[1] Mama-qocha aqo patapi sayaykuqtiytaqmi, huk wak'a animalta mama-qochamanta lloqsimushaqta rikurqani. Chay wak'a animalqa, chunka waqrayoq, hinallataq qanchis umayoqmi karqan. Sapanka waqrantaqmi, qorimanta pilluyoqkama karqan. Chay umankunapitaqmi ichaqa, Diosta k'arakta k'amiq huk suti kasharqan.
[2] Chay rikusqay wak'a animalqa, leopardoman rikch'akuqmi karqan. Chakinkunapas ukukuq chakin hinan karqan. Simintaqmi leonpa simin hina karqan. Hinan dragonqa, atiynintawan, kamachikuq tiyanantawan, hatun kamachikuyniyoq kaynintawan ima payman qorqan.
[3] Hinan huk kaq umantaqa wañunanpaq hina k'irisqata rikurqani. Chay wañunanpaq hina k'irintaqmi ichaqa, qhaliyasqa kapurqan. Hinan hallp'a pachantinpiraq, chay wak'a animalta qatikuspanku, utirayarqanku.
[4] Dragontaqmi, wak'a animalman kamachikuyniyoq kayta qosqa karqan. Chayraykun runakunaqa, dragonta hatuncharqanku. Wak'a animaltapas hatunchallarqankutaq. Hinan nirqanku: ‘¿Pitaq kay wak'a animal hinari kanman? ¿Pitaq paypa kontranpi awqa tinkuy ruwaytari atinman?’ nispanku.
[5] Hinan, chay wak'a animalmanqa, hatunchakuy simikunata rimananpaq, hinallataq Diosta k'arakta k'aminanpaq atiy qosqa karqan. Chaymantapas, tawa chunka iskayniyoq killantinta, imachus ruwashasqanta ruwananpaq kamachikuyniyoq kay qosqa karqan.
[6] Hinan Diospa kontranpi k'arakta k'aminanpaq siminta kicharirqan. Hinallataqmi Diospa sutinpa kontranpiwan, Diospaq ruwasqa karpanpa kontranpiwan, hanaq pachapi tiyaqkunaq kontranpiwan ima k'arakta k'amirqan.
[7] Hinallataqmi, t'aqasqakunaq kontranpi hinalla awqa tinkuyta ruwaspa atipananpaq qosqa karqan. Hinan llapan ayllukunapipas, llaqtakunapipas, wak simi rimaykunapipas, suyukunapipas kamachikuyniyoq kay qosqa kallarqantaq.
[8] Hallp'a pachapi llapallan tiyaqkunataqmi, payta yupaycharqanku. Paykunaq sutinkun, Korderoq kawsay libronpi mana qelqasqachu kashan. Chay Korderon kay pachaq qallariyninmantapacharaq wañunanpuni karqan.
[9] Sichus pipas uyariq ninriyoq kan chayqa, uyarichun.
[10] Sichus pipas presota apanqa chayqa, paypas chay hina preso apasqallataqmi kanqa. Sichus pipas espadawan wañuchinqa chayqa, espadawan wañuchisqallataqmi kanan. T'aqasqakunaq pasiensiayoq kayninkupas, iñiyniyoq kayninkupas chaypunin.
[11] Chaymantataqmi, hallp'a pachamanta wichamushaq wak wak'a animalta rikurqani. Chay wak wak'a animalqa, borregoq waqrankuna hina, iskay waqrakunayoqmi karqan. Huk dragón hinataqmi rimarqanpas.
[12] Payqa, ñawpaq kaq wak'a animalpa ñawpaqenpipas, tukuy kamachikuyniyoq kaywan ruwaynintaqa kasqallantataqmi ruwasharqan. Chaytaqa, hallp'a pachapiwan, chaypi tiyaq runakunapiwan, wañunanpaq hina kaq k'irin qhaliyachisqa, ñawpaq kaq wak'a animalta hatunchanankupaqmi kamachikurqan.
[13] Hatun señalkunata ruwaspantaqmi, hanaq pachamanta hallp'a pachaman, runakunaq ñawpaqenpi ninataraq uraykachimun.
[14] Paymanmi, ñawpaq kaq wak'a animalpa ñawpaqenpi señalkunata ruwananpaq atiy qosqa karqan. Chay señalkuna ruwasqanwantaqmi, hallp'a pachapi tiyaq runakunata q'otun. Payllataqmi, ñawpaq kaq wak'a animal allinpaq qhawarisqa kananpaq, paypa rikch'ayninta hallp'a pachapi tiyaq runakuna ruwanankupaq kamachikurqan. Chay ñawpaq kaq wak'a animalqa, espadawan k'irisqa kasqanmanta kawsarirampuqmi karqan.
[15] Hinan, ñawpaq kaq wak'a animalpa rikch'ayninman kawsay samay qonanpaq, chay iskay kaq wak'a animalman atiy qosqa karqan. Chay hinapin, chay ñawpaq kaq wak'a animalpa rikch'ayninqa rimayta atirqan. Hinallataq, paypa rikch'ayninta mana yupaychaqkuna wañuchisqa kanankupaq chay iskay kaq wak'a animalqa kamachikurqan.
[16] Payllataqmi llapa runakuna, huch'uykunapas, hatunkunapas, qhapaqkunapas, wakchakunapas, kamachikunapas, mana kamachikunapas, paña makinpi, otaq mat'inpi huk markata churachikunankupaq kamachikurqan.
[17] Manataqmi mayqenpas, rantiytapas, bendeytapas atirqankuchu. Aswanpas markasqa kaqkunallan atirqanku. Huk niypiqa, ñawpaq kaq wak'a animalpa sutin markayoq, otaq sutinpa yupaynin markayoq kaqkunallan rantiytapas, bendiytapas atirqanku.
[18] Kaypin yachayqa kashan: Pipas yuyayniyoqqa, ñawpaq kaq wak'a animalpa yupayninta yupachun. Chay yupayqa huk runaq yupayninmi. Chay yupayqa soqta pachak soqta chunkan soqtayoqmi.