[1] Nillawarqantaqmi: ―Sardis llaqtapi kashaq iñiq t'aqaq angelninman qelqay: ‘Ñoqan Diospa qanchis Espiritunkunata hap'ishani. Hinallataq qanchis ch'askakunatapas hap'ishallanitaq. Ñoqan kaykunata niyki: “Ñoqaqa ruwasqaykikunatapas, kawsashaq sutiwan sutiyasqa kashaspa, wañusqa kashasqaykitapas yachanin.
[2] Diosniypa ñawpaqenpi ruwasqaykikuna, tukusqa kasqantaqa manan tarirqanichu. Chayrayku qhawakushallaypuni, hinallataq tukukapunan patapiña kashaq qhepaqkunatapas qaqatapuni takyachiy.
[3] Chay hinaqa, imatachus chaskisqaykimantawan, uyarisqaykimantawan yuyarikuypuni. Hinaspa chaykunata waqaychay, hinallataq yuyayman kutirikuy. Manataqchus makilla qhawakunki chayqa, huk suwa hinan qonqaylla qanman hamusaq. Manataqmi imaynallanmantapas, ima orastachus qanman hamushasqaytaqa yachakunkichu,” nispay.
[4] Chaywanpas ichaqa, Sardis llaqtapin p'achankuta mana qhellichakuqkuna pisilla kashanku. Paykunaqa, yuraq p'achawan churakuspa purinankupaq hina kasqankuraykun, ñoqawan purinqaku.
[5] Pipas atipaqqa, chay hina yuraq p'achawan p'achallisqan kanqa. Kawsay libromantapas, manataqmi hayk'aqpas sutintaqa horqosaqchu. Hinan Yayaypa ñawpaqenpi, hinallataq angelninkunaq ñawpaqenpipas sutintaqa rimarisaqpuni,’ nispa.
[6] Pipas uyariq ninriyoq kan chayqa, iñiq t'aqakunaman Espírituq nisqanta uyarichun, nispan.
[7] Nillawarqantaqmi: ―Filadelfia llaqtapi kashaq iñiq t'aqaq angelninman qelqay: ‘Ñoqan Ch'uya, hinallataq Cheqaq kaqqa kani. Ñoqan Davidpa llabenta hap'ishani. Ñoqan punkuta kichani, manataqmi pipas wisq'ayta atinmanchu. Ñoqan punkuta wisq'ani, manataqmi pipas kichayta atinmanchu.
[8] Ñoqan kaykunata niyki: “Ñoqaqa ruwasqaykikunata reqsinin. Huk chikallanña atiyniyki kan chaypas, sutiyta mana mananchaspaykin, simiytaqa kasukurqanki. Chayrayku, qhawariy, ñawpaqeykimanmi kicharayashaq huk punkuta churani. Chay punkutaqa manataqmi pipas wisq'ayta atinmanchu,” nispay.
[9] Qhawariy, Satanaspa huñukunan wasinmanta, wakin kaqkunatan qosayki. Pikunachus, mana-judío runakuna kashaspa, judío runakunaman tukuq llulla runakunatan qosayki. Qhawarillaypas, chakiykiq kasqan ñawpaqeykipi pampakama qonqoriykukunankupaqmi ñoqa ruwasaq. Hinan qanta munakusqayta yachanqaku.
[10] Pasiensiakuy simiytaqa waqaycharqankin. Chay hinallataqmi ñoqapas, kay pachantinpi tiyaq runakunaman prueba usqhaylla hamunan kashaq orasmanta waqaychasayki. Hinan hallp'a pachantinpi tiyaq runakunaqa pruebasqa kanqaku.
[11] Qhawariy, ñoqaqa usqhayllamanmi hamusaq. Ama pipas koronaykita qechunasunkipaq, imachus kapusqasunkita hap'ikullay.
[12] Atipaqtaqa, Diosniypa yupaychana wasinpi tusaqpaqmi churasaq. Manapunitaqmi hayk'aqpas hawamanqa lloqsinqachu. Paypitaqmi, Diosniypa sutintapas qelqasaq. Hinallataq Diosniypa apachimusqan hanaq pachamanta uraykamuq mosoq Jerusalén llaqtaq sutintapas qelqasaq. Hinallataqmi mosoq sutiytapas qelqallasaqtaq,’ nispa.
[13] Pipas uyariq ninriyoq kan chayqa, iñiq t'aqakunaman Espírituq nisqanta uyarichun, nispan.
[14] Nillawarqantaqmi: ―Laodisea llaqtapi kashaq iñiq t'aqaq angelninman qelqay: ‘Ñoqan, Ahinapuni kachun kaqqa kani. Ñoqan hunt'aq, hinallataq cheqaq testigoqa kani. Ñoqan Diospa kamasqan qallariymantapacha kashaqqa kani.
[15] Ñoqan kaykunata niyki: “Qanpa ruwasqaykikunataqa yachanin. Nitaq chiri, nillataq rupha kasqaykitapas ñoqaqa yachallanitaqmi. ¡Hukpaqkama ruphapas kawaq, otaq chiripas kawaq!
[16] Chay hinaqa, nitaq rupha, nillataq chiri, aswanpas huk chikan q'oñirisqa kasqaykiraykun, simiymanta aqturparisayki,” nispay.
[17] Qanqa nishankin: “Ñoqaqa qhapaqmi kani, anchatapunin qhapaqyashani, manataqmi imamantapas pisichikunichu,” nispayki. Ichaqa, mana imayoq, umphu, wakcha, ñawsa, q'alalla ima kashasqaykitapas manataqmi reparakunkichu.
[18] Chay hinaqa, qhapaq kanaykipaq, ninapi ch'uyanchasqa qorita ñoqamanta rantikuwanaykipaq yuyaychayki. Hinallataq q'alalla kayniykita p'istukunaykipaqpas yuraq p'achata rantikuwanaykipaq yuyaychayki. Chaywantaqmi p'enqay kayniykita pakaykukunki. Hinallataq, allinta rikunaykipaq, ñawi hawina hampita rantikuwanaykipaq yuyaychallaykitaq.
[19] Ñoqaqa pikunatachus munakusqaykunatan phiñarikunipas, kastiganipas. Chay hinaqa, anchatapuni wañukuqraq kay, hinallataq yuyayman kutirikuy.
[20] Qhawariy, ñoqaqa punkupiñan kashani. Hinan punkuta takakuspay, waqyakushani. Sichus mayqenpas kunkayta uyariwaspa, punkuta kichariwanqa chayqa, paymanmi haykusaq. Hinan paywan mikhusaq, paytaqmi ñoqawan mikhunqa.
[21] Ñoqaqa atipaspaymi, Yayaypa kamachikuq tiyananpi paywan tiyaykurqani. Chay hinallatataqmi, atipaqtaqa ñoqawan kuskata kamachikuq tiyanaypi tiyaykuchisaq,’ nispa.
[22] Pipas uyariq ninriyoq kan chayqa, iñiq t'aqakunaman Espírituq nisqanta uyarichun, nispan.