[1] Chay rimapayawaqniyqa nillawarqantaqmi: ―Éfeso llaqtapi kashaq iñiq t'aqaq angelninman qelqay: ‘Ñoqan qanchis ch'askakunata paña makiypi hap'ishani. Hinallataq qorimanta qanchis lámpara churanakunaq chawpinpi purishani.
[2] Ñoqan kaykunata niyki: “Ñoqaqa qanpa ruwasqaykikunatapas, ancha llank'asqaykikunatapas, hinallataq pasiensiakuyniykitapas yachanin. Millay runakunatapas manan hinallatachu qhawarqanki. Hinallataq, mana apostolkuna kashaspa, apostolkunaman tukuqkunatapas pruebarqankin. Chay hinapin llulla kasqankuta hap'irqanki.
[3] Hinallataq pasiensiakuywan ñak'arisqaykitapas, pasiensiakuywan qaqata sayasqaykitapas, sutiyrayku mana sayk'uspa llank'asqaykitapas, yachallanitaqmi,” nispay.
[4] Chaywanpas ichaqa, ñoqaqmi qanpa kontraykipi ninay kashan. Ñawpaq kaq munakuyniykitan saqepurqanki.
[5] Chayrayku, maymantachus urmaykusqaykita yuyariy. Hinaspa, ¡yuyayman kutirikuy! Hinaspataq, ñawpaq kaq ruwasqaykikunata ruway. Mana hinaqa, usqhayllamanmi qanman hamusaq. Hinan, sichus manapuni yuyayman kutirikunki chayqa, lámpara churanaykitan maypichus kashasqanmanta qechupusayki.
[6] Chaywanpas, kayqa kapushasunkin: Nikolaíta nisqa runakunaq ruwayninkunataqa cheqnikunkin. Ñoqapas chay ruwayninkunataqa cheqnikullanitaqmi,’ nispa.
[7] Pipas uyariq ninriyoq kan chayqa, iñiq t'aqakunaman Espírituq nisqanta uyarichun. Atipaqtaqa, kawsay mallkimantan mikhuchisaq. Chay mallkiqa, Diospa Paraisonpin kashan, nispan.
[8] Nillawarqantaqmi: ―Esmirna llaqtapi kashaq iñiq t'aqaq angelninman qelqay: ‘Ñoqan qallariypas, p'uchukaypas, hinallataq wañusqa kashaspa, wakmanta kawsarimpuqpas kani.
[9] Ñoqan kaykunata niyki: “Ñoqaqa ruwasqaykikunatapas, ñak'arisqaykikunatapas yachanin. Qhapaqña kashanki chaypas, wakcha kasqaykitapas yachanin. K'arakta k'aminankupaq, manajudío runa kashaspa judío runakunaman tukuqkunatapas reqsinin. Paykunaqa, Satanaspa huñukunan wasin kanku,” nispay.
[10] Usqhayllaman muchuchisqa kanaykimantaqa ama manchakuychu. Qhawariy, saqraqa, pruebasqa kanaykichispaqmi, qankunamanta wakinniykichista karselman usqhaylla wisq'achisunkichis. Hinan chunka p'unchayta ñak'arinkichis. Wañukapunaykikama hunt'aqllapuni kay. Ñoqataq kawsay koronata qosayki,’ nispa.
[11] Pipas uyariq ninriyoq kan chayqa, iñiq t'aqakunaman Espírituq nisqanta uyarichun. Atipaqtaqa, iskay kaq wañuyqa manapunin imananqapaschu, nispan.
[12] Nillawarqantaqmi: ―Pérgamo llaqtapi kashaq iñiq t'aqaq angelninman qelqay: ‘Ñoqan, iskay ladon afilasqa, ancha filo espadata hap'ishani.
[13] Ñoqan kaykunata niyki: “Ñoqaqa ruwayniykikunata reqsinin. Maypichus Satanaspa kamachikuy tiyanan kasqanpi tiyasqaykitapas yachanin. Sutiypi takyasqaykitapas yachanin. Chaywanpas, hunt'aq uyanchaqniy Antipaspa p'unchayninkunapi, iñiyniyta manapuni mananchasqaykitaqa yachallanitaqmi. Paytaqa, qankuna chawpipi, maypichus Satanaspa tiyasqan cheqaspin, wañuchirqanku.” nispay.
