[1] 'Deerka sereyti daayane husub ichoow harrati husub arge. I'di tahe harrati oraat ichoow sereyti daayane oraat tuummamba a kuteen. Walah beyenye kola jiro mele.
[2] Anna Ilkerengeetti Weene Lagane Yeerusaleeme husube goobi Waakh ka sookhubatti arge. Ilkerengeetta a i'di inanti ladiso tannabatte eti disti gaaddi haaggan igessatte.
[3] Hooyi buurenye komborti antoot kasooyeedo daage, wihi us yidah, “Yeya, Waakh kola weeli enenyet goya furta. Ulla icho a leefiddiya, icho la 'doo'diis yateehiin. Waakh rubeytiis la icho a leejira, ulla Waakkhichooda yateeh.
[4] Waakh la indohicho ka ilmohicho tuumman a hiyyaaya. Kola omoote ma jirto, enenyet looyo mele, oytime ma jirto, bolokh laka ma jiro. I'di tahe wahanyeyyohi oraat a kuteen.”
[5] Eti komborti antoot kafiddiyo la mehe yidah ya, “An walah dakkhan a husubnaacha!” 'Deerka wihi us ani iyidah, “Waha chiir, i'di tahe yeedassa a wihi lakakhuufo, toro la a wihi rummaat.”
[6] Ulla wihi us ani iyidah, “Walah dakkhan a layeele! Ani Uumaccheenye toro ani on 'Da'ddabee. An walah tuumman orcho a jire, walah tuumman 'dubicho laka a jira. Eti subgaate, an i'daanu bicchehi issi jiro kayamiit siicha.
[7] Eti sooricho wihi tuummane usu mu'dane 'hela, an Waakkhiissa ateehe, ulla weeleey yateeh.
[8] I'daasenyi 'doo'di bur'deyyee ichoow ki Kiriisto irummeysan ichoow ki wihi bi'dire tuumman yeelo ichoow ki enenyet dubunuunu yagiis ichoow ki soho'ddarri kaassohti ichoow ki tibaato khabo ichoow ki iyookkoyyohi waakkhakh lakayeessi wahti ichoow ki beeno leh tuumman, meessicho a beyti 'dabe i'di lahawti kibirii'd ibolokhto. Waha a omootti lammaatteet.”
[9] Herti Waakhe teebeenye baakhuulleti teebeenye sinayyohi yomboot buuhaan khabte kichekoo yimiyye ileeyeede wihi us iyidah, “Kaale, nyarnyaar a kituso, iche a makhaabassi Heleem.”
[10] Herta Waakh la Rubeyti Waakh iwoytaayi haloo weyti deer isi'dde. Iche la Ilkerengeetti Weene Lagane Yeerusaleeme Waakh katamiite goobi Waakh kasookhubatti itusse.
[11] Banayhi ilkerengeetta ababnaanki Waakh rubeytiis kasooababo kayamiitiin. Ababnaankaas la a i'di daakkoo gato miigenye ulhawe i'di kiyoow u warraakhe.
[12] Ilkerengeetta la khaari daddaaboote serey ka weyti deere kamarsan. Toro ilkerengeetta arit tomon ichoow lamma khabta, arite ba la hertoo Waakhe tolossa. Arite ba magahoo yaafohi tomon ichoow lammeenye Issiraayele kachiiran.
[13] Anki miigeet ka arit seyyahe khaba, anki gurro ka la arit seyyahe khaba, beri ka la arit seyyahe khaba, bahay ka la arit seyyahe khaba.
[14] Khaara daddaaboote ilkerengeetta ween kamarsan, daddaabohoo ilaate tomon ichoow lammee iche kadisanyahe. Daddaabe ba la magahi ergaanoti Heleeme tomon ichoow lammee, iche kachiiran.
[15] Herta Waakhe ileeyyeeddo, wussoo 'dahabe iche ilkerengeet ichoow arto ichoow khaari ilkerengeetta kamarsan tuumman karerreegto iche khabta.
[16] Ilkerengeetta la 'dollohiche tuumman a ekka. Iche la wussa ilkerengeet karerreegte. Ballaaddihiche a kiilomitta alif lamma ichoow kud lamma, segdeerru ka laka a kiilomitta alif lamma ichoow kud lamma. Deeraantiche ichoow segdeerruhiche ichoow ballaaddihiche a ekka.
[17] Herta Waakh toro khaari ilkerengeet kamarsan rerreegte, yobbo ka a mitta tomon lih ichoow lih. Herta Waakh la saggi enenyet walah irerreego on irerreegta.
[18] Khaara ilkerengeetta kamarsan dagahtoo gato miigenye ulhawe lakadise. Ilkerengeet la 'dahabi massane i'di kiyoowhi bildiikheenye kadisan.
[19] Daddaabohi ilaate khaari ilkerengeetta kamarsan kadisanyahe la dagahti fil tuummanenye toro gato miigenye lakeeykode. Daddaabti ilaate oraat a too ulhawe, ti lammaatteet la a too daayane, ti seyyahnaatteet la a too duh ittaawenye, ti affarnaatteet laka a too ulhawe,
[20] ti channaatteet a too barlayenye, ti lihnaatteet a too guu'ddane, ti teebannaatteet a too derle ichoow ulah iskawarsanyahiine, ti siyyeennaatteet a too iche laka ulhawe, ti saagaalnaatteet a too iche laka duh ittaawenye, ti tomonnaatteet a too iche laka ulhawe, ti tomon ichoow koownaatteet a too iche laka guu'ddane, ti tomon ichoow lammaatteet a too muggee.
[21] Artohi tomon ichoow lammee tooba daakkoo weyti gato miigenye lakahaaggiche. Jiti ilkerengeetta ween dah kagoocho la a 'dahabi massane i'di kiyoowhi bildiikhee.
[22] Ilkerengeet goyaka minki Waakhe buure ma argin, i'di tahe Kamuri Waakhenye Miig Tuumman Leh ichoow Heleeme minki Waakhe buurenye ilkerengeetete.
[23] Ilkerengeete orrah ommos yeyyakki banay siicho ma 'doonto. A mehe ababnaanki Waakhe ilkerengeet banay siicha, Heleem la a taahicheeda.
[24] Yaafo tuumman la banayhaase goya kaassohtaan. Karnatohi harra tuumman laka kamurroonkicho intane keenaan.
[25] Artohi ilkerengeetta maalim tuumman ma looto, a mehe intaas ibeen ma tateeh.
[26] Haaggi nool ichoow kamurroonki yaafo tuumman ilkerengeettane lakeena.
[27] Walah bi'direnye jirtuu ilkerengeet goya gelo mele. Toro la eti wihi lakhaanyee yeelo ommos eti been goocho goya ma gelo. 'Doo'di gelo, a ki magahenyeticho buuggi Heleeme 'doo'di jiroti jirtuu imassan khabo lakachiire kaldach on.