[1] Hinan wak kallpasapa angeltapas rikurqani. Chay angelqa, phuyuwan p'istuykusqan hanaq pachamanta uraykamusharqan. K'uychitaqmi, uman patapi kasharqan. Uyanqa inti hinan karqan. Chakinkunataqmi nina sayaykuq hina karqan.
[2] Makinpitaqmi, huk kicharisqa qelqa k'uyuchata hap'isharqan. Paña chakinqa, mama-qochaq patanpin sayaykurqan. Lloq'e chakintaqmi, hallp'a patapi sayaykurqan.
[3] Hinan ancha kunkayoqtapuni, imaynan leonpas qaparin, chay hinataraq qaparirqan. Qapariqtintaqmi, qanchisnintin pacha t'oqyaykunaraq t'oqyarqan.
[4] Qanchisnintin pacha t'oqyaykuna t'oqyaqtintaqmi, ñoqaqa qelqanaypaqña kasharqani. Ichaqa hanaq pachamantan huk kunkata uyarirqani. Chay kunkataqmi nimuwarqan: ‘Qanchisnintin pacha t'oqyaykuna t'oqyasqankunata sellowan selloy. Amataq qelqaychu,’ nispan.
[5] Chay mama-qochaq patanpiwan, hallp'a patapiwan chakinkuna sarushaq rikusqay angeltaqmi, paña makinta hanaq pachaman haywarirqan.
[6] Hinan wiñay-wiñaypaqpuni kawsaqpa sutinpi hurarqan. Chay kawsaqmi hanaq pachata, hinallataq imakunachus chaypi kashaqkunatapas kamarqan. Paymi hallp'a pachata, hinallataq imakunachus chaypi kashaqkunatapas kamarqan. Payllataqmi mama-qochata, hinallataq imakunachus chaypi kashaqkunatapas kamallarqantaq. Paypa sutinpin angelqa huraspa nirqan: ‘Manañan aswantapas tiempoqa kanñachu.
[7] Aswanpas, qanchis kaq angelpa qaparinan p'unchaykunapin, chay qanchis kaq angelqa kornetanta tokananpaqña kashanqa. Hinan chay p'unchaykunallapi, Diospa pakasqa yachayninqa tukupapusqa kanqa. Diospa rantinpi rimaq kamachinkunaman willasqanman hinataqmi, tukupapusqa kanqa,’ nispa.
[8] Hanaq pachamanta uyarisqay kunkataqmi, wakmanta ñoqata rimaykamuwarqan. Nimuwarqantaq: ‘Mama-qocha patapiwan, hallp'a patapiwan sayashaq angelpa kasqanman rispayki, kicharisqaña kashaq qelqa k'uyuchata makinmanta chaskimuy,’ nispan.
[9] Hinan angelman rispay, payta nirqani: ‘Chay qelqa k'uyuchata qoway,’ nispay. Paytaqmi niwarqan: ‘Hap'ispayki, mikhurqoy. Hinan wiksaykipi hayasunki, simiykipitaqmi ichaqa, miel hina misk'i kanqa,’ nispa.
[10] Hinan chay qelqa k'uyuchata angelpa makinmanta chaskispay mikhurqani. Simiypiqa miel hinaraqmi misk'illaña karqan. Millp'uruqtiytaqmi ichaqa, wiksaypi hayawarqan.
[11] Hinan angelqa niwarqan: ‘Yapamantan, askha llaqtakunamanpas, suyukunamanpas, wak simi rimaypi rimaqkunamanpas, reykunamanpas profetisanaykipuni kashan,’ nispan.