[1] An 'deerka yeye, Heleem orteey ka Hali Saayone fuula. 'Doo'di alif kudoo, alif tomon affar ichoow alif affare usuhi Heleem leejiro laka arge. Waha a 'doo'di magahi Heleem ichoow magah Aabbahiis ba miinassicho kachiiranyahiin.
[2] Hooyoo buurenye i'di riiriti hawti 'dusseenye ommos i'di karkaraheenye goobi Waakh kasooyeede daage. Hooya a i'di 'doo'di reemassichoki chi' geeyo ladowo lagu'ddo 'haab layadeeh yeedicho.
[6] 'Deerka hertoo Waakhe addane serey katari'd arge. Iche la Wori Haaggane jirtuu imassanne khabte, 'dee weeli enenyete harra kijiro, ilal tuumman ichoow yaafo tuumman ichoow afaf tuumman ichoow fil tuummane icheekta.
[7] Iche la hooyi buure ka wihi iche tidah, “Taba, Waakh karoora, toro la saa'da! I'di tahe ibeenki Waakh weeli enenyet hukkumo a yitah. Waakkhi serey ichoow harra ichoow bey ichoow indohi biccheet ba soouume, wahda.”
[8] Hertoo Waakhe lammaatteet 'dubiche leetimiyye wihi iche tidah, “A massatte! Ilkerengeetti Weene Baabiloon bar a waayte. Ilkerengeetta yaafohi harra tuumman farsoti sabiibe soho'ddarriti iche kaassohatte damin a iholisse.”
[9] Hertoo Waakhe seyyahnaatteet 'dubicho tabte, hooyi buure ka wihi iche tidah, “Eti tuummane binaha ichoow iyookkotiche wahti, sumatti binaha la miin ommos dahan ka 'hele,
[10] ullaka farsoti sabiibe holi Waakh itolosso soodama. Hola la, farsoti sabiibe miigenye bicchehoo rucchul laka liikakhayine kokkoob lakachibo liiokkanaache. Waakh eta herti Waakhe munyee ichoow Heleem ortiis ka dagahti bolokhto ka weyti bolokh tusa.
[11] Uunki bolokkha 'doo'da latuse jirtuu tuumman sereye ikaha. 'Doo'di binaha ichoow iyookkotiche wahti ichoow eti tuummane sumatti magahiis 'helo, ibeen ichoow maalim ba nasme ma 'helo.”
[12] 'Doo'di Waakhe amurreti Waakh raaho toro Yeesso kakhuufo ichohi samacchaarenye garrahsati la'doona.
[13] Hooyoo toro goobi Waakh kayamiit daage, wihi us yidah, “Waha chiir, uus toolla kakhabatti, eti tuummane usu ichoow Kamur wohoo kalday yahiine yamuut a liimaala.” Rubeyti Waakh la wihi iche soolaabte, “Aa, a rum. Hili miigenye icho haaggicheen ka a nasaan. Icho a liimaala a mehe haaggi icho yeelaan 'dubichooda raaha.”
[14] Ani la yeye orteey ka mirisoo dakhan arge, toro la etoo Ínam Aadam iyoog usuhi mirisaas kafiddiyo arge. Ulla 'duubi 'dahabe matakkiis kakhaba, warhanti gurnaan lakagoocho la dahane kakhuccha.
[15] Hertoo Waakhe addan 'deerka minki Waakhe buure goya kasoobahte, weyti riirte, eti miris kafiddiyo wihi iche itidah, “Warhantaahti gurnaan lakagoocho khaate, gurnaan soogooy, i'di tahe wihi harra ka lasoosuuno a bissateene, kola la saha'ddi lasoosuuno a titah.”
[16] Eti miris kafiddiyo warhantiisti gurnaan lakagoocho harra sarche kamoroogiche, harra tuumman i'di gurnaan u soosuune.
[17] Hertoo Waakhe addan goobi Waakh ka minki Waakhe buure kasoobahte, iche laka warhanti af lehe gurnaan lakagoocho khabte.
[18] Toro hertoo Waakhe addane antohi 'dab khabto koondihi ga'daar kasoobahte. Hooyi buure ka herti warhanti af lehe gurnaan lakagoocho wihi iche itidah, “Warhantaahti af lehe gurnaan lakagoocho khaate, gurnaanki sabiibe harra kijiro soogur. I'di tahe gurnaanki sabiib a bissaate.”
[19] Herti Waakh warhanticheti gurnaan lakagoocho harra kamoroogisse, gurnaanki sabiib soogurte, meessi buurenye gurnaanki sabiib lakayabti goya kachibte. Meessa la a i'di sinati Waakh holiis ka 'doo'di uskeel leh omhicho.
[20] Gurnaanka sabiib la ilkerengeetti ween kharicheeda lakayabte. Diig intaas gurnaan lakayabte ka 'dule, geeddi kiilomitta kud seyyah i'dule. Diig la hoggiis geeddi mittatoo ichoow nyuus iche eheet.