[1] Chaykuna qhepatataqmi, hallp'a pachaq tawantin k'uchunkunapi sayashaq tawa angelkunata rikurqani. Hinan mana hallp'a pachamanpas, nitaq mama-qochamanpas, nillataq mayqen mallkimanpas wayramunanpaq, tawantin ladomanta wayrata hark'asharqanku.
[2] Hinallataqmi inti lloqsimuy ladomanta, kawsaq Diospa sellontin lloqsimushaq wak angeltapas rikullarqanitaq. Hinan hallp'a pachatawan, mama-qochatawan mana allinta ruwanankupaq atiy qosqa kaq tawantin angelkunata ancha kunkayoqtapuni waqyamurqan.
[3] Nimurqantaq: ‘Diosninchispa kamachinkunaq mat'inkupi sellowan sellonaykukama, amaraq hallp'a pachatapas, nitaq mama-qochatapas, nillataq mallkikunatapas imanaychispasraqchu,’ nispan.
[4] Hinan sellosqa kaqkunaq yupayninqa, pachak tawa chunkan tawayoq waranqa kasqanta uyarirqani. Paykunaqa, Israelpa wawankunaq sapanka ayllunkunamanta sellosqa kaqkunan karqanku.
[5] Sellosqa kaqkunataqmi kaykuna: Judá ayllumantan, chunka iskayniyoq waranqa sellosqakuna karqanku. Rubén ayllumantan, chunka iskayniyoq waranqa sellosqakuna karqanku. Gad ayllumantan, chunka iskayniyoq waranqa sellosqakuna karqanku.
[6] Aser ayllumantan, chunka iskayniyoq waranqa sellosqakuna karqanku. Neftalí ayllumantan, chunka iskayniyoq waranqa sellosqakuna karqanku. Manasés ayllumantan, chunka iskayniyoq waranqa sellosqakuna karqanku.
[7] Simeón ayllumantan, chunka iskayniyoq waranqa sellosqakuna karqanku. Leví ayllumantan, chunka iskayniyoq waranqa sellosqakuna karqanku. Isakar ayllumantan, chunka iskayniyoq waranqa sellosqakuna karqanku.
[8] Zabulón ayllumantan, chunka iskayniyoq waranqa sellosqakuna karqanku. José ayllumantan, chunka iskayniyoq waranqa sellosqakuna karqanku. Benjamín ayllumantan, chunka iskayniyoq waranqa sellosqakuna kallarqankutaq.
[9] Chaykuna qhepatataqmi qhawarirqani. Hinan chayllaman, llapan suyukunamantapas, ayllukunamantapas, llaqtakunamantapas, wak simipi rimaqkunamantapas, ancha askhallaña runakunata rikurqani. Manataqmi pipas paykunata yupaytaqa atirqankuchu. Paykunaqa, kamachikuq tiyanaq ñawpaqenpi, hinallataq Korderoq ñawpaqenpipas, pampakama yuraq p'achawan p'acharusqan sayasharqanku. Makinkupitaqmi, palmera k'allmakunata hap'isharqanku.
[10] Ancha kunkayoqtapunitaqmi qaparirqanku. Nirqankutaq: ‘Kamachikuq tiyanapi tiyashaq Diosninchismantawan, Korderomantawanmi qespikuyqa hamun,’ nispanku.
[11] Kamachikuq tiyanaq, umalliq kurak runakunaq, hinallataq tawantin kawsashaqkunaq muyuriqninkupitaqmi, llapan angelkunaqa sayasharqanku. Hinan kamachikuq tiyanaq ñawpaqenpi pampakama k'umuykukuspanku, Diosta hatunchasharqanku.
[12] Nirqankutaq: ‘¡Ahinapuni kachun! Yupaychaypas, k'anchariypas, yachaypas, grasiasta qoypas, hatunchaypas, atiypas, kallpasapa kaypas, wiñaymanta wiñaykama Diosnillanchismanpuni kachun. Ahinapuni kachun,’ nispanku.
[13] Umalliq kurak runakunamanta huknintaqmi tapuwarqan. Niwarqantaq: ―‘¿Chay pampakama yuraq p'achawan p'acharusqa kashaqkunari, pikunataq kanku? ¿Maymantataq hamurqankuri?’ nispa.
[14] Hinan ñoqaqa payman kutichirqani: ―Señornillay, chaytaqa qanmi yachanki, nispay. Paytaq niwarqan: ―Paykunaqa, sinchi hatun ñak'ariymanta lloqsimuqkunan kanku. Pampakama p'achankuta t'aqsaspankutaqmi, Korderoq yawarninpi yuraqyachirqanku.
[15] Chayraykun paykunaqa, Diospa kamachikuq tiyananpa ñawpaqenpi kashanku. Hinan tutantin p'unchaynintin Dios yupaychana wasinpi payta serbishanku. Kamachikuq tiyanapi tiyashaqtaqmi paypaq ruwasqa karpanta paykunaman mast'arinqa.
[16] Paykunaqa, manañan hayk'aqpas yarqachikunqakuñachu, nitaq ch'akichikunqakupasñachu. Manañataqmi hayk'aqpas intipas, nitaq ima ruphayaypas paykunamanqa chayamunqañachu.
[17] Kamachikuq tiyana chawpipi kashaq Korderotaqmi paykunataqa michinqa. Hinallataq kawsachikuq unu pukyumanpas pusanqa. Diostaqmi ñawinkumanta tukuy weqetapas pichanqa,’ nispa.