[1] Hinaqtinmi tupuna baraman rikch'akuq huk soqosqa qosqa kawarqan. Angeltaqmi niwarqan: ‘Sayariy, hinaspa Diospa yupaychana wasintawan, altartawan tupumuy. Hinallataq chaypi yupaychaqkunatapas yupamullaytaq.
[2] Dios yupaychana wasiq hawa pationtataq ichaqa, hinallata saqerparinki. Amataq tupunkiñachu. Chay patioqa, mana-judío runakunaman qosqan karqan. Paykunan ch'uya llaqtata tawa chunka iskayniyoq killata sarunchanqaku.
[3] Ñoqataqmi, iskay testigoykunata kachamusaq. Paykunan luto p'achawan p'acharukuspa, waranqa iskay pachak soqta chunkan p'unchayta profetisanqaku,’ nispa.
[4] Chay testigokunan, iskaynin olibokunapas, iskaynin lámpara churanakunapas kanku. Paykunallataqmi hallp'a pachaq Diosninpa ñawpaqenpi sayashanku.
[5] Ichaqa, sichus pipas paykunata k'iriyta munanqa chayqa, siminkumanta nina lloqsimuspanmi, awqankunata ruphaspa chinkarachipunqa. Hinallataq pipas paykunata k'iriyta munanqa chayqa, chay hinallatataqmi wañuchisqapuni kananku.
[6] Paykunaqa profetisananku p'unchaykaman, mana parananpaq hanaq pachata wisq'anankupaq atiyniyoq kanku. Hinallataq hayk'a kutintachus munanku chaykama, unutapas yawarman tukurachinankupaq, hinallataq llapan imaymana plagakunawan hallp'a pachantinta muchuchinankupaqpas atiyniyoq kanku.
[7] Willakuyta tukuruqtinku hinataqmi, chinkay-chinkay ukhu pachamanta lloqsimuq wak'a animalqa chay willakuqkunaq kontranpi awqa tinkuyta ruwanqa. Hinan paykunata atipaspa wañuchinqa.
[8] Chay willaqkunaq ayankutaqmi, hatun llaqtaq plasanpi wikch'usqa kashanqaku. Chay hatun llaqtaqa, espiritual rimaypi Sodoma, hinallataq Egipto nisqa sutiyoqmi. Chay llaqtallapitaqmi, Señorninchispas chakatasqa karqan.
[9] Hinan llaqtakunamanta, ayllukunamanta, wak simi rimaypi rimaqkunamanta, hinallataq suyukunamanta, runakunaqa kinsa p'unchay phasminta chay willaqkunaq ayankuta qhawanqaku. Manataqmi ayanku p'ampasqa kanantapas munanqakuchu.
[10] Chay iskaynin Diospa rantinpi rimaqkunaqa, hallp'a pachapi tiyaqkunaq sinchita manchachiqninkun kasqa karqan. Chayraykun, hallp'a pachapi tiyaqkunaqa, wañuchisqa kasqankumanta anchatapuni kusikunqaku, hinallataq q'ochukunqaku. Hinan, hukkuna-hukkunawan regalokunata apachinakunqaku.
[11] Kinsa p'unchay phasminmantataqmi, Diospa kachamusqan kawsay samay paykunaman haykurqan. Hinan kawsarispa sayariruqtinku qhawaqkunaqa sinchitapuni mancharikurqanku.
[12] Hanaq pachamanta nimuqninku huk ancha kunkayoqtataqmi uyarirqanku. Chay kunkataqmi nimurqan: ‘¡Kayman wichamuychis!’ nispa. Hinan phuyu chawpipi hanaq pachaman wicharipurqanku. Awqankunataqmi paykunata rikusharqanku.
[13] Chay orasllapitaqmi, huk hatun pacha chhaphchikuy karqan. Hinan llaqtamanta chunka kaq partin thunikurqan. Chay pacha chhaphchikuyhawataqmi, qanchis waranqa runakuna wañupurqanku. Wakinkunataqmi mancharikuspa, hanaq pacha Diosta yupaycharqanku.
[14] Iskay kaq ay pasaruqtinqa, qhawariy, kinsa kaq ayñataqmi usqhayllaman hamushan.
[15] Qanchis kaq angelñataqmi kornetanta tokamurqan. Hinan hanaq pachapi kunkayoqkunatapuni uyarikurqan. Chay kunkakunaqa nimurqanmi: ‘Kay pacha qhapaq suyukunaqa Señorninchispañan, hinallataq Cristonpañan kapunku. Paymi wiñaymanta wiñaykama kamachikunqa,’ nispan.
[16] Diospa ñawpaqenpi kamachikuq tiyanankupi tiyashaq iskay chunka tawayoq kurak runakunataqmi, pampakamaraq k'umuykukuspa Diosta yupaycharqanku.
[17] Nirqankutaqmi: ‘Tukuy atiyniyoq Señor Dios, grasiastan qoykiku. Kunan kaqpas, qayna kaqpas, hamuq kaqpas qanmi kanki. Hatun atiyniyoq kayniykita hap'ispaykin, ña kamachikushankiña.
[18] Suyukunapas sinchitan phiñakurqanku. Ichaqa k'arak phiñakuyniykin chayamunña. Wañusqakunata chaninchanayki tiempoqa chayamunñan. Rantiykipi rimaq kamachiykikunaman premio qopunayki tiempoqa chayamunñan. T'aqasqakunamanpas, sutiykita manchakuqkunamanpas premio qopunayki tiempoqa chayamunñan. Huch'uy kaqkunamanpas, hatun kaqkunamanpas, premio qopunayki tiempoqa chayamunñan. Hallp'a pacha chhalluqkunata wañuchipunayki tiempopas chayamullantaqmi,’ nispa.
[19] Hinallataqmi, hanaq pachapi kashaq Diospa yupaychana wasinpas kicharisqa karqan. Hinan Dios yupaychana wasinpi kashaq rimanakuna arkapas sut'i rikusqapuni karqan. Hinaqtinmi hallp'a pachapi, rayo llipllikiykunapas, kunununuykunapas, pacha t'oqyaykunapas, huk pacha chhaphchikuypas, hinallataq sinchi hatuchachaq chikchipas karqan.