[1] Qhawariqtiytaqmi, chayllaman, Korderoqa Sión orqo patapi sayasharqan. Korderowantaqmi, pachak tawa chunkan tawayoq waranqa runakuna kasharqanku. Paykunan Korderoq sutinwan, hinallataq Yayanpa sutinwanpas mat'inkupi qelqasqa kasharqanku.
[2] Hinan, hanaq pachamanta huk kunkata, askha unukunaq phaqchayninta hina, hinallataq hatun pacha t'oqyayta hina uyarirqani. Chay uyarisqay kunkaqa, arpa tokaqkunapas arpankuta tokashankuman hinaraqmi karqan.
[3] Pachak tawa chunkan tawayoq waranqa runakunaqa, kamachikuq tiyanaq ñawpaqenpi, tawantin kawsashaqkunaq ñawpaqenpi, hinallataq kurak runakunaq ñawpaqenpipas huk mosoq takitan takisharqanku. Chay takitaqa, manan pipas yachayta atirqankuchu. Aswanpas hallp'a pachantinmanta pachak tawachunkan tawayoq waranqa rantipapusqa kaqkunallan takiytaqa atirqanku.
[4] Paykunaqa manan hayk'aqpas warmikunawan qhellichakurqankuchu, aswanpas mana warmi reqsiqkunan karqanku. Paykunaqa, Kordero maytaña riqtinpas, payta qatikuqkunan kanku. Paykunan Diospaqpas, Korderopaqpas, runakunapuramanta rantipapusqa aswan allin rurukunaqa karqanku.
[5] Diospa kamachikuq tiyanan ñawpaqenpipas, mana ima qhelliyoqmi kanku. Chaymi paykunaq rimasqankupiqa, ima llullakuypas manapuni tarikurqanchu.
[6] Hinan wak angelta, kuskan hanaq pachapi phalashaqta rikurqani. Payqa, hallp'a pachapi tiyaq runakunaman willananpaq, wiñay allin willakuyniyoqmi karqan. Hinan llapan suyukunaman, llapan ayllukunaman, llapan wak simi rimaypi rimaqkunaman, hinallataq llapan llaqtakunamanpas willasharqan.
[7] Hinan ancha kunkayoqtapuni nirqan: ‘¡Diospa taripaynin orasqa chayarqamunñan! Chayrayku, Diosta manchakuychis, hinallataq hatunchaychis. Paymi hanaq pachatapas, hallp'a pachatapas, mama-qochatapas, pukyukunatapas kamarqan. Payllatapuni yupaychaychis,’ nispa.
[8] Hinan iskay kaq wak angelpas qatikusharqan. Nirqantaqmi: ‘¡Hatun Babilonia llaqtaqa urmaykapunñan! ¡Arí, urmaykapunñan! Chay llaqtan, paypa qhellipi puriynin phiñakuy binota, llapa suyukunaman ukyachirqan,’ nispa.
[9] Kinsa kaq wak angelpas paykunatan qatikushallarqantaq. Hinan ancha kunkayoqtapuni nillarqantaq: “¡Pillapas ñawpaq kaq wak'a animaltapas, rikch'aynintapas yupaychaq, hinallataq mat'inpi, otaq makinpi markachikuqqa kanmanmi.
[10] Sichus chay hina kanman chayqa, paypas Diospa k'arak phiñakuynin qeronman hich'asqaña kashaq mana chhaqrusqa binomantaqa ukyallanqataqmi. Hinaspataqmi ch'uya angelkunaq ñawpaqenpi, hinallataq Korderoq ñawpaqenpipas asufriyoq ninapi ñak'arichisqa kanqa.
[11] Ñak'arichisqa kasqanku q'oshñitaqmi, wiñaypa wiñayninpaq q'oshñimushallanpuni. Ñawpaq kaq wak'a animaltapas, hinallataq paypa rikch'aynintapas yupaychaqkunataqmi, tutantin, p'unchaynintin chay ñak'ariymanta mana samaykunkuchu. Nitaq chay ñawpaq kaq wak'a animalpa sutinwan markasqa kaqkunapas samaykullankutaqchu.
[12] Chaypin t'aqasqakunaq pasiensiakuyninqa kashan. Paykunaqa, Diospa kamachikuyninkunata, hinallataq Jesuspa iñiynintan waqaycharqanku,’ nispa.
[13] Hinan hanaq pachamanta, huk kunkata uyarirqani. Chay kunkataqmi nimurqan: ‘Kayta Qelqay: “Kunanmanta ñawpaqman, wañukapuspa Señorpi wañukapuqkunaqa, kusisamiyoqmi,” nispayki. Chayraykun, Santo Espiritupas nin: “Arí, paykunaqa sinchi llank'ayninkumanta samaripunqakun. Ruwasqankunapas paykunallawanpunin kashanqa,” nispan,’ nispa.
[14] Qhawarillarqanitaqmi. Hinan chayllaman, huk yuraq phuyo chaypi kasharqan. Chay phuyo patapitaqmi huk runa tiyasharqan. Chay runaqa, Runaq Churinman rikch'akuqmi karqan. (Dan. 7:13) Hinan umanpiqa, qorimanta huk korona churaykusqa kasharqan. Makinpitaqmi, huk filochasqa ichhunata hap'isharqan.
[15] Wak angelñataqmi, Dios yupaychana wasimanta lloqsimurqan. Hinan phuyo patapi tiyashaqman ancha kunkayoqtapuni waqyakuspa nirqan: ‘Hallp'a pacha chakra poqosqaña kashasqanraykun, ichhupuna tiempoqa chayamunña. Chayrayku ichhunaykiwan ichhupullayña,’ nispan.
[16] Phuyo patapi tiyashaqtaqmi, hallp'a pachata ichhunanwan ichhurqan. Hinan hallp'a pachaqa ichhusqa kapurqan.
[17] Hinan, wak angelpas, hanaq pachapi kashaq Dios yupaychana wasimanta lloqsimullarqantaq. Paypas, filochasqa ichhunata aparikuspanmi lloqsimurqan.
[18] Altarmantataqmi, ninata kamachiq wak angelpas lloqsimullarqantaq. Hinan filochasqa ichhunayoq angelta ancha kunkayoqtapuni waqyarqan. Nirqantaq: ‘Ubaskunaqa ñan poqosqaña kashan. Chayrayku, filochasqa ichhunaykiwan hallp'a pachaq rurusqan ubaskunata wit'umpullayña, nispan.
[19] Hinaqtinmi, angelqa ichhunanwan hallp'a pachata ichhurqan. Hinan hallp'a pachamanta ubaskunatapas wit'umpurqan. Ubastataqmi, Diospa k'arak phiñakuy hatun sarunan t'oqoman wikch'uykurqan.
[20] Chay ubas saruna t'oqoqa, llaqtamanta hawapin kasharqan. Chaypitaqmi, ubasqa sarusqa karqan. Hinan chay saruna t'oqomanta lloqsimuq yawarqa, kaballokunaq frenonkamaraq ayparqan. Wask'anmantaqmi yaqapas waranqa soqta pachak estadiokunata hina mast'arikurqan.