkerengeetta weenoow, Baabiloonoow, ilkerengeetti miig khabtooy! Saha'ddoo kalday on sinati Waakh kigooche kitimiy!”
[11] “'Doo'di harra ka bacchaarti la a uuwwicha ilkerengeettane ooya, a mehe et kola meehicho gatti mele.
[12] Et kola meehichoki 'dahab ichoow ki lahaageet ichoow dagahti bibbildiikhto ichoow irtiyyohi gato miige gatti mele. Et darfohichoki fil ittaawenye gato miigenye i'di maanta wihi daddakhan ichoow wihi muggeyyee ichoow wihi gugguu'ddan kagatti mele. Et kho'doommeti fil ittaawenye gato miige ichoow wahanyeyyohi 'hiir lakahaaggiche fil ittaawe gatti mele. Et meehichoki birtoo booran ichoow ki birtoo daayiti khaalkhee ichoow ki dagahti lasigo lakahaaggiche gatti mele.
[13] Toro et geeyohi gololle lakachibo 'dee golol haaggicho ichoow miricchinye ichoow subahenyeti hahhaaggane sar lakadowti ichoow uyuuggeti lasaarti kagatti mele. Toro et farsoti sabiib ichoow subakki geeyi oolif ichoow ingangaano ichoow 'dargaayye ichoow looyyo ichoow iiy ichoow fará'd ichoow garrunyeti fara'de jiitto ichoow 'doo'di loororicho kagatti mele.
[14] “'Doo'di iche bacchaara leehaagsati la wihi us yadeeh, ‘Baabiloonoow, wahanyeyyohi haaggane rubeytaah imoonte tuumman a lakaakhaate. Kamurroonkaah ichoow wihi kibildiikhicho tuumman a lakakhaate, yombuu la toro ma 'hesso!’ ”
[15] 'Doo'di 'hor bacchaara haaggiche, meeha ororiche toro iche kakamurrowe foga tolossata, bolokkhiche weyti kanaha. Icho la a uuwwichaane toro ooyaane,
[16] riiraane, wihi icho yadeehiin, “ ‘Uuwwiy! Uuwwiy! Ilkerengeetta weenoow, ati gaaddi hahhaaggane daddakhan ichoow ti muggeyyee ichoow ti gugguu'ddan a gessatte, toro 'dahab ichoow dagahti bibbildiikhto ichoow irtiyyohi gato miige a lakeeykode.
[17] Saha'ddoo kalday goya on ka kamurroonka tuumman bar latire.’ “'Doo'di koobanohi burbuure itoollo ichoow ki koobano kasohti ichoow ki koobano hil kahaaggicho ichoow ki tuummane chilinkicho bacchaarati beyeet kayamiit foga tolossate.
[18] Maanti icho uunki 'dabi ilkerengeettaas yaham kasoobaho argaan, a riiraane, wihi icho yadeehiin, ‘Injire ilkerengeettoo weene harra ka i'di tane a jirte?’
[19] Icho la a ooyaane uuwwichaane toro ebeer matah iskachibaane, wihi icho yadeehiin, “ ‘Uuwwiy! Uuwwiy! Ilkerengeetta weenoow, kamurroonkicheeda 'doo'di koobano khabo, bey ka bacchaarti kamurrowe. Saha'ddoo kalday goya on ka walah dakkhan bar latire!
[20] Atinhi goobi Waakh kajirtaan, taba gi'de ilkerengeetta weyti kahamaada! 'Doo'di Waakh ichoow ergaano ichoow 'doo'di Waákh íyeyyeedo, taba hamaada. Jeenteti wihi iche atin yeessuu, Waakh iche sina a igooche.’ ”
[21] 'Deerka hertoo Waakhe weyti miige daddaabtoo i'di daddaabti buurenye gurnaan lakatumee okkhisse, bey goya isaate, wihi iche tidah, “Miigti buurenye i'dee ka, ilkerengeetti weene Baabiloon a lasoolug'da, yombuu la toro ma la'helo.
[22] Hooyi reenki 'haab layadeeh ichoow indulle ichoow arab yombuu goytaah lakadaago mele. Tagaammeti fil ittaawe, yombuu toro goytaah ma lakeelo. Hooyi daddaabti buurenye gurnaan lakatumo, jirtuu goytaah ma lakadaago.
[23] Toro la jirtuu banayhi taa goytaah ma kabolkhaan. Hooyi eti min disti ommos inanti ladiso, jirtuu goytaah ma lakadaago. 'Doo'daahki bacchaara haaggiche ki harra ka lagarti eheet. Morotaah ka yaafo tuumman a leekkeeste.
[24] Diiggi 'doo'di Waákh íyeyyeedo ichoow diiggi 'doo'di Waakh ichoow 'doo'di harra ka labakkiche tuumman goyticheeda lakeele.”