[1] Geedda an fiiricho, Heleem hanjati oraate khadaabi yuuban kadagsan bukkhiche. 'Deerka wahanyeyyohi lasoouume rubey khabo affare kichokoo, usuhi hooyi i'di ki guugahe ka, “Kaale!” iyidah daage.
[2] Ani yeye, orteey ka fara'doo dakhan arge. Eti fara'd fuulo la bihine khuccha, toro 'duubi antoote lasiiche. Ulla i'di eti chiiytiis soorichuu, bahe 'dee chiiytiis sooricha.
[3] Chirri Heleem hanjati lammaatteet bukkhiche ka, wihi lasoouume rubey khabo, ki lammaatteet usuhi, “Kaale!” iyidah daage.
[4] 'Deerka fara'doo addane guu'ddane i'di 'dabe soobahe. Waakh eti fuulo antohi us nebeyti harra kabaabiicho toro enenyet isbakkicho siiche. Birlaboo buure laka siiche.
[5] Chirri Heleem hanjati seyyahnaatteet bukkhiche ka, wihi lasoouume rubey khabo, ki seyyahnaatteet usuhi “Kaale,” iyidah daage. An yeye, orteey ka fara'doo daayiti khaalkhee arge. Eti fuulo la rottole dahan kakhuccha.
[6] Hooyoo i'di ki enenyete la wihi rubey khabo affare dahcho kasooyeede daage, wihi us yidah, “Chilimmeti eti orrahtoo hil haaggiche laguto kiilotoo 'dargaayye on bahta. Kiilo seyyah nyumumma laka chilimmeti eti orrahtoo hil haaggiche laguto on bahta. Subakki geeyi oolif ichoow farsoti sabiib la akheeroon.”
[7] Chirri Heleem hanjati affarnaatteet bukkhiche ka, an wihi rubey khabo affare, ki affarnaatteet usuhi, “Kaale,” yidah daage.
[8] An yeye, orteey ka fara'doo ulah dakhan arge. Eti fulo magahiis, Omoot iche layadeehe, 'dubiis la meessi omooteete sooraahta. Waakh antohi icho enenyeti harra kijiro et affar goyaka koo yagiisiin siiche. Antohaas ka la 'doo'di harra kijiro diho ka ichoow nabhayye ka ichoow sugeerre ka ichoow binahi yibaat ka a bakkicha.
[9] Chirri Heleem hanjati channaatteet bukkhiche ka, koondihi ga'daar iliis ka rubeyohi 'doo'di jeenteti us Yeedi Waakh ichoow runti Yeesso miinsan icheeko liibakkiche arge.
[10] Hooyi buure ka riireene, wihi icho yidaaheen, “Kamuri Miig Tuumman Leh, at a rume toro a munya. Ichoowka maantoh malmassa 'doo'di harra kijiro hukkunta, 'doo'di goorat diiggeenyo khube aal kagutatta?”
[11] Kooba 'deerka kabuu'doo dakhan lasiiche, i'daaru nasa ichoowka tiri ilbooyyeti wahalhicheenye toro Kiriisto rummeysatte i'dichuu lasoobakkicho a labuuhicho liidah.
[12] Ani Heleem usuhi hanjati lihnaatteet bukkhiche 'dey'dooche. Harra weyti sesseehte. Orrahe urgiite i'di sakkaassi kolleyteet u daayatte, yeyyah tuumman urgiye gu'duu'ddi diig bahche.
[13] Yiyyihimohi serey kijiro la i'di khoonati hafar sesseehiche sookhubatti u, harra kasoodiddiheen.
[14] Sereyta daayan i'di khadaabi layuubuu jibbaadnante, baabaate. Halal tuumman ichoow kurohi bey goya kijiro laka meessicho lakabahche.
[15] 'Deerka karnatohi harrata ichoow 'doo'di harra anti ichoow 'doo'di iskar iwewween ichoow kamurre ichoow 'doo'di wewween ichoow bow'dayyo tuumman ichoow 'doo'di furan tuumman go'dda'd ichoow daddaabohi halal kijiro iskadagche.
[16] 'Doo'da la halal ichoow daddaabo kariireene wihi icho iyidaaheen, “Nah kasooreya, fooli eti komborti antoot kafiddiyo ichoow holi Heleem nah kadagcha.
[17] A mehe ibeenki weene Waakh ichoow Heleem enenyet holicho tustaan a yitahye, ayyo 'deerka bahsata?”