[1] “Herti Waakhe keleyenye urur Kiriistoki Efeesso itolosso waha ichiir. Waha a farniinki ki bakkaalleti teebee dahantiisti miigeet kakhuccho toro la reemassi teebeenye 'dahabe taa lakorcho dahticho kaassohti.
[2] Wihi atin yeessaan ichoow holi atin dowtaan ichoow saggi atin igarrahsattaan a garda. Saggi atin 'doo'di uskeel leh i'dii'ddaan a garda. 'Doo'da ergaano Kiriisto iskaayyeelo i'daasenyi ieheynan a kajjeene, beenticho agarteen.
[3] Atin a garrahsatteene, jeenteteey u, sinayyo tuumman ka samacchaar on eheete, ajjibaat ma khaatin.
[4] I'daasenyi waha a atin kakhaba, saggi atin uumaccho ka ani i'doontaan kola ma i'doontaan.
[5] Geeddi atin sookufteen kasoo'hela! Uskeeliin kasoonokhda, wihi atin uumaccho ka yeesseen yeela. Cha'atin uskeeliin ikasoonokhan, an a atin iamiite, reenkiinki taa lakorcho meessiis kabahcha.
[6] I'daasenyi wohoo an atin kakoolicho a waha, atin wihi 'doo'd Nikolaawo yeelo a 'dii'ddantahiin. Ani laka waha a 'dii'ddanahe.
[7] Eti dogo khabo wihi Rubeyti Waakh ururre Kiriisto idowto a daago gi'de. Eti tuummane sooricho la, ohonti us gurnaanki geeyi jiro lakeelo bahcho, gosi Waakh goya katoollo kayaham a mu'danyahe.
[8] “Herti Waakhe keleyenye urur Kiriistoki Simiriina itolosso waha ichiir. Waha a farniinki ki Oreyenye toro la Salaahime, ki yumuyye toro omoot kasookahe.
[9] Sinati atin loomhicho ichoow miskiinkiin a garda. I'daasenyi atin a kamurre! Saggi 'doo'doo Ya'huud isyadeehe toro la Ya'huud ieheynan suujoonki nool atin ikadowo a garda, i'daasenyi icho a minki weysiite Ya'huude Seytaan dakhti.
[10] Sinayyohi dowwanoha ka atin lasoomhicho akaroorina. Wihi an atin icheeko, Seytaan gaasiinkoo jeela kachiba a atin kajaa. Sinayyoha la ibeen tomon on atin yamhiin. Chi' omoot atin liigooche laka, ani on ikakhuufa ani la 'duubi jiroti jirtuu imassan a atin siichaa.
[11] Eti dogo khabo, wihi Rubeyti Waakh ururre Kiriisto idowto a daago gi'de. Eti tuummane sooricho la, omootti lammaatteet i'daaru laka ma gaameerto.
[12] “Herti Waakhe keleyenye urur Kiriistoki Bergamum itolosso waha ichiir. Waha a farniinki ki birlabi af leh khabo.
[13] Inti atin fiddiitaan a garda, a inti Seytaan kombortiisti antoot kakhabo. I'daasenyi atin uliba rum ka a ikhucchissaan. Maanti eteeyki lakakhuufo Antiiba layadeeh ilkerengeettiinti ween ka inti Seytaan fiddiyo lakayigis laka, atin saggi atin ikakhuuftaan ma 'dii'din. Usu rum ka garteey a laabe.
[14] I'daasenyi wahanyeyyohoo rucchul a atin kakhaba. Atin intaas ka 'doo'doo wihi Baalam enenyet abche raaho a khabtaan. Baalam usu Baalak saggi 'doo'di Issiraayel liitarraantarricho abche, 'dee 'doo'di Issiraayel gololi iyookkoyyohi waakkhakh lakayeessi liisoorriyooche yahame toro soho'ddarri liisoojiita.
[15] I'daasu atin laka 'doo'di wihi Nikolaawo 'doo'd abcho raaho a khabtaan.
[16] Maantaka uskeel kasoonokhda. Chi'iche i'daas ieheynan, a amiite birlabi afeey kasoobaho ka 'doo'daas diha.
[17] Eti dogo khabo, wihi Rubeyti Waakh ururre Kiriisto idowto a daago gi'de. Eti tuummane sooricho la, gololoo Waakh kayamiite dagsane manna layadeehe siicha. Toro la daakkoo dakhane magahoo husub kachiiranyahe, eti 'helo kalday on garti, iche siicha.
[18] “Herti Waakhe keleyenye urur Kiriistoki 'Diyaa'dira itolosso waha ichiir. Waha a farniinki Weeli Waakh kayamiit. Indohiis a i'di 'dabi weyti bolkho, luhlohiis la i'di birtoo boorane lasiguu a bildiikhaan.
[19] Wihi atin yeessaan ichoow 'dooninti atin is'doontaan ichoow kakhuufnaanki atin Waakh kakhuuftaan ichoow saggi atin isihissaan ichoow garrahsihiin a garda. Toro la saggi atin toolla wihi goorat atin yeesseen rumanka 'dirihicho iyeessaan a garda.
[20] I'daasenyi wihi an atin kakhabo kallaayo, atin aranta Yeesebel layadeehe eti Waákh íyeyyeedo istadeeh a isisoo'diissaan. Wihi iche abisso ka falfayyoheey jite bujissa, 'dee 'doo'di isidisan isleeur'da toro gololi iyookkoyyohi waakkhakh lakayeessi liisoorriyooche yamhiin.
[21] An iche geeddi deer a 'diiche 'dee soho'ddarritiche a kasoonokhatti, i'daasenyi ma 'doonto.
[22] Maantaka an makhaabassa sina omhicha. 'Doo'di uskeeli makhaabassi tiis ieheynan leeur'do iche leegelo la, sammata icho uskeeli icho leeyeelaan ikasoonokhan, sinati buurenye omhicha.
[23] 'Doo'di iche raaho a bakkicha, 'dee urur Kiriisto tuumman saggi an uur ichoow mali weeli enenyet ifiiricho rumanka abta. Ebba wihi us yeelo ichoow wihi an guto a israahaan.
[24] Atinhi addane ilkerengeetti 'Diyaa'dira kajirtaane, wihi iche enenyet abisso iraahine, toro la wahanyeyyohi dagsane Seytaan iaban, hulees addane an atin korcho mele.
[25] I'daasenyi wihi atin khucchissaan kalday jurkhicha ichoowka a soonokhdi.
[26] Eti tuummane sooricho ichoowka 'dubicho eleelo wihi an 'doono yeelo, an antohi us yaafo tuumman kawoyo a siicha,
[27] saggaas an Aabbaheey anto ika'heluu. ‘Usu icho wussi ga'daar ka a dakhta, i'di 'dirihi laajjebchuu, yaafohaas a jejjebcha.’
[28] Ani la usu bakkaali baryo laka a siicha.
[29] Eti dogo khabo, wihi Rubeyti Waakh ururre Kiriisto idowto, a daago gi'de.