[1] Hinan huk angelta hanaq pachamanta uraykamushaqta rikurqani. Paymi chinkay-chinkay ukhu pachaq llabentawan, huk ancha hatun kadenatawan makinpi hap'isharqan.
[2] Hinan chay angelqa, dragonta hap'ispan, waranqa watapaq watarqan. Chay dragonqa ñawpa mach'aqway, saqra, hinallataq Satanasmi.
[3] Hinan waranqa wata hunt'akunankama, manaña suyukunata q'otushananpaq, chinkay-chinkay ukhu pachaman wikch'uykuspa wisq'aykurqan. Sellowantaqmi selluykurqan. Chay waranqa wata hunt'akuqtintaqmi, huk pisi tiempollapaq kacharisqapuni kanan kanqa.
[4] Hinan kamachikuq tiyanakunata rikurqani. Chay tiyanakunapitaqmi, chaninchanankupaq qosqa kaqkuna tiyaykurqanku. Hinallataqmi, Jesusmanta willakusqankurayku, Diospa siminraykupiwan umanku qhorusqa kaqkunaq almankutapas rikullarqanitaq. Paykunaqa, wak'a animaltapas, rikch'aynintapas manan hatunchasqakuchu karqan. Manallataqmi mat'inkupipas, makinkupipas wak'a animalpa markantaqa chaskisqakuchu karqan. Paykunan kawsarimpuspa, Cristowan kuska waranqa watata kamachikurqanku.
[5] Chayqa, ñawpaq kaq kawsarimpuymi. Wakin wañusqakunataqmi ichaqa, waranqa wata hunt'akunankama mana kawsarimpurqankuchu.
[6] Pikunachus ñawpaq kaq kawsarimpuypi kawsarimpuqkunaqa kusisamiyoqmi, hinallataq ch'uyapunin kanku. Iskay kaq wañuyqa manan paykunamanta munaychakunqañachu. Aswanmi Diospa, hinallataq Cristoq saserdotenkuna kanqaku. Hinaspataq Cristowan kuska waranqa watata kamachikunqaku.
[7] Chay waranqa wata hunt'akuqtintaqmi, Satanasqa preso kasqanmanta kacharisqa kanqa.
[8] Hinan hallp'a pachaq tawantin k'uchunkunapi kashaq suyukunata q'otunanpaq lloqsinqa. Chay Gog, hinallataq Magog suyukunatataqmi, awqa tinkuypaq huñumunqa. Paykunaq yupayninkuqa mama-qochapi aqo t'io hinaraqmi.
[9] Hallp'a pachaq tukuy muyuriqninmanta lloqsimuspankutaqmi, t'aqasqakunaq kampamentonta, hinallataq Diospa munakusqan llaqtata muyuykurqanku. Hinan Diospa ninan hanaq pachamanta uraykamuspa paykunata rupharapurqan.
[10] Chay q'otuqninku saqrataqmi asufriyoq nina qochaman wikch'uykusqa karqan. Chaypitaqmi wak'a animalpas, falso profetapas kasharqanku. Hinan tutantin, p'unchaynintin wiñaywiñaypaq ñak'arichisqa kanqaku.
[11] Hinaqtinmi huk ancha hatun yuraq kamachikuq tiyanata, hinallataq chaypi tiyashaqtapas rikurqani. Hinan paypa ñawpaqenmanta hallp'a pachapas, hanaq pachapas ayqekurqanku. Manataqmi paykunapaqqa may cheqaspas tarikurqanñachu.
[12] Hinan wañusqa kaqkunataqa, hatunkunatapas, huch'uykunatapas, Diospa ñawpaqenpi sayashaqta rikullarqanitaq. Librokunataqmi kicharisqa karqanku. Hinallataqmi wak libropas kicharisqa kallarqantaq. Chay libroqa, kawsay libron karqan. Hinan wañusqa kaqkunaqa, librokunapi ruwasqanku qelqasqa kasqanman hina chaninchasqa karqanku.
[13] Mama-qochataqmi, paypi wañusqa kaqkunata qopurqan. Hinallataqmi wañuypas, Hadespas paykunapi wañusqa kashaqkunata qopurqanku. Hinan sapanka hukninkupas imakunachus ruwasqankuman hina chaninchasqa karqanku.
[14] Wañuypas, Hadespas nina qochaman wikch'uykusqan karqanku. Chay nina qochaqa, iskay kaq wañuymi.
[15] Chay kawsay libropi mana qelqasqa kaqkunataqmi, nina qochaman wikch'uykusqa karqanku.