[1] Chaykuna qhepatataqmi qhawarirqani. Chayllamanmi, hanaq pachapi huk punkuta kicharayashaqta rikurqani. Hinan korneta waqayta hina ñawpaq kaq kunkata ñoqawan rimashaqta uyarirqani. Nimuwarqantaqmi: ‘¡Kayman wichamuy! Hinan kaykunamanta qhepata imakunachus pasananta rikuchisayki,’ nispan.
[2] Kasqan ratupachataqmi, ñoqaqa Espiritupi chaypi kasharqani. Qhawariy, hanaq pachapin huk kamachikuq tiyana churasqa kasharqan. Chay tiyanapitaqmi, huk runa tiyasharqan.
[3] Hinan chay tiyashaqpa rikch'ayninqa, haspe rumiman, hinallataq kornalina rumiman rikch'akuq karqan. Chay kamachikuq tiyanaq muyuriqninpitaqmi esmeralda rumiman rikch'akuq huk k'uychi kashallarqantaq.
[4] Hinallataqmi, chay kamachikuq tiyanaq muyuriqninpipas iskay chunka tawayoq kamachikuq tiyanakuna kashallarqantaq. Chay kamachikuq tiyanakunapitaqmi, iskay chunka tawayoq umalliq kurak runakuna tiyasharqanku. Paykunaqa, yuraq p'achawan p'acharusqa, hinallataq umankumanpas qori koronawan churaykusqan kasharqanku.
[5] Chay kamachikuq tiyanamantataqmi, rayo lliphllikiykunapiwan, pacha t'oqyaykunapiwan, kunununuykunapiwan ima lloqsimusharqan. Hinallataq chay kamachikuq tiyanaq ñawpaqenpipas qanchis yawrashaq lamparakuna kasharqan. Chaykunaqa, Diospa qanchis Espiritunkunan kanku.
[6] Chay kamachikuq tiyanaq ñawpaqenpitaqmi, kristalman rikch'akuq huk qespi qocha hina kasharqan. Kamachikuq tiyanaq qayllanpi, hinallataq muyuriqninpiwantaqmi, tawa kawsashaqkuna kasharqanku. Paykunaqa, ñawpaqenkupiwan, qhepankupiwan ñawikunawan hunt'aykusqan kasharqanku.
[7] Ñawpaq kaq kawsashaqmi, huk leonman rikch'akuq karqan. Iskay kaq kawsashaqtaq, huk torilluman rikch'akuq karqan. Kinsa kaq kawsashaqtaq, runaq uyan uyayoq hina karqan. Tawa kaq kawsashaqtaqmi, huk phalashaq ankaman rikch'akuq karqan.
[8] Chay tawantin kawsashaqkunataqmi, sapankapas soqta raphrayoqkama kasharqanku. Muyuriqninpipas, ukhunpipas ñawikunawan hunt'aykusqan kasharqanku. Mana thanispataqmi, tutantin, p'unchaynintin kay hinata nisharqanku: ‘¡Tukuy atiyniyoq Señor Diosqa, ch'uya, ch'uya, ch'uyapunin. Qayna kaqpas, kunan kaqpas, hinallataq hamuq kaqpas paymi!’ nispanku.
[9] Hinan, sapa ratulla chay kawsashaqkunaqa, kamachikuq tiyanapi tiyashaqman yupaychayta, hatunchayta, hinallataq grasiasta qosharqanku. Payqa wiñaymanta wiñaykama kawsaqmi.
[10] Iskay chunka tawayoq umalliq kurak runakunataqmi, kamachikuq tiyanapi tiyashaqpa ñawpaqenpi qonqoriykukusharqanku. Hinan wiñaymanta wiñaykama kawsaqta hatunchasharqanku. Hinallataqmi koronankutapas kamachikuq tiyanaq ñawpaqenman churaykusharqanku.
[11] Nisharqankutaq: Señornillayku, qanmi tukuy imaymanakunatapas kamarqanki. Munayllaykiwanpunitaqmi kashanku. Qanpa kamasqaykitaqmi kankupas. Chayraykun, yupaychaytapas, hatunchaytapas, atiytapas chaskinaykipaq hinapuni kanki, nispanku.