[1] Goobi Waakh ka toro wohoo buurenye girmeenye miigti Waakh tuso arge. Herti Waakhe teebeenye sinayyohi teebeenye harra yaham sookhaatto arge. Waha a sinayyohi 'da'ddaboot, a mehe sinayyohaas ka holi Waakh a massata.
[2] Anna wohoo beytoo buurenye kitaab iyooge 'dab lakawarse arge. 'Doo'di goorat binahi oraat ichoow iyookkoti binahane lahaaggiche sooriche toro ayti magahiis itolosso sooriche ichohi beytaas garabiche toollo arge. Reemassi chi' geeyo ladowo lagu'ddo 'haab layadeehe Waakh icho siiche iche khuccheene,
[3] geey Muusahi falfati Waakhe ichoow geeyi Heleem laka doween, “Kamuri Waakhenye Miig Tuumman Leh, wihi at yeesso geeddoo meheenye haag ichoow girma yahiin! Karnati yaafo tuummanoow, wihi at yeesso a wihi rummaate am at kareeto mele.
[4] Kamuroow ayyo ikaaroorine, magahaah ikoolin? A mehe ati kalday on munyee. Yaafohi harra tuumman a yamiitiine, toro ati kiwahtaan. I'di tahe wihi fissane at yeesso a soobabbakkaahisse.”
[5] Anna waha 'dubicho ka yeye, minki Waakhe buure usuhi goobi Waakh ka fahan arge. Minka la a eemati saggi Waakh ileejiro tusso.
[6] Herti Waakhe teebeenye sinayyohi teebee khabto la minki Waakhe buure goya kasoobahte. Icho la gaaddi daddakhane bibbildiikhto khabaane, saabi dafareete duhiis la ki 'dahab yahe kach kakhabaan.
[7] Wahanyeyyohi affarenye lasoouume rubey khabo kichekoo herti Waakhe teebee kooba baakhuuli 'dahabe, holi Waakkhi jirtuu tuumman jiro buuho idiibte.
[8] Minki Waakhe buure la uunki ababnaan ichoow miigti Waakh kayimiy goya buuhiche. Et minki Waakhe buure lii'diicho goya gelo mele, ichoowka sinayyohi teebeenye herti Waakhe teebee keente massataan.