[1] Toro hertoo addane Waakhe miige ichehi goobi Waakh kasookhubatti arge. Iche la mirisoo dakhane kaankubane matakkiche la moose kamarsan. Fooliche la i'di orraheet u a ababa, luhlohiche la a i'di tirrimmeti 'dabi buure.
[2] Herta Waakh la khadaaboo rucchule yuubane furane dahan kakhabta. 'Da'ddabicheki miigeet beytoo buure katoollisse, 'da'ddabicheki gurro la harrati angagan katoollisse.
[3] Iche la hooyi buurenye i'di ki bahassee bihisse. Chi'iche riirte ka, guugah kol teeba yeedeen.
[4] Chirraas guugah kol teeba yeedeen ani la wahanyeyyohaas chiirin leheet. I'daasenyi hooyi goobi Waakh ka ileeyyeedo daage, “Wihi guugakkaas teebee yidaaheen achiirine dagi,” iyidah.
[5] 'Deerka hertaas Waakhe an arge bey ichoow harrati angagan katolosso dahanticheti miigeet goobi Waakh iokkhisse.
[6] Magahi Waakkhi jirtuu tuumman jiro, sereyta daayan ichoow harra ichoow bey ichoow wihi tuummane goya kijiro soouume kadaatatte, mehe tidah ya, “Waakh kola wihi goorat us yeelin gooche ka ma malmalo.
[7] Maanti herti Waakhe teebannaatteet arab sooafuufto, wihi dagsane Waakh isoobabbakkaahin, saggi us 'doo'di Waákh íyeyyeedo falfayyohiise icheeke on u, Waakh a buuhicha.”
[8] 'Deerka hooyi kootte an goobi Waakh ka daage toro ileeyeede, wihi us yidah, “Nyaame, khadaabaas yuubane furane dahanti Hertaas Waakhe bey ichoow harrati angagan katolosso kajiro kakhaat.”
[9] Anna 'deerka irde, hertaas Waakh khadaabaas rucchule yuuban daahe, iche la wihi iche itidah, “Khadaab khaate, aham. Khadaab af ka i'di malab u a chinni, i'daasenyi uur goyaka birrakhe yateeh.”
[10] Anna khadaabi rucchule yuuban dahanti herti Waakh kakhaate uhum. Khadaab la af ka i'di malab u a chinni. I'daasenyi inkoo an khorkhiche ka, uur goyaka birrakhnowe.
[11] 'Deerka wihi ani liidah, “Nyaam toro wori Waakhe 'doo'di fil ittaawe ichoow ilassi ittaawe ichoow afassi ittaawe ichoow karnatohi ittaawe miinsan cheek.”