[1] Phisqa kaq angelñataqmi kornetanta tokamurqan. Hinan huk ch'aska hanaq pachamanta hallp'a pachaman urmaykamusqataña rikurqani. Paymantaqmi chinkay-chinkay ukhu pachaq llaben qosqa karqan.
[2] Hinan chay chinkay-chinkay ukhu pachata kicharirqan. Hatun hornoq q'oshñin hinataqmi, chay ukhu pachamanta q'oshñi lloqsimusharqan. Hinan chay ukhu pachaq q'oshñinwan intipas, wayrapas tutayachisqa kasharqanku.
[3] Chay q'oshñimantataqmi hallp'a pachantinman langostakuna lloqsimurqanku. Hinan chay langostakunaman, hallp'a pachantinpi alakrán kurukunaq atiynin hinaraq atiy qosqa karqan.
[4] Hinan amapuni hallp'a pachantinpi qorakunatapas, nitaq q'omer kaqkunatapas, nillataq mayqen mallkikunatapas k'irinankupaq kamachisqa karqanku. Aswanpas Diospa sellonwan mat'inkupi mana sellosqa kaq runakunallata k'irinankupaq kamachisqa karqanku.
[5] Hinallataq amapuni chay runakunata wañuchinankupaq, aswanpas phisqa killantin ñak'arichinankupaq kamachisqa karqanku. Chay ñak'arichiyninkuqa, imaynan runata alakrán kuru ñak'arichin, chay hinan karqan.
[6] Chay p'unchaykunapitaqmi, runakunaqa wañuyta maskhanqaku. Ichaqa manataqmi wañuytaqa tarinqakuchu. Wañuytaqa maytapunin munanqaku, wañuytaqmi ichaqa, paykunamanta ayqekunqa.
[7] Chay langostakunaq rikch'aynintaqmi, awqa tinkuypaq wakichisqa kaballokuna hina karqanku. Umankupitaq, qoriman rikch'akuq koronakuna kasharqan. Uyankutaqmi, runakunaq uyankuman rikch'akuq karqan.
[8] Chukchankutaqmi warmikunaq chukchan hina karqan. Kirunkutaqmi leonkunaq kirunkuna hina karqan.
[9] Korasankupas, fierromanta korasa hinan karqan. Raphrankuq sap'aqeynintaqmi, askha kaballokunaq chutasqan awqa tinkuyman phawaq karretakunaq raqhaqaqaynin hina karqan.
[10] Chupankutaqmi, alakrán kurukunaq chupan hina karqan. Chay chupanpitaqmi yawripas karqan. Hinallataq chay chupanpin, runakunata phisqa killantin k'irinanpaq atiy qosqa karqan.
[11] Paykunaq kamachikuqninkutaqmi, chinkay-chinkay ukhu pacha ángel karqan. Paypa sutinmi hebreo rimaypi Abadón karqan. Griego rimaypitaqmi Apolión sutinqa karqan.
[12] Ñawpaq kaq ay pasaruqtinqa, qhawariy, chay qhepamanqa iskay aykunaraqmi hamushanku.
[13] Soqta kaq angelñataqmi kornetanta tokamurqan. Hinan Diospa ñawpaqenpi kashaq qorimanta altarpa tawantin waqrakuna chawpimanta, huk kunkata uyarirqani.
[14] Chay kunkataqmi, kornetata hap'ishaq soqta kaq angelta nimurqan: ‘Hatun Éufrates mayuq qayllanpi watasqa kashaq tawa angelkunata paskamuy,’ nispan.
[15] Chay tawantin angelkunataqmi, runakunamanta kinsa kaq partinta wañuchinankupaq paskasqa karqanku. Paykunaqa chay oraspi, chay p'unchaypi, chay killapi hinallataq chay watapi wañuchinankupaq wakichisqañan kasharqanku.
[16] Kaballopi kaq ejersitokunaq yupayninqa, iskay pachak wara-waranqaraqmi karqan. Chay yupaynintan ñoqaqa uyarirqani.
[17] Kay hinatan kaballokunata, hinallataq chay kaballokunapi sillakuqkunatapas rikhuriypi rikurqani. Korasankuqa puka ninaman, asul safiro rumiman, hinallataq q'ello asufreman rikch'akuqmi karqan. Kaballokunaq umantaqmi, leonkunaq uman hina karqan. Siminkumantataqmi ninapiwan, q'oshñipiwan, asufrepiwan lloqsimusharqan.
[18] Chay kinsantin plagakunawanmi, runakunamanta kinsa kaq partinqa wañuchisqa karqanku. Chay kinsantin ñak'arichiqkunaqa, kaballokunaq siminmanta lloqsimuq ninapiwan, q'oshñipiwan, asufrepiwan iman karqanku.
[19] Kaballokunaq chupankunaqa, mach'aqwayman rikch'akuqmi karqan. Chay chupanpa umanwantaqmi, runakunata k'irirqanku. Chaymi, chay kaballokunaq atiyninkuqa, siminkupi, hinallataq chupankupi kasharqan.
[20] Hinan wakin runakunaqa, chay plagakunawanpas mana wañurqankuchu. Chaywanpas paykunaqa, supaykunata, hinallataq mana rikuy atiq, mana uyariy atiq, mana puriy atiq idolokunata yupaychashasqankumantapas manapunin yuyaymanqa kutirikurqankupunichu. Chay idolokunaqa, qorimanta, qolqemanta, bronsemanta, rumimanta, hinallataq k'aspimanta makinkuwan ruwasqankun karqan.
[21] Hinallataq runa wañuchiq kayninkumantapas, layqakuyninkumantapas, qhellipi puriyninkumantapas, suwakuq kayninkumantapas manapunin yuyaymanqa kutirikurqankuchu.