[1] Qanchis kaq sellosqata kichariqtintaqmi, hanaq pachapi yaqapas kuskan orata hinapuni ch'inyay karqan.
[2] Diospa ñawpaqenpitaqmi, qanchisnintin angelkunata sayashaqta rikurqani. Hinan qanchis kornetakunapas paykunaman qosqa karqan.
[3] Wak angeltaqmi hamuspa, altarpa ñawpaqenpi sayaykurqan. Paypataqmi, qorimanta huk insienso q'oshñichinan kapurqan. Hinan llapallan t'aqasqakunaq Diosman parlayninkunawan kuska chayananpaq, ancha askha insienso payman qosqa karqan. Chay insiensotataqmi, kamachikuq tiyanaq ñawpaqenpi kashaq qorimanta altarpa patanpi haywarqan.
[4] Hinan, insiensoq q'oshñinqa, ch'uyanchasqakunaq Diosman parlayninkupiwan kuska, angelpa makinmanta Diospa ñawpaqenman wicharirqan.
[5] Angeltaqmi, insienso q'oshñichinata hap'ispan, altarpa ninanwan hunt'achirqan. Hinan hallp'a pachaman wikch'uykurqan. Hinaspataq pacha t'oqyaykuna, kunununuykuna, rayo lliphllikiykuna, hinallataq huk pacha chhaphchikuy karqan.
[6] Kornetakunayoqkama kashaq qanchis angelkunataqmi, chay qanchis kornetakunata tokanankupaq wakichikurqanku.
[7] Ñawpaq kaq angelmi kornetanta tokamurqan. Hinan chikchipas, ninapas yawarwan chhaqrusqa hallp'a pachaman hich'aykamusqa karqan. Hinaqtinmi, mallkikunaq kinsa kaq partinta ruphapurqan. Hinallataq llapan q'omer qorakunatapas ruphapurqan.
[8] Iskay kaq angelñataqmi, kornetanta tokamurqan. Hinan nina yawrashaq huk ancha hatun orqo hinaraq, mama-qochaman wikch'uykusqa karqan. Hinaqtinmi, mama-qochaq kinsa kaq partinqa yawarman tukupurqan.
[9] Hinan mama-qochapi kashaq kawsaqkunamanta, kinsa kaq partin wañupurqan. Hinallataq barkokunamantapas kinsa kaq partin chhallusqa kapurqan.
[10] Kinsa kaq angelñataqmi, kornetanta tokamurqan. Hinan hanaq pachamanta, huk antorcha hinaraq yawrashaq ancha hatun ch'aska, mayukunaq kinsa kaq partinman urmaykamurqan. Hinallataq pukyukunamanpas urmaykamullarqantaq.
[11] Chay ch'askaq sutintaqmi Ajenjo nisqa karqan. Hinaqtinmi unukunamanta kinsa kaq partinqa ajenjoman tukupurqan. Chay unuq sinchi hayaman tukupusqan hawataqmi, askha runakuna wañupurqanku.
[12] Tawa kaq angelñataqmi kornetanta tokamurqan. Hinan intiq kinsa kaq partin, killaqpas kinsa kaq partin, hinallataq ch'askakunaqpas kinsa kaq partin k'irisqa karqan. Chay hinapin, intiqpas, killaqpas, ch'askakunaqpas kinsa kaq partinkama tutayapurqan. Hinan p'unchaypas, tutapas kinsa kaq partin mana k'anchayniyoq karqan.
[13] Hinan qhawarispayqa, chawpi hanaq pachanta huk ángel phalashaqta uyarirqani. Ancha kunkayoqtapunitaqmi kay hinata nirqan: ‘¡Kinsa angelkunaraqmi kornetankuta tokamunankupaqña kashanku! Chayrayku, ¡ay, ay, ay, hallp'a pachantinpi tiyaqkunamanta, imaynaraqmi kanqaku!’ nispan.