[1] Herti Waakhe teebeenye baakhuulle khabto goyaka, too itimiyye wihi iche ani itidah, “Kaale, hukkunki Waakh malaayata weene bicchehi ittaawe kafiddiito igoocho a kituso.
[2] Karnatohi harrata malaayata soho'ddarri kaleessohteen. Toro la 'doo'di harrata farsoti sabiibe soho'ddarritichee ka meleefu yitah.”
[3] 'Deerka herta Waakh isi'dde, Rubeyti Waakh iwoyte hidaaddoo igeesse. Intaakka makhaabassoo binahoo guu'ddan sarche fuusso arge. Binaha sar tuumman ka magahenyeti Waakh iskeekkaasso kachiirane, toro matah teeba ichoow gaas tomone khabaan.
[4] Makhaabale gaaddoo muggee ichoow gu'duu'd khabto iche khabta. Sar la 'dahab ichoow dagahtoo gato miige ichoow irtiyyohoo gato miige, iche lakeeykode. Iche la kokkooboo 'dahabe wahanyeyyohi weyti lakhaanyee ichoow duksakki soho'darritiche buuhto iche khucchisse.
[5] Miintiche la magaha wohoo dagsan itoollo iche kachiiran, Ilkerengeetti Weene Baabiloon, a Abarti Malaayayyoot ichoow Lakhaanyoyyohi Harra.
[6] Anna makhaabassa diiggi 'doo'di Waakh ichoow diiggi 'doo'di gar Yeesso laabo tubhubye ichoowka meleefu titah arge. Uus an iche arge ka weyti girmeesde.
[7] 'Deerka herti Waakh wihi iche ani itidah, “A i'doh igirmeysatta? Wihi dagsane makhaabassa ichoow binahi iche koorromatte matah teeba ichoow gaas tomon khabo miinsan, a kisoobabbakkaahicha.
[8] Binahaas at agarte goorat a jireene toolla ma jiraane berri la ankhari dahane ieleelin goya kasoobahaane labaabiicha. 'Doo'di harra yaalle, uu' harra lasoouume magahenyeticho buuggi 'doo'di jiroti imassan liikachiirin la, maanti icho binaha argaan, weyti girmeestaan. A mehe binahaas maantoo a jireene, toolla ma jiraane toro berri a yamiitiin.
[9] “Ayta khara 'doonta. Matahenyeti teebeenye binahaas khabaan, kurohi teebeenye makhaabale kafiddiito itoollaan.
[10] Matahenyeta teebee toro karnat teeba itoollaan. Karnatoha teebee, chane a tuunte, koo uliba a karnate, ki addan uliba ma imaatan. I'daasenyi maanti us yamiit, geeddoo rucchul on karnat yateeh.
[11] Binaha goorat jire toolla la ijirin, a karnati siyyeennaatteet. Ullaka karnatohi teebee a kichokoowe, toro la a labaabiicha.
[12] “Gaasohi tomonenye at agarte, karnatohi tomonenye uliba ilassi icho dakhtaan i'heline itoollaan. I'daasenyi karnatoha antohi icho saha'ddoo kalday binahaas harra leedakhtaan a 'helaan.
[13] Icho la maloo kaldaye khabaane, antohicho ichoow miigticho binahi oraate siichaan.
[14] Binaha ichoow karnatoha ba Heleeme diho kiirtaane, i'daasenyi Heleem ichoow 'doo'diis ba icho kahataataan. A mehe us a Kamuri kamurre kussan, toro a Karnati karnato kussan. Toro la 'doo'di usu leejiro a 'doo'di Waakh wahe, Waakh soobahsate toro Waakh a kakhuufaan.”
[15] Herta Waakh 'deerka wihi iche ani itidah, “Bicchehi kootte at agarte malaaya kafiddiito, 'doo'di yeerare ichoow ururreti ittaawe ichoow yaafohi ittaawe ichoow afassi ittaawenye itoollaan.
[16] Binaha at agarte ichoow gaasohi tomone la malaaya a nibhaataan. Icho la wihi iche khabto tuumman a kakhaataane, murukh katabaane, jidiche yamhiine, toro la iche 'dab ka gubaan.
[17] A mehe Waakh karnatoha maliissa uurassicho gesse, 'dee malaas ka wihi us 'doono yeelaan. Karnatoha a isleegoochaane, antohichoki icho yaafo kadakhtaan binahi oraat siichaane, ichoowka yeedassi Waakh labuuhicha.
[18] Makhaabassi at agarte, ilkerengeetti weene karnatohi harra tuumman dakhtaane itolossa.”