[1] Hinan hatun, hinallataq utirayanapaq wak señalta hanaq pachapi rikurqani. Qanchis angelkunan, qhepa kaq qanchis plagakunayoq kasharqanku. Chaykunawantaqmi, Diospa k'arak phiñakuyninqa hunt'akun.
[2] Ninawan chhaqrusqa qespimanta huk qochata hinan rikurqani. Hinan wak'a animalta, rikch'ayninta, markanta, hinallataq sutinkuq yupayninta atipaqkunata rikullarqanitaq. Chay atipaqkunataqmi, qespimanta qocha patapi, Diospa arpankunata hap'iyukuspa sayasharqanku.
[3] Hinan Diospa kamachin Moisespa takintawan, Korderoq takintawan takisharqanku. Nirqankutaq: ‘Tukuy atiyniyoq Señor Dios, ancha hatun, hinallataq musphanaraqmi ruwasqaykikunaqa kanku. Ñanniykikunapas chaninpuni, hinallataq cheqaqpunin kanku. Qanllapunin, t'aqasqakunaq Reyninpas kanki. Señor, qan sapallaykin ch'uyaqa kanki.
[4] Chay hinaqa, ¿pitaq qantari mana manchakusunkimanchu? ¿Pitaq sutiykitari mana hatunchanmanchu? Qanmi chaninchayniykikunatapas rikuchirqanki. Chaymi, llapan suyukunapas ñawpaqeykiman hamuspanku, yupaychasunkiku,’ nispanku.
[5] Chay imaymanakuna qhepatataqmi qhawarirqani. Hinan, hanaq pachapi kashaq, Diospaq ruwasqa karpaq sut'inchaqninpa t'aqasqa cheqasninqa kicharisqa karqan.
[6] Chay t'aqasqa cheqasmantataqmi, qanchis plagakunayoq qanchis angelkuna lloqsimurqanku. Paykunaqa, llimphuy linomanta k'ancharishaq pampakama p'achawan p'acharusqakaman kasharqanku. Hinallataqmi qhasqonkupas, qorimanta chumpiwan chumpirusqakama kasharqanku.
[7] Tawantin kawsaqkunamanta huknintaqmi, qanchis angel- kunaman qorimanta qanchis p'ukukunata qorqan. Chay p'ukukunaqa, wiñaymanta wiñaykama kawsaq Diospa k'arak phiñakuyninwan hunt'aykusqan kasharqanku.
[8] Hinan chay t'aqasqa cheqasta, Diospa k'anchariyninpa q'oshñin, hinallataq atiyninpa q'oshñin hunt'aykurqan. Hinallataq chay qanchis angelkunaq qanchis plagankuna hunt'akunankama, manapuni pipas Dios yupaychana wasiman haykuytaqa atirqankuchu.