[1] Eti khadaaba soochiiro a ani, Yuudahi bow'da Yeesso Kiriisteenye, walaal Yaakoobee. 'Doo'di an ichiiro la a 'doo'di Waakkhi Aabbaheene wahe toro la 'doono, Yeesso Kiriisto la toorribo.
[2] Waakh ba uur atin isoonugleesta, nebey atin kakaala, 'doonin atin tusta. Toro la usu ba wahanyeyyoha tuumman weyti atin ikasookhaya.
[3] Aalasseeyki an weyti 'doono, geeddi an wori ribnaanki inno isleegisanno miinsan atin isoochiiro kamaldi, wihi an arge a mehe ya, wohoo addane uur ikasoodihe atin isoochiira. A atin hawwaasda, kakhuufnaanki atin Kiriisto kakhuuftaane 'doo'di Waakh maantoo kalday on dahan lagesse, jirtuu la liikanokhan hol kadowa.
[4] I'di tahe 'doo'doo dagsi ka goytiin soogele a jira. Saggi archiiy Yeedi Waakh liikachiiruu 'doo'da sina a liigooche. Icho a 'doo'di Waakh igaranne, haaggi Waakhe buure baabulo, jitoo icho soho'ddarri kaassohtaan kayeelo. Toro la Yeesso Kiriistohi Kamureenki keleyenye anto tuumman leh a 'dii'ddanyahiin.
[5] Toolla waha tuumman a garattaan. Eheetteey laka, wihi an atin kasoo'helin 'doono Kamuri goorat yaafohi Issiraayel ili Miissiri kasoobahche, i'daasenyi yomboka eti tuummane usu irummeysan a bakkiche.
[6] Wihi addane an atin kasoo'helcho, a herti Waakhe goorat antohi Waakh siiche ka hili lasiiche ibuuhinne, i'daasenyi meessiche katabte. Waakh icho biingoyyohi armaanjireene mug'di goyaka kahide, ichoowka Ibeenki weene Waakh 'doo'd hukkumo yateeh.
[7] I'daas on u 'doo'di ilkerengeetti Soodom ichoow ki ilkerengeetti Goomorah ichoow ilkerengeetohi addane isoodow ba jiroti i'di ti hertaasenye jireen. Icho laka soho'ddarri ichoow jiti mejel ichoow deyyeho ba isleeur'daan a kheeroocheen. 'Doo'daas la iyookkoti 'doo'di berri 'dabi jirtuu ijitin ka sina latuso yitaaheen.
[8] I'daasu laka 'doo'da wori beenaat enenyet abcho jeenteti wihi icho kiissillootaan u sartichooda bi'dirroochaane, antohi Waakh 'dii'daane, toro herti Waakh igafaan.
[9] I'daasenyi herti Waakhe weene Miikayel layadeeh laka maanti iche ichoow Seytaan ba eti sar Muusa khaato isleemarmeen, walah iche Seytaan kacheekatte mele, i'daasenyi “Kamur a kileejaakho,” iche itidah.
[10] I'daasenyi 'doo'da wihi icho foolicho ikhabine leeabaarramaan. Icho laka i'di binahi yibaate mal ikhabin u wihi uuricho kasoobaho on gartaan. Wahanyeyyoha on icho bakkichá.
[11] Sinati icho sugto eenna a buure. A mehe icho jiti suujenye goorat Kaayin tabe tabeen! Toro la jeenteti icho chilim i'doonaan u, uskeeli goorat Baalam gele icho laka ioryeen. Icho laka yeeddaagiwwaayyo katuumaan i'di 'doo'di goorat Koorah woyo Kamur daagiwwaayuu.
[12] 'Doo'da a i'di duksakki atin bi'dirroocho chirri atin daawti 'doo'd Kiriisto isleegolossati atin gessaan. Icho heebtoo rucchul laka ma argaane, toro la wihi awtichooda on rirrihaan. Icho a i'di mirisi hafar guuricho, bicche laa. Icho a i'di geeyohi hayohi gurnaan lasugo ka gurnaankoo rucchul laka ikhabin. Icho hiiyyaye lakasoobukkhiche. Icho rumanka a tuumeen.
[13] Lakhaanyoti icho gelaan la a i'di hamboti weyti buurenye chaafo khabto beyti buure ka hafari buurenye irti uskul kahcho sookhaatto. Icho a i'di yiyyihimohi baabe Kamur mug'dihi reebenye armaanjireen meel igesso.
[14] Eti Eenog layadeehe kholoti teebannaatteete Aadam sooraahte ka jire, orey on wori Waakhe 'doo'da miinsan kaayyeede, wihi us yidah, “Bal yeya, Kamur hertiisti munyayyeenye aliffe goosso khabaayi a yamiit.
[15] Ulla 'doo'd tuumman a hukkuma. 'Doo'di tuummane Waakh igaranne uskeel leh, wihi Waakh 'dii'do tuumman yeele ichoow yeedichoki tuummane sussuujenye Waakh miinsane icho esseen ka sina igoocha.”
[16] 'Doo'da kol dakkhan nyunnyuuto ma 'diicho, iriir on kajiraane, suujoonki uurassicho imoonaan on yeelaan. Icho a iskhukkhummanaachaane, 'doo'di addan koolichaane 'dee wihi icho 'doonaan 'helaan.
[17] I'daasenyi aalasseeyki an weyti 'doono, atin la wihi ergaano Yeesso Kiriistohi Kamureene orey atin icheekte kasoo'hela.
[18] Wihi iche atin itidah kallaayo, “Ibeenneti 'da'ddaboot 'doo'di 'doo'di addan kachaarti, wahanyeyyohi wihi Waakh ieheynane uurassicho imoonaan on yeelo a soobaha.”
[19] 'Doo'dane seley atin goggoocha. Rubeyti Waakh goycho ma kijirto gone, suujoonki harrata on yeelaan.
[20] I'daasenyi atinhi aalasseeyki an weyti 'doonee, taba kakhuufnaanki weyti lagane atin Kiriisto kakhuuftaan ka ismiigoocha. Cha'atin Waakh wahattaan la Rubeyti Munyee a atin woyto.
[21] Geeddi atin jiroti jirtuu imassanne Yeesso Kiriistohi Kamureene uurnugleeliis ka atin siicho sugtaan, 'dooninti Waakh atin ikhabo kafiddiya.
[22] 'Doo'di uurlammaal khabo inaha.
[23] 'Doo'di addan la 'dab goya kasootogda, riba. Gaasoo la nahtinti roorroti Waakh khabto tusda, i'daasenyi atin laka ubbaarretichoti derdeere ildeerroti suujenye icho yeelaan ka labi'dirrooche 'dii'da.
[24] Toollaka weynaan tuumman a ti Waakkhi tarraantarran atin kaholin yabuu'de, toro la atinhi wohoo rucchul laka atin liikacheekan hamaadi buure khabtaani ortiisti ababto atin keeno.
[25] Toro la Yeesso Kiriistohi Kamureene ka, Waakkheenki kaldaye 'Doorribeheene koolo ichoow kussi ichoow miig ichoow anto ba wihiissa on a yitaaheen geeddi harra liisoouumin ichoow toolla ichoow jirtuu tuummamba. Aamiin.