[1] Khorojebsi la bey afiche tolossate. Anna binahoo bey goya kasoobaho arge. Binaha matah teeba ichoow gaas tomon iche khabaan. Gaas ba la 'duube fuula. Matah ba la magahoo Waakh igafo kachiiran.
[2] Binaha an arge kabbile iyoogyahiine, i'daasenyi luhlo a i'di luhlohi binahoo weyti buurenye goffanneti derdeer khabo, af la a i'di afi bahassi. Khorojebsi miigtiis ichoow kombortiis ichoow antohiis binahane siiche.
[3] Binaha matakkoo ka, jiissi omoot keento khabaane, i'daasenyi jiissa omoot keento a samaatte. 'Doo'di harra kijiro tuumman la girmeeste binaha raahe.
[4] Jeenteti khorojebsi anto binaha isiichuu, weeli enenyet tuumman khorojebsi wahte. Toro binaha laka wahteene, wihi icho worsateen, “Etoo maanta i'di binahee jiraayi? Ayyo kan diho kiiran yabuu'd?”
[5] Binahaas afi icho keeylajaane toro icho Waakh ikagafo lasiiche. Binaha la hay tomon affar ichoow hay lamma anto lasiiche.
[6] Binahaas la geeddi nool Waakhe igafaane toro magahi Waakh ichoow fiddiitoti Waakh ichoow 'doo'di tuummane goobi Waakh kijiro abaara.
[7] Binahaas la miigti us 'doo'di Waakh kadihaane toro icho kasoorichaan a lasiiche. Binaha la toro antohi us yaafo tuumman ichoow 'doo'di fil tuummane ichoow afaf tuumman ichoow ilal tuumman kadakhti laka lasiiche.
[8] Weeli enenyete harra kijiro tuumman, ki tuummane magahenyeticho buuggi 'doo'di jiroti jirtuu imassan 'helo geeddi harra liisoouumin liikachiirin binahane wahta. Buugga la eti leh a Heleenki goorat layigis.
[9] Eti dogo khabo a daago.
[10] Eti tuummane boolinnaan liigooche a labooliya. Eti tuummane birlab ka omoot liigooche, birlabe lakayagiis. Wihi 'doo'd Kiriisto laka'doono a ichohi garrahsati, Waakh kakhuufo.
[11] Toro binahoo addane harra goya kasoobahe arge. Binaha i'di heleenkoo u, gaas lamma khabaane, i'daasenyi hooyi i'di ki khorojebseenye kayeede.
[12] Binahi lammaatteet binahi oraat orcho ka antohiis tuumman walah kadakhte. Binaha lammaatteet la weeli enenyete harra kijiro tuummane ihosse, binahi oraate jiissi omoot keento lasamaache khabe wahtaan.
[13] Binaha lammaatteet la wihi buurenye miigti buure tuso haaggiche, weeli enenyet tuumman argaayi 'daboo laka serey kakeene, harra isooyagche.
[14] Binahi lammaatteet jeenteti binahi oraat orcho ka miigti us girmo kayeelo liisiichuu, 'doo'di harra kijiro ekkeeste. Weeli enenyet amur ibahche 'dee iyookkotoo binahi oraate birlab ka lajiisooche uliba jiro lakiinkaanyito a haaggicho.
[15] Waakh binaha lammaatteet miigti us iyookkota binahi oraat iyoog neebsi kaafuufo us jiro siicho siiche, 'dee iché iyeyyeedin tabuu'de, toro la 'doo'di iyookko wahan 'dii'do labakkicha.
[16] Ulla weeli enenyet tuumman laka ihosse, ki ween ichoow ki rucchul, ki kamure ichoow ki miskiine, ki bow'dee ichoow ki bow'da ieheynan ba, 'dee dahanohichoki miigeet ka ommos miinassicho ka sumat a lagesso.
[17] I'da ka et walah gatti ommos walah ororicho mele sammata us sumatta ikhabin. Sumattaas la a magahi binahi oraate, ommos a sumatti ayti magahiis itolosso.
[18] Ayta khara 'doonta. Chi' etoo khara yahe, ayti sumatti binahaas a ekkaacho. A mehe magahi weeli enenyete itolossa. Sumatti aytiis, a kud lih ichoow tomon lih ichoow lih.