[1] Jesucristoq rikhurichiyninqa kaymi. Imakunachus usqhayllaman pasananta kamachinkunaman rikuchinanpaqmi, Diosqa payman qorqan. Angelninpa chawpinta, kamachin Juanman kachamuspanmi, Jesucristoqa kaykunata sut'incharqan.
[2] Juantaqmi, llapan rikusqankunamanta willakurqan. Chaykunaqa, Diospa simin, hinallataq Jesucristoq willakusqankunan kanku.
[3] Tiempoqa qayllallañan kashan. Chayraykun, kay profetisasqa simikunata ñawinchaqpas, uyariqkunapas, hinallataq chaypi qelqasqa kashaqkunata kasukuqkunapas kusisamiyoq kanku.
[4] Ñoqa Juanmi Asia probinsiapi kashaq qanchisnintin iñiq t'aqakunaman qelqamuykichis. Pichus kunan kashaqpas, pichus karqanpas, hinallataq pichus hamuq kaqpa partinmanta, allinpaq qokuypas, thak kaypas qankunawanpuni kachun. Hinallataq, qhapaq tiyananpa ñawpaqenpi kashaq qanchisnintin Espiritukunaq partinkumantawan chay allinpaq qokuypas, thak kaypas qankunawanpuni kachun.
[5] Hinallataq, Jesucristoq partinmantawan chay allinpaq qokuypas, thak kaypas qankunawanpuni kachun. Payqa hunt'aq uyanchaq, wañusqakunamantapas ñawpaq kaq kawsarimpuq, hinallaq hallp'a pachantinpi reykunaq munayniyoq kaqpunin. Paymi munakuwarqanchis, hinallataq huchanchiskunata yawarninwan maylliwarqanchis.
[6] Payllapunin, reykuna kananchispaq, hinallataq Yayan Diospa saserdotenkuna kananchispaqpas churawarqanchis. Payllamanpuni yupaychaypas, munaychakuq kaypas, wiñaymanta wiñaykama kachun. Ahinapuni kachun.
[7] Qelqaqa ninmi: ‘Qhawariychis, phuyo chawpipin hamunqa,’ nispa. (Dan. 7:13) Nillantaqmi: ‘Llapallan runakunan payta rikunqaku. Hinan kikin t'urpuqninkunapas rikullanqakutaq. Hallp'a pachantinpi runa-miray ayllukunataqmi, payta rikusqankurayku, khuyayta waqaykunqaku,’ nispa. (Zak. 12:1-11) ¡Arí, ahinapuni kachun!
[8] Señor Diosmi nin: ‘Ñoqan Alfapas, Omegapas, hinallataq qallariypas, tukukuypas kani. Pichus kunan kashaqpas, pichus karqanpas, hinallataq pichus hamuq kaqpas ñoqan kani. Tukuy atiyniyoqpas ñoqallapunitaqmi kani,’ nispa.
[9] Ñoqa Juanmi wawqeykichis kani. Ñoqan ñak'ariyniykichiskunapipas, qhapaq suyupipas, hinallataq Cristo Jesuspi takyayniykichispipas ñak'ariysikuqmasiykichis kani. Diospa siminrayku, hinallataq Jesucristomanta willakusqayraykun, Patmos islapi kasharqani.
[10] Señorpa p'unchayninpin, ñoqaqa Espiritupi kasharqani. Hinan qhepaypi huk kunkayoq korneta waqaqta hina uyarirqani.
[11] Chay kunkataqmi nimuwarqan: ―‘Ñoqan Alfapas, Omegapas, hinallataq ñawpaq kaqpas, qhepa kaqpas kani. Kay rikusqaykikunata, huk libropi qelqay, hinaspa qanchisnintin iñiq t'aqakunaman apachiy. Efesoman, Esmirnaman, Pergamoman, Tiatiraman, Sardisman, Filadelfiaman hinallataq Laodiseamanwan apachiy, nispa. (Dan. 7:13)
[12] Hinan rimapayamuqniypa kunkanta uyarinaypaq, qhepayta qhawarirqani. Qhawarispaytaq, qorimanta qanchis lámpara churanakunata rikurqani.
[13] Chay qanchis lámpara churanakuna chawpipitaqmi, huk runata, Runaq Churinta hinapuni rikurqani. Payqa, pampakama p'achawan p'acharusqan kasharqan. Qhasqontaqmi, qorimanta chumpiwan chumpirusqa kasharqan.
[14] Umanpas, chukchanpas, yuraq millma hina, hinallataq rit'i hinaraqmi yuraqllaña karqan. Ñawinkunataqmi, yawrashaq nina hina karqan.
[15] Chakinkunapas yawrashaq hornopi k'ancharishaq bronseman rikch'akuqmi karqan. Rimaynintaqmi, askhallaña mayu unuq qapariynin hinaraq karqan.
[16] Paña makinpitaqmi qanchis ch'askakunata hap'isharqan. Siminmantataqmi, iskay ladon afilasqa, ancha filo espada lloqsimusharqan. Uyantaqmi, allinta k'ancharimuq inti hinaraq karqan.
[17] Payta rikuruspaytaqmi, chakinman, wañusqa hinaraq, wikch'uykukurqani. Hinan payqa, ñoqaman paña makinta churaykuspa, niwarqan: ―Ama manchakuychu. Ñoqan ñawpaq kaqpas, qhepa kaqpas kani.
[18] Ñoqaqa kawsashanin. Wañusqan kasharqani. Qhawariytaq, ñoqaqa wiñay-wiñaypaqmi kawsashani. Ahinapuni kachun. Hinallataq ñoqan, wañuypa llabentapas, Hadespa llabentapas hap'ishani.
[19] Chay hinaqa, imakunatachus rikusqaykita, imakunachus kashasqanta, hinallataq chaykunamanta qhepaman imakunachus pasanantawan qelqay.
[20] Paña makiypi rikusqayki qanchis ch'askakunamanta, hinallataq qorimanta qanchis lámpara churanakunamanta, pakasqa yachay kaqkunaqa kaykunan kanku. Chay qanchis ch'askakunaqa, qanchisnintin iñiq t'aqakunaq angelninkunan kanku. Chay qanchis lámpara churanakunataqmi, qanchisnintin iñiq t'aqakuna kanku, nispan.