[1] 'Deerka herti Waakh hawti 'dusso bicchehiche jiro lakeelo, bicchehiche weyti warraakhyahiin itusse. Hawta la komborti antoote Waakh ichoow Heleem leeyahiine katamiit.
[2] Hawta la jiti buurenye ilkerengeet dah kagoocho, iche tabta. 'Dollohiche lammache la geeyoo jiro lakeelo, gu'h ka gurnaan tomon ichoow lamma delo, hay ka delo, a katoolla. Seebi geeya la yaafo samaacha.
[3] Falohi Waakh kola ilkerengeet goya ma kijiraan. Komborti antoote Waakh ichoow Heleem leeyahiin ilkerengeet goya kajirta, falfayyohi Waakh la intaase Waakh ikahilaan.
[4] Icho la Waakh fooliis a argaane, magahi Waakh la miinassichooda lakachiira.
[5] Ilkerengeetta kola mug'di ma khabto. 'Doo'di goya kajiro la taa ma 'doono ommos banayhi orraheet ma 'doono. I'di tahe Kamuri Waakhe rubeytiissa banayhicho yateeh. 'Doo'da tuumman la jirtuu tuumman i'di karnatoot u walahe dakhta.
[6] Herta Waakh wihi iche ani itidah, “Yeedassa a wihi lakakhuufo, toro la a wihi rummaat. Kamuri Waakhenye Rubeyti Waakh 'doo'di Waákh íyeyyeedo siicho, ani laka a isooerge, 'dee wihi toolla yateeh ichoow wihi dowannoha ka sooyateeh, falfayyohiis tusa.”
[7] Yeesso wihi us essi kallaayo, “Nabah suda! An dowwanoha ka a amiit! Ani eti tuummane yeedassi buugga kachiirane eti Waákh íyeyyeedo chiire raaho a imaala.”
[8] Ani a Yoohana, anna waha tuumman a daage, toro la a arge. Inkoo an waha daage toro arge ka, herti Waakhe waha itusse orche ka jilbo il kagu'dde, wahan leheet!
[9] I'daasenyi herti Waakh wihi iche ani itidah, “Tabe i'daas ayeelin! Annaka i'di ilbooyyeti wahalhaahenye toro wahalhi 'doo'di Kiriisto rummeeste Waákh íyeyyeedo ichoow ki wihi buugga kachiiran raahuu, a falfa Yeesso on. Waakh on waho!”
[10] Herti Waakh toro wihi iche itidah, “Jeenteti ibeenki waha yateehiin isoodowwaatuu, yeedassi atihi Waakh iyeyyeeddo buugga kachiirte hanja akadaginne 'dee yeedassa a laargo.
[11] Eti khuf yeelo, khuf on a yeelo, ki soho'ddarri kijiro la, soho'ddarritaas on a kaassohti, eti wihi fissan yeelo la wihi fissan on a yeelo, ki munyee la orey a isohti munya a yitaahe.”
[12] Yeesso la toro wihi us yidah, “Nabah suda! An dowwanoha ka guunnaankeey khabaayi a amiit. Gunnaanka an ebba guto ichoow wihi icho goorat yeeleen ba a israahaan.
[13] Ani Uumaccheenye toro 'Da'ddabee, ani Oreyenye toro la Salaahime, an walah tuumman orcho a jire, toro walah tuumman 'dubicho a jira.”
[14] 'Doo'di Waakh imaalo, a ki kabuu'ddeticho dikho 'dee gurnaanki geeyi jiro laka'helo ohom mu'dane, toro la arto tabo ilkerengeetti ween gelo.
[15] I'daasenyi 'doo'di ilkerengeetta khariche kijiro, a ki isbi'dirroocho, 'doo'di tibaato khabo ichoow ki soho'ddarri kaassohti ichoow ki enenyet dubunuunu yagiis ichoow ki iyookkoyyohi waakkhakh lakayeessi wahti ichoow ki been 'doono toro kol dakkhan been goocho.
[16] “Anihi Yeessee herteeytoo a kisooerge, 'dee iche la wahanyeyyoha tuummane rummaat ururreteey icheekta. Ani a Hiiy ichoow weel weel Dawuude toro la a Bakkaali Baryo weyti ababo.”
[17] Rubeyti Waakh ichoow nyarnyaar ba wihi icho Yeesso idowaan, “Amiit!” Eti tuummane wora daage laka Yeesso, “Amiit!” a iyidaahe gi'de. Eti tuummane sugub khabo a yimaate. Eti tuummane 'doono la, biccheha jiro laka'helo i'daanu enenyet lasiicho a yubhaabe.
[18] Ani eti tuummane yeedassi buugga eti Waákh íyeyyeedo kijiro nabah isudo a tootoocha. Chi' etoo wohoo kakhayo, Waakh etaas sinayyohi yahame buugga kachiiran a ikakhaya.
[19] Chi' etoo buugga eti Waákh íyeyyeedo chiire yeedassoo kabahche la, Waakh rubeytiis etaas gisiiski gurnaanki geeyi jiro laka'helo a kakhaata toro ilkerengeetti weene lagan goya gelin a tirta. Wahanyeyyoha tuumman buugga ka a ladowdowe.
[20] Eti runti wahanyeyyoha cheeko mehe essa ya, “Aa, Dowannoha ka a amiit!” Aamiin. Yeessohi Kamure, dowwa amiit.
[21] Yeessohi Kamure ba 'doo'di Waakh tuumman imaala. Aamiin.