[1] Herti Waakhe channaatteet arabiche afuufte, anna bakkaaloo sereyta daayan ka harra kasoodihe arge. Waakh la bakkaalaas furoti afafhi ankhari dahane ieleelin siiche.
[2] Chirri us afafhi ankhari dahane ieleelin fure ka, uunkoo i'di ki 'dabi weyti buurenye labolkicheenye weyti daayan ankhar goya kasoobahe. Uunka ankhara kasoobahe orrah ichoow hafar mug'di kayeele.
[3] Gubaalle la uunkaas goya kasoobahte, harra isootabte. Waakh gubaalleta miigti i'di ti arraarohi harreenye siiche.
[4] Geeyi harra ommos hoos laka agaameerina liidah. I'daasenyi eti tuummane sumatti Waakh miin ikakhabin sina kawaaricha iche liidah.
[5] Miigti icho weeli enenyet kayagiisiin ma lasiinne, i'daasenyi miigti icho hay chan weeli enenyet kabolkhichaane lasiiche. Bolokkhicho a i'di bolokkhi arraar.
[6] Maanassaas weeli enenyet omoot a yowta i'daasenyi ma yamuut, omoot a imoona i'daasenyi omoote icho a kafiridda.
[7] Gubaalleta fara'ddi diho liitannabiche iyoogtahe. Matahenyeticho ka wohoo 'duubassi 'dahab iyooge khabaane, toro la foolassicho fooli enenyete iyoogyahiin.
[8] Tinticho a i'di tinti deyyeho, ilkohicho la a i'di ilkohi bahassi.
[9] Kachassicho ka wohoo i'di birti lahageetenye kach lagessati iyooge khabaane, hooyi barbarreticho la i'di riiriti garrunyeti ittaawenye fara'de diho ijiitto iyeedda.
[10] 'Dubassicho la a i'di 'dubassi arraare enenyet khaniino, 'dubassicho goyaka la miigti icho enenyet hay chan tuumman bolokh katusaane khabaan.
[11] Karnaticho la a herti keleyenye ankhari dahane ieleelin anatti. Magahiche la afi Ibiraaniya ka Abadoon, iche layadeeh. Afi Giriig ka la, Abooliyon, iche layadeeh. Magahenyeta a mehe ya Kheeroocha.
[12] Sinati oraat a kutte, sina lamma addan a sooyomboossa.
[13] 'Deerka herti Waakhe lihnaatteet arabiche afuufte, ani la gaasohi affarenye koondihi ga'daare 'dahab katoollo Waakh ortiis kijirto ka, hooyoo yeedo daage.
[14] Hooya la herti Waakhe lihnaatteete arab khabto leeyeede, wihi us iyidah, “Herti Waakhe affarenye hawti buurenye 'dusso Yuufereet layadeeh ka hidan soofur.”
[15] Herta Waakhe affarenye hili iche gu'haas ichoow haytaas ichoow maalinkaas ichoow saha'ddaas gesso liitannabiche la la'diiche, 'dee weeli enenyet goonan seyyah goyaka goonankoo tagiis.
[16] An tiri iskarti fara'd fuusso a daage, iche la et ekkees yabuu'd mele, a miiliyon kud lamma.
[17] An fooltabcho ka fará'd ichoow 'doo'di fará'd fuulo arge. 'Doo'd ga'daarretoo gugguu'ddane i'di 'dabe ichoow too daydaayan ichoow too derleyyeenye kach kakhaba. Matahenyeti fara'deet la matahenyeti bahassi iyoogyahiine, 'dab ichoow uum ichoow jimbihilo la afassichooda kasoobahaan.
[18] Sinayyohaas seyyahcho, 'daba ichoow uunka ichoow jimbihiloha afi fara'de kasoobaheene, 'doo'di harra kijiro goonan seyyah goyaka goonankoo yigaaseen.
[19] Fara'dda miigticho aficho ichoow 'dubassichooda kijiraan. A mehe 'dubassicho a i'di toofassi matahenyeti enenyet bolokh tusso khabto.
[20] Weeli enenyete soo'hade sinayyoha ibakkin la uskeelicho ma kasoonokhan ba. Uliba ginnayyo ichoow iyookkoyyohi icho Waakh kayeessaan on wahtaan. Iyookkoyyoha 'dahab ichoow lahaag ichoow birtoo booran ichoow dagahe lakahaaggiche. Iyookkoyyoha la, indo ma khabaane, dogo ma khabaane, ma sohtaan la.
[21] Toro la 'doo'd ogoossi dubunuunu lagelo ommos moroyyohi liirti ommos 'doo'di isidisanne isleeur'do ommos hatto ma kasoonokhan.