[1] Waha 'dubicho ka goobi Waakh ka wihi i'di kowdoti ururi 'doo'di weyti ittaawee daage, wihi us yidah, “Okkhoow, weyti kikoolinna! Ribnaan ichoow weynaan ichoow miig ati leh!
[2] A mehe hukkunkaahki ittaawe a rume toro a fissanyahe. Ati malaayati weene, 'doo'di harra tuumman soho'ddarri ka uskeel kalugu'dde, sina a igoosse. At la diiggi falfayyohaahki iche bakkisse, aál a kagutatte.”
[3] 'Doo'd toro riire wihi us yidah, “Okkhoow, weyti kikoolinna! Uunki 'dabi ilkerengeeteet jirtuu dakkhan serey on ikaha.”
[4] Ewweenki tomon lamma ichoow affare ichoow wahanyeyyohi affarenye lasoouume rubey khabo ba jilbo il kagu'ddeene, Waakkhi komborti antoot kafiddiyo wahteene, wihi icho yidaaheen, “Aamiin! Okkhoow, weyti kikoolinna!”
[5] 'Deerka komborti antoot ka hooyoo sooyeede wihi us yidah, “Atinhi ilbooyyetiise tuumman, atinhi usu karoortaan, atinhi rurrucchul ichoow atinhi wewween, taba Waakkheen koolicha.”
[6] 'Deerka toro hooyi i'di ururi 'doo'di buurenye kowdootee daage. Hooya la a i'di bicchehi sookhubti, toro la i'di karkaraho iyeeda. Icho la wihi icho yidaaheen, “Okkhoow weyti kikoolinna! I'di tahe Kamuri Waakhenye Miig Tuumman Leh, usu walah tuummamba anta.
[7] Weyti hamaano, weynaantiis koolinno! I'di tahe oroosi Heleem a yitah. Inantiisti us disti la a istannabisse.
[8] Iche la gaaddi hahhaaggane bibbildiikhto chaafotoo rucchul laka ikhabine, iche gessatti a lasiiche.” Gaadda la wihi fissane 'doo'di Waakh yeele itolossa.
[9] Herti Waakh 'deerka wihi iche ani itidah, “Waha chiir, ‘'Doo'di Waakh imaalo a ki Waakh oroosi Heleem iwahe.’ ” Herti Waakh kakhayte, wihi iche tidah, “Waha a yeedassi rummaate Waakh.”
[10] An la hertaas Waakh orche ka jilbo il kagu'dde, wahan leheet. I'daasenyi wihi iche itidah “Tabe i'daas ayeelin! Annaka i'di ilbooyyeti wahalhaahenye toro wahalhi 'doo'di Kiriisto rummeeste runti Yeesso babbakkaahiche raaho u, Waakh on ifala. Waakh kalday on waho! A mehe runti Yeesso soobabbakkaahiche, a miigti farniinki Waakh lakacheeko.”
[11] Goobi Waakh usuhi fahan arge, fara'doo dakhan arge. Eti fara'da fuulo la magahiis mehe layadeeh ya, Ki Lakakhuufo, Rum Leh. Usu jiti fissane enenyet kahukkuma, toro la diho irta.
[12] Indohiis la i'di 'dab u a bildiikhaane, matakkiis ka la 'duubassi ittaawenye khaba. Sartiis magahoo kachiirane, i'daasenyi usu on garta, et addane wihi magahaas tahe garti mele.
[13] Ulla kabuu'di diig lakalug'de khaba, magahiis la a Yeedi Waakh.
[14] Kiyati ittaawenye goobi Waakhe fara'ddi daddakhan fuusso la 'dubiissa raahta. Kiyata la darfohi hahhaaggane daddakhane chaafo laa iche khabta.
[15] Afiis la birlabi af lehe us yaafo kabaabiicho kasoobaha. “Ulla wussi ga'daar ka icho a dakhta.” Gurnaanki sabiibe inti gurnaan lakayabti kijiro a yabta. Waha la holi Waakkhi Miig Tuumman Lehe itoollaan.
[16] Kabuu'diis ichoow togooggiis magahane kachiiran, Karnati karnato kussan//ichoow Kamuri kamurre kussan.
[17] Ani la hertoo Waakhe orrah sarche katolosso arge. Iche la weyti riirte, wihi ra'denye serey kayari'd tuumman wihi iche itidah, “Kaaleya, sukuukuhi Waakhe buure isookulma,
[18] 'dee sarti karnatoot ichoow ti 'doo'di iskar iwewween ichoow ti iskarti mimmiige ichoow ti fara'deet ichoow ti iskarti fará'd fuusso amha. Sarti bow'dayyoot ichoow ti 'doo'di bow'dayyo ieheynan ichoow sarti 'doo'di wewween ichoow ti 'doo'di 'da'ddaran amha.”
[19] 'Deerka binahi oraat ichoow karnatohi tomonenye harrata ichoow kiyaticho ba ichohi sookulme 'dee eti fara'd fuulo ichoow kiyatiis dihoti Harmageedo layadeeh kiirti arge.
[20] I'daasenyi binaha ichoow eti goorat eti Waákh íyeyyeedo iskaayyeelo binahaas ortiis ka girmohi miig tuso yeele ba islaleekhabte. Girmoha ka la 'doo'di sumatti binahaas 'hele toro la iyookkoti binahaas wahte a leekkeeste. Icho lammacho rubey khabaani, beyti 'dabe i'di lahawti kibirii'd ibolokhto goya liiseye.
[21] Karnatohicho ichoow kiyaticho tuumman la birlabi eti fara'd fuulo afiis kasoobahe bakkiche. Chimbiro tuumman la sarticho yumheene ichoowka dargeen.