[1] Hinan kamachikuq tiyanapi tiyashaqpa paña makinpi, huk qelqa k'uyuta rikurqani. Chay qelqa k'uyuqa, ukhunpipas, patanpipas qelqasqa, hinallataq qanchis sellokunawan selluykusqan kasharqan.
[2] Hinallamanmi, huk kallpasapa angelta kunkayoqta waqyakushaqta rikurqani. Nisharqantaq: ¿Pitaq kay qelqa k'uyuta kicharinanpaq, hinallataq sellonkunatapas kicharinanpaq hinari kanman? nispan.
[3] Manataqmi pipas, hanaq pachapipas, nitaq hallp'a pachapipas, nitaq ukhu pachapipas, chay qelqa k'uyuta kichariytaqa atirqanchu. Nitaq qhawariyllatapas atirqanchu.
[4] Hinaqa, manan pillapas chay qelqa k'uyuta kicharinanpaq hinaqa tarikurqanchu. Nitaqmi ñawinchananpaq, nillataq qhawarinanpaq hinapas tarikullarqantaqchu. Chayraykun ñoqaqa anchatapuni waqarqani.
[5] Hinan chay umalliq kurak runakunamanta hukninqa nimuwarqan: Ama waqaychu. Qhawariy, Judá ayllumanta Leonqa kaypin kashan. Payqa Davidpa mirayninmi. Payllataqmi qelqa k'uyuta kicharinanpaq, hinallataq qanchisnintin sellonkunatapas kicharinanpaqqa atiparqan, nispan.
[6] Chayllamanmi, chay kamachikuq tiyanaq, tawantin kawsashaqkunaq, hinallataq umalliq kurak runakunaq chawpinkupi, sayashaq huk Korderota rikurqani. Chay Korderoqa, nak'as- qapas kashanman hinan kasharqan. Chay Korderotaqmi, qanchis waqrakunayoq, hinallataq qanchis ñawikunayoq karqan. Chay qanchisnintin ñawinkunaqa, tukuy kay pachantinman kamachisqa Diospa qanchisnintin Espiritunkunan kanku.
[7] Chay Korderotaqmi, kamachikuq tiyanapi tiyashaqpa kasqanman rispa, paña makinmanta qelqa k'uyuta chaskirqan.
[8] Chay qelqa k'uyuta chaskiykuqtintaqmi, tawantin kawsashaqkuna, hinallataq iskay chunka tawayoq umalliq kurak runakunapas, Korderoq ñawpaqenpi qonqoriykukurqanku. Sapankankutaqmi arpayoqkama, hinallataq insiensowan hunt'aykusqa qorimanta p'ukuyoqkama kasharqanku. Chay insiensoqa, t'aqasqakunaq Diosman parlayninkun kanku.
[9] Paykunaqa, huk mosoq takitan kay hinata takisharqanku: ‘Wañuchisqan karqanki. Llapa runakunatataqmi, tukuy ayllukunamantapas, wak simi rimaypi rimaqkunamantapas, llaqtakunamantapas, hinallataq suyukunamantapas, yawarniykiwan Diospaq rantipapuwarqankiku. Chaymi, qanqa, chay qelqa k'uyuta chaskinaykipaq, hinallataq sellonkunata kicharinaykipaq hinapuni kanki.
[10] Qanmi ñoqaykuta reykuna kanaykupaq, hinallataq Diosniykuq saserdotenkuna kanaykupaqpas churawarqankiku. Hinan hallp'a pachapi kamachikusaqku,’ nispanku.
[11] Kamachikuq tiyanaq, kawsashaqkunaq, hinallataq umalliq kurak runakunaq muyuriqninkuta qhawarispaytaqmi, askha angelkunaq kunkanta uyarirqani. Paykunaqa, mana yupay atiy ancha wara-waranqaraqmi karqanku.
[12] Hinan ancha kunkayoqtapuni nisharqanku: ‘Wañuchisqa kaq Korderoqa, atiytapas, qhapaq kaytapas, yachayniyoq kaytapas, kallpasapa kaytapas, allinpaq qhawarisqa kaytapas, hatunchaytapas, hinallataq yupaychaytapas chaskinanpaq hinapunin,’ nispanku.
[13] Hinallataqmi, llapallan hanaq pachapi kaqkunata, hallp'a pachapi kaqkunata, hallp'aq ukhun pachapi kaqkunata, mamaqochapi kaqkunata, hinallataq tukuy chaykunapi kamasqan kaqkunatapas uyarirqani. Nisharqankutaqmi: ‘Kamachikuq tiyanapi tiyashaqman, hinallataq Korderoman yupaychaypas, allinpaq qhawariypas, hatunchaypas, munaychakuq kaypas wiñaymanta wiñaykama paykunallamanpuni kachun,’ nispanku.
[14] Tawantin kawsashaqkunataqmi nisharqanku: ‘Ahinapuni kachun,’ nispanku. Iskay chunka tawayoq umalliq kurak runakunataqmi, pampakama k'umuykukuspa, wiñaymanta wiñaykama kawsaqta yupaychasharqanku.