[1] Chirri Heleem hanjati teebannaatteet bukkhiche ka, goobi Waakh ka saha'd nyuusiche riirit ladaage mele.
[2] Ani la herti Waakhe teebeenye Waakh ortiis tolosso arge, icho la arab teeba lasiiche.
[3] Hertoo Waakhe addane khulaankoo 'dahabe uyuugge lakagubo khabto timiyye, koondihi ga'daare 'dahab hagga tolossatte. Uyuuggeti buurenye lasiiche, iche la uyuuggeta weysiha 'doo'di Waakhe koondihi ga'daare 'dahabe komborti Waakhe antoot ortiis kajirto kakhayta Waakh ibihissa.
[6] 'Deerka herti Waakhe teebeenye arabti teebee khabto tannabatte arabtichooda afuuftaa.
[7] Herti Waakhe oraat arabiche afuufte, dagahti baraafo ichoow 'dabi diig kawarsanyahe harra kasookhubteen. Harra goonan seyyah ka goonankoo 'dab massiche. Geeyo goonan seyyah goyaka goonankoo 'dab massiche, hoosi ulhaw tuumman laka 'dab massiche.
[8] Herti Waakhe lammaatteet arabiche afuufte. Wohoo buurenye 'dab yahame i'di haloo buure la beyti buure goya kadiheen. Beye goonan seyyah goyaka, goonankoo diig yitahye,
[9] binahi bey goya kijiro rubey khabo goonan seyyah goyaka goonankoo 'debbeeste, koobano goonan seyyah goyaka goonankoo bar latire.
[10] Herti Waakhe seyyahnaatteet arabiche afuufte, bakkaaloo buurenye 'dab kabolkho la serey kasoodihe hawohi 'dulo ichoow indohi biccheet goya kadihe, goonan seyyah goyaka goonankoo goya kadihe.
[11] Bakkaala la magahiis Birrakh iche layadeeh. Bicche goonan seyyah goyaka goonankoo birrakhnoweene, 'doo'di ittaawe la bakkate jeenteti bicchehuu.
[12] Herti Waakhe affarnaatteet arabiche afuufte. Orrah ichoow yeyyah ichoow yiyyihimo goonan seyyah goyaka goonankoo gu'ddeene, jeentetaas u goonan seyyah goyaka goonankichokoo mug'di yitah. Maalim goonan seyyah goyaka goonankoo banay ma khabo, ibeen goonan seyyah goyaka laka goonankoo banay ma khabo.
[13] An 'dey'doochaayi, gabaddi serey katari'de hooyi buure ka riirto daage. Iche la wihi iche elatti, “Uuwwiy! Uuwwiy! Sinati weeli enenyete harra kijiro isoosohatti eenna a buure, jeenteti hooyi arabi herti Waakhe addane seyyahe dowwanoha ka isooafuuftuu!”