[1] Ñoqa Judasmi, Jesucristoq kamachin, hinallataq Jakoboq wawqen kani. Hinan qankuna Dios Yayaq ch'uyanchasqankunamanwan, Jesucristoq waqaychasqankunamanwan, waqyasqankunamanwan ima qelqamuykichis.
[2] Qankunapaqyá yanapaykuypas, thak kaypas, munakuypas ancha askhayachisqapuni kachun.
[3] Munakusqaykuna, mayta kallpachakuspaymi, llapallanchispa qespikuyninchismantaqa qelqamurqaykichis. T'aqasqakunaman hukpaqkama hap'ichisqa iñiyrayku, allin qaqatapuni sayanaykichispaq qelqamuyniyqa nesesariopunin kawarqan. Kaytaqa kallpanchanaypaqmi qelqamushaykichis.
[4] Wakin runakunaqa, mana reparachikuq hinallan haykumunku. Paykunaqa ñawpaqmantapacharaqmi kay huchachaypaq unanchasqaña karqanku. Mana Diosniyoq runakuna kaspankun, Diosninchispa allinpaq qokuyninta kacharisqa millay kawsayman, tukuchinku. Hinallataq sapallan munayniyoq Dios Señorninchis Jesucristotapas mananchanku.
[5] Llapantapas ñan allintaña yacharqankichis. Kunantaq ichaqa, yuyarichiyllataña munashaykichis. Señorqa Egipto suyumantan llaqtanta horqomurqan. Chaymantataqmi mana iñiqkunataqa, mana iñisqankurayku wañuchipurqan.
[6] Hinallataqmi, ñawpaq ch'uya kayninkuta mana waqaychaq angelkunapas kikinkuq tiyanankuta saqechipurqan. Hinan paykunata wiñaypaq kadenasqata, tutayaq ukhuman hatun taripay p'unchaykama Diosqa waqaycharqan.
[7] Chay hinallatataqmi, Sodoma llaqtapas, Gomorra llaqtapas, hinallataq qayllanpi kaq llaqtakunapas, paykuna hina qhellipi purirqanku. Hinallataq aycha kuerpoq mana ruwanan kaq millay munasqankunata qatichikurqanku. Diostaqmi paykunataqa ejemplo kanankupaq churarqan. Paykunan wiñay nina yawray ñak'ariypi muchunqaku.
[8] Chay hinallatataqmi, chay mosqhokuqkunapas, aycha kuerponkuta qhellichanku, kamachikuyniyoqkunata pisichanku. Hinallataq, k'ancharishaq kaqkunatapas k'araktan k'aminku.
[9] Ichaqa arkángel Miguelpas, Moisespa kuerponhawa saqrawan churanakushaspanqa, manapunin paypa kontranpi ch'ulla ñakay simillatapas rimarirqanchu. Aswanpas nillarqanmi: ‘Qantaqa Señorllapuni phiñarikusunki,’ nispan.
[10] Paykunataqmi ichaqa, mana reqsisqankuta k'arakta k'aminku. Hinaspan mana yuyaykuq uywa hina, imachus reparasqankuman pantaykapunku.
[11] Kaínpa ñannintan qatikurqanku. Balaampa pantayninmanmi qolqerayku aysaykachikurqanku. Hinallataqmi Koré hina, sinchi mana kasukuq kayninkupi, chinkaripurqanku. Chayrayku, ¡ay, paykunamanta imaynaraq kanqa!
[12] Paykunaqa, wawqe-panantin hina mikhuyniykichiskunapipas qhellichaqkunan kanku. Qankunawan kuskataqmi mana p'enqakuspa mikhushanku. Paykunaqa, kikillankutan michikunku. Hinallataq mana unuyoq phuyo hinan, kayman, haqayman wayraq apaykachasqan kanku. Ch'akiriy tiempopi ch'akisqa mallki hinan, mana ruruyoq, iskay kutikama wañusqa, hinallataq t'irarparisqa kanku.
[13] Imaynan mama qocha mancharikuyta phoqchispa phosoqota wikch'un, chay hinataraqmi, paykunapas p'enqay ruwaykunata ruwashanku. Paykunaqa, phawaykachaq ch'askakuna hinan kanku. Paykunapaqmi wiñaywiñaypaq manchay laqha-tutayaq ukhu pacha waqaychasqa kashan.
[14] Paykunallamantataqmi, Adanmantapacha runa-miraypi qanchis kaq Enokpas profetisarqanña. Nirqantaq: ‘Qhawariy, Señormi mana yupay atiy t'aqasqankunawan hamushan.
[15] Llapallan millay runakunata chaninchananpaq, hinallataq tukuy millay huchata mana Diosniyoq kaspa tukuy ruwasqankumanta huchachananpaqwanmi hamushan. Mana Diosniyoq kaspa, Señorpa kontranpi k'arak k'amiykunata huchasapakunaq rimasqankumantawan, llapa runata huchachananpaqwanmi hamushan,’ nispa.
[16] Chay runakunaqa, tukuymantan kihakunku, hinallataq tukuymantan mana allinta rimanku. Paykuna kikinkuq mana allin munasqallankupitaqmi purinkupas. Siminkuwanpas misk'i rimaykunataraqmi runakunaman rimaykachanku. Chay hinapin, chay runakunamanta kikinkuq allinninkupaq imaymanakunatapas horqonku.
[17] Qankuna ichaqa munakusqaykuna, Señorninchis Jesucristoq apostolninkunaq ñawpaqtaraq rimaykusqan simikunata yuyariychis.
[18] Paykunaqa, kay hinatan rimaykurqasunkichis: ‘Qhepa tiempokunapin, asipayakuqkuna kanqaku. Paykunaqa, mana Diosniyoq runakuna kaspankun, kikinkuq mana allin munapakuyninkuman hina purinqaku,’ nispanku.
[19] Chay runakunaqa, t'aqanachiy hatarichiqkunan kanku. Kay pachaman hina kawsaqkunan kanku. Hinallataqmi Espiritupas, mana paykunapiqa kanchu.
[20] Qankunan ichaqa, munakusqaykuna, ch'uyallaña iñiynillaykichispipuni wiñashaychis. Hinallataq Santo Espiritupipas Diosman parlashallaychispuni.
[21] Wiñay kawsanaykichispaqqa, Señorninchis Jesucristoq yanapakuyninta suyakuspallapuni Diospa munakuyninpi takyashaychis.
[22] Wakin iskayaqkunatataq, allin yuyaywan yanapaykullaychispuni.
[23] Wakinkunatataq ichaqa, aycha kuerponkuwan qhellichasqa p'achankuta cheqnikuspaykichis, manchakuywan ninamanta qechuspa qespichiychis.
[24] Diosqa mana urmasqata waqaychanasunkichispaqpas atiyniyoqmi. Hinallataq hatun kusikuywan, mana imamanta huchachanata, paypa hatun k'ancharishaq ñawpaqenpi sayaykuchinasunkichispaqpas payqa atiynillayoqtaqmi.
[25] Sapallan yachaysapa Qespichiqninchis Diosllamanpuni yupaychaypas, hatun atiywan kamachikuypas, kamachikuyniyoq kaypas, atiyniyoq kaypas, kunanpas hinallataq wiñay-wiñaypaqpas kachun. Ahinapuni kachun.