[1] Chaykuna qhepatataqmi, hatun kamachikuyniyoq kashaq wak angelta hanaq pachamanta uraykamushaqta rikurqani. Hinan hallp'a pachaqa, chay angelpa k'anchariyninwan k'anchaykusqa karqan.
[2] Hinan ancha kunkayoqtapuni waqyakurqan. Nirqantaq: ‘¡Hatun Babilonia llaqtaqa urmaykapunmi! ¡Arí, urmaykapunmi! Supaykunaq tiyananmanmi tukupun. Llapan qhelli supaykunaq pakaykukunanmanmi tukupun. Llapa phalaq qhelli animalkunaqpas, runakunaq millakunan phalaq animalkunaqpas pakaykukunanmanmi tukupun.
[3] Qhellipi purisqan k'arak phiñakuy binonmantaqa, llapan suyukunan macharqanku. Paywantaqmi, hallp'a pachapi reykunapas, qhellipi purirqanku. Hinallataq hallp'a pachapi qhatuqkunapas, paypa ancha qhapaq kayninwan qhapaqyarqanku,’ nispa.
[4] Hinan hanaq pachamanta wak kunkatapas uyarirqani. Nimurqantaq: ‘Llaqtalláy, huchallikusqankunamanta ama ruwaysikuqmasin kanaykichispaq, hinallataq plagawan ñak'arichisqa kayninkunamanta ama chaskiysikuqmasin kanaykichispaq, chay llaqtamanta lloqsipuychis.
[5] Huchankunaqa, hanaq pachakamaraqmi tawqaykukurqan. Mana chanin ruwasqankutataqmi Diosqa yuyarin.
[6] Chay hinaqa, imaynatachus pay qorqasunkichis, chay hinallatataq kutichipuychis. Ruwapusqasunkichisman hina, iskaytawanraq kutichipuychis. Paypa wakichisqan qeronpitaq, iskaytawanraq wakichipuychis.
[7] Payqa sonqonpin nirqan: “Manan biudachu kani. Nitaqmi hayk'aqpas khuyayta waqasaqchu. Ñoqaqa huk reina hinan tiyashani,” nispa. Chay hinatan, hatunchakuypi, hinallataq qhapaq kaypi kawsarqan. Chayrayku ñak'ariyta, hinallataq khuyay waqayta qoychis.
[8] Chaninchaqnin Señor Diosqa, atiyniyoqmi. Chayraykun, huk p'unchayllapi wañuy, khuyay waqay, hinallataq yarqay plagakuna payman hamunqa. Hinallataq ninawan kanaykusqapuni kapunqa,’ nispa.
[9] Chay kunkaqa nillarqantaqmi: ‘Maypachachus Babilonia llaqta kanaykusqa kaqtinmi q'oshñinta rikuspanku, hallp'a pachantinpi reykunaqa, chay llaqtamanta waqanqaku, hinallataq khuyayta llakipakunqaku. Paykunan chay llaqtawan qhellipi purirqanku. Hinallataqmi llaqtaq qhapaq kayninkunapi kawsaysikurqanku.
[10] Mancharikuymanta karullapi sayaykuspankutaqmi, Babilonia llaqtaq chay hina ñak'arichisqa kasqanta rikunqaku. Ninqakutaq: “Babilonia llaqtamanqa huk orallapiraqmi chaninchasqa kaynin hamurun. Chayrayku kallpasapa, hinallataq hatun Babilonia llaqta, ¡ay, ay qanmanta, imaynaraq kanqa!” nispanku.
[11] Manañan pipas hallp'a pachapi qhatuqkunaq qhatusqankuta rantikapunkuñachu. Chayraykun paykunaqa, chay Babilonia llaqtamanta waqashanku, hinallataq khuyayta llakipakushanku.
[12] Chay qhatunakunaqa, qori, qolqe, umiña rumikuna, perlakuna, ancha balorniyoq lino tela, sani-puka tela, seda tela, yawar-puka tela, hinallataq llapan q'apashaq k'ullun karqan. Hinallataqmi llapan ancha balorniyoq marfilmanta, llapan ancha balorniyoq k'ullumanta, kobremanta, fierromanta, marmolmanta imaymana sumaq ruwasqakuna karqan.
