[1] Girmohoo buure sereyta daayan kasoobaheen. Makhaabassoo orrahe kaankubantahe soobahte. Iche la yeyyahe katolossa, 'duubi bakkaal tomon ichoow lamma khabo la matah kakhabta.
[2] Iche huleese eheete, jeenteti iche ichiissuu bolokh ka ooyte.
[3] 'Deerka girmohoo addan sereyta daayan ka soobaheen. Waha la a khorojebsihoo buurenye guu'ddane, matah teeba ichoow gaas tomon khabo, matah ba la 'duuboo khabo.
[4] 'Dubiis ka, yiyyihimohi saraat goonan seyyah goyaka goonankoo soojiite, harra isookhube. Khorojebsiha weeli makhaabassi kootte soodesso orche tolossate, 'dee weel uus dessi yaham.
[5] Inankoo desse. Inanka lab la usu dowwanoha ka yaafo tuumman wussi ga'daar kadakhta. Inanka la uus desse on Waakh ichoow kombortiisti antoot liitogte.
[6] Makhaabale hidaad ka inti goorat Waakh iyeele ifiridde, 'dee herti Waakh ibeen alifoo kud lamma ichoow ibeen tomon lih goollissa.
[7] Goobi Waakh ka la diho a jirte. Herti Waakhe weene Miikayel layadeeh ichoow herticheti Waakhe addan khorojebsi isjaheen. Khorojebsi ichoow hertiis diho geleen.
[8] I'daasenyi khorojebsi ichoow hertiis ba lasooriche. Goobi Waakh ka meessicho waayeen.
[9] Khorojebsiha buure il liisooseye, ulla a ki goorat archiiy jire, magahiis la ki 'doo'd hanti ommos Seytaan iche layadeeh. Usu 'doo'di harra tuummane jit buucha. Ulla hertiis khabaayi harra liisooseye.
[10] An 'deerka hooyoo buure goobi Waakh ka daage, wihi us yidah, “Toolla ribnaan ichoow miig ichoow dakhi Waakkheen, ichoow anto Lasubhehiis a yimaateen. I'di tahe ki 'doo'deenki Kiriisto rummeeste cheekti, ibeen ichoow maalim ba Waakh ortiis ka cheekti goobi Waakh a lakasooseye.
[11] 'Doo'd Kiriisto diiggi Heleem ka ichoow wori rummaate icho cheekeen ka Seytaan a sooricheen. Toro la chirri icho layagiis laka, icho omoot ma karoorin.
[12] Maantaka, goobassi Waakh ichoow atinhi kajirtaan ba, weyti hamaada! I'daasenyi atinhi harra ommos bey goya taalliin, sinati atin sugto eenna a buure! I'di tahe Seytaan a atin isookhubte. Ulla holi buurenye khaba, a mehe us saggi ibeennetiis igaabatte a garta.”
[13] Khorojebsi inkoo us saggi harra liikasoolug'de kase ka, makhaabassi kootte inankoo desse kaloo'de.
[14] Makhaabál barbarretoo lammeenye gabadeet lasiiche, 'dee serey ka inti hidaad ka liiyeele, gu'h seyyah ichoow hay lih lakagoollicho, khorojebsi la ikasooeleelin inyaanta.
[15] Khorojebsi 'deerka bicchehi buurenye 'dulo 'dee makhaabál haro af kasoobahche, 'dubiche gate.
[16] I'daasenyi harra makhaabál gargaarte, aficheki furname ka bicchehaas khorojebsi af kasoobahche khorkhisse.
[17] Khorojebsi 'deerka makhaabál ihollowe, nyaakhuticheki addan diho kiirte. Waha la a 'doo'di amurreti Waakh raaho, toro la runti Yeesso soobabbakkaahiche kakhuufo.