[13] Hinallataqmi kanela, sumaq q'apashaq asnapakuna, insienso, mirra, q'apashaq hawina, bino, aseite, ñut'u hak'u, trigo, wakakuna, obehakuna, kaballokuna, karretakuna, kamachi runakuna, runakunaq kawsayninku ima, karqan.
[14] Ninqakutaq: “Almaykiq munapayasqan ruruqa, qanmanta t'aqarikapunmi. Llapan sumaq kayniykikunapas, k'anchariyniykikunapas chinkaripunmi. Manataqmi hayk'aqpas chaykunataqa tarinkiñachu,” nispanku,’ nispa.
[15] Chay kunkaqa nillarqantaqmi: ‘Chay imaymanakunata qhatuspa qhapaqyaqkunaqa, karullapin sayaykunqaku. Hinan chay llaqtaq ñak'arichisqa kasqanmanta mancharisqa kasqankurayku, waqanqaku, hinallataq khuyayta llakipakunqaku.
[16] Ninqakutaqmi: “¡Ay, ay, hatun llaqtamanta, imaynaraq kanqa! Chay llaqtaqa, ancha balorniyoq telamanta p'achawan, sani-puka p'achawan, hinallataq yawar-puka p'achawanmi p'achakurqan. Payqa, qoriwan, umiña rumikunawan, hinallataq perlakunawanmi achalakurqan.
[17] Chay hina may hatun qhapaq kaykunapas ch'ulla orallapiraqmi ch'usaqyarqachisqa karqan,” nispanku. Llapallan barko q'ewiqkunapas, llapallan barkopi mamaqochantakama puriqkunapas, barkopi llank'aqkunapas, hinallataq llapallan mama-qochapi llank'aqkunapas karullapin sayaykurqanku.
[18] Ruphaykachisqa kasqanmanta q'oshñita rikuspankutaqmi, qaparirqanku. Nirqankutaq: “¿Mayqen llaqtapas kay hatun llaqta hinari karqanchu?” nispanku.
[19] Hinan umanku pataman hallp'ata hach'ikurqanku. Hinallataq waqaspanku, khuyayta llakipayaspanku ima qaparirqanku. Nirqankutaq: “Ch'ulla orallapiraqmi, chay llaqtaqa ch'usaqyarapun. Chayrayku, ¡Ay, ay chay hatun llaqtamanta, imaynaraq kanqa! Chay llaqtaq qhapaq kayninwanmi, mama-qochapi llapan barkoyoqkunapas qhapaqyarqanku.
[20] ¡Hanaq pacha, chay llaqtamanta kusikuy! ¡T'aqasqakunapas, apostolkunapas, hinallataq Diospa rantinpi rimaqkunapas chay llaqtamanta kusikullaychistaq! Diosmi, qankunarayku chay llaqtata huchacharqan.” nispanku,’ nispa.
[21] Huk atiyniyoq angeltaqmi, huk rumita, yaqapas hatun molino rumita hinaraq, hoqarirurqan. Hinan chay rumita, mamaqochaman wikch'uykurqan. Nirqantaq: ‘Chay hina kallpawanraqmi, Babilonia hatun llaqtaqa ñut'usqa kanqa. Manataqmi hayk'aqpas tarisqañachu kanqa.
[22] Manañataqmi hayk'aqpas qanpiqa, arpa tukaqkunaq tukasqantapas, tukanakunata tukaqkunaq tukasqantapas, qena tukaytapas, otaq korneta tukaytapas qanpiqa uyarikunqañachu. Nitaqmi qanpiqa, imaymanakuna ruwaq artesanokunapas tarikunqañachu. Nillataqmi qanpiqa, molinokunaq kunununuyninpas hayk'aqpas uyarikunqañachu.
[23] Llapan suyukunan, layqakuyniykikunawan q'otusqa karqanku. Hinallataq qhatuqniykikunapas hallp'a pachantinpi aswan allin qhawarisqa karqanku. Chayraykun lámparaq k'anchayninpas qanpiqa manaña hayk'aqpas k'anchanqañachu. Manañataqmi hayk'aqpas kasarakunanpaq kashaq qhariq kunkanpas, nitaq kasarakunanpaq kashaq warmiq kunkanpas qanpiqa uyarikunqañachu.
[24] Chay hatun llaqtapitaqmi, Diospa rantinpi rimaqkunaq, t'aqasqakunaq, hinallataq hallp'a pachantinpi llapan wañuchisqakunaq yawarninkupas tarisqa karqan,’ nispa.