[14] Chaywanpas, kontraykipiqa pisillapas kashanpunin. Chaypin wakinniykichiskuna Balaampa yachachikuyninman hap'ipasqa kashanku. Balaamqa, rey Balaktan Israelpa wawankunaq ñawpaqenman toqllata churananpaq yachachirqan. Idolokunaman haywasqata mikhunankupaq, hinallataq qhelli puriykunapi purinankupaq toqllata churananpaqmi yachachirqan.
[15] Chay hinallataqmi, chaypi, wakinniykichiskunaqa, Nikolaíta nisqa runakunaq yachachikuyninman hap'ipasqa kashanku. Chay yachachikuytaqa cheqnikunin.
[16] Chay hinaqa, ¡yuyayman kutirikuy! Mana hinaqa, usqhayllamanmi qanman hamusaq. Hinan paykunaq kontranpi, simiymanta lloqsimuq espadawan maqanakusaq,’ nispa.
[17] Pipas uyariq ninriyoq kan chayqa, Espírituq iñiq t'aqakunaman nisqanta uyarichun. Atipaqmanqa, pakasqa manatan mikhuchisaq. Hinallataq huk yuraq rumichatan qosaq. Chay rumichapiqa, huk mosoq sutin qelqasqa kashan. Chay sutitaqa manan pipas yachanchu, aswanpas chay rumichata chaskiqllapunin yachan, nispan.
[18] Nillawarqantaqmi: ―Tiatira llaqtapi kashaq iñiq t'aqaq angelninman qelqay: ‘Ñoqan Diospa Churin kani. Ñawiykunapas yawrashaq nina hinan kashan. Chakiykunapas k'ancharishaq bronse hinan kashan.
[19] Ñoqan kaykunata niyki: “Ñoqaqa ruwasqaykikunatapas, munakuyniykitapas, iñiyniykitapas, serbiyniykitapas, pasiensiakuyniykitapas yachanin. Hinallataq kunan qhepa ruwasqaykikunan ñawpaq ruwasqaykikunamantaqa aswan allin kanku. Chaytapas yachallanitaqmi,” nispay.
[20] Chaywanpas, kontraykipiqa pisillapas kashanpunin. Profetisaman tukuq Jesabel warmitan hinallata qhawashanki. Chay warmin, qhelli puriypi kawsaytawan, idolokunaman haywasqa mikhuna mikhuytawan kamachiykunaman yachachishan, hinallataq hañaspa aysaykushan.
[21] Paymanmi yuyayman kutirikunanpaq tiempota qoniña. Manataqmi ichaqa, qhellipi puriyninmantaqa yuyayman kutirikuyta munanchu.
[22] Qhawariy, ñoqan chay warmita sinchita ñak'arinanpaq puñunaman churasaq. Paywan wasanchaqkunatapas, sichus mana allin ruwasqankumanta manapuni yuyayman kutirikunqakuchu chayqa, sinchi hatun ñak'ariymanmi churallasaqtaq.
[23] Chay warmiq wawankunatataqmi khuyaytapuni wañuchisaq. Hinan llapallan iñiq t'aqakuna, ñoqaqa yuyaykunatapas, sonqokunatapas t'aqwiq kasqayta yachanqaku. Sapanka hukniykichismantaq ruwasqaykichisman hina pagapusaykichis.
[24] Tiatira llaqtapi, mana chay yachachikuyniyoq wakin kaqkunamanmi rimashani. Qankunaqa, Satanaspa may hatun yachachikuyninkuna nispa sutiyasqankutan manapuni chaskirqankichischu. Qankunatan niykichis: “Ñoqaqa manan ima wak q'epitapas q'epichisaykichischu.
[25] Aswanpas ñoqaq kutimunaykama, imachus kapushasunkichis, chayllamanpuni qaqata hap'ipakuychis,” nispay.
[26] Pipas atipaqman, hinallataq p'uchukaykama ruwasqaykunata waqaychaqmanqa, suyukunapi kamachikuyniyoq kanankupaqmi churasaq.
[27] Qelqaqa ninmi: “Yayaqa fierro barawanmi pusasunkichis. (Isa. 30:14; Sal. 2:9) Hinallataq raqch'i ruwaqpa qeron hinaraqmi, ñut'usqa kankichis,” nispa. (Jer. 19:11; Sal. 2:9) Chay hinallatataqmi, ñoqapas Yayaymanta atiyta chaskirqani.
[28] Chaymantapas, ñoqan illarimuy ch'askata qosaq,’ nispa.
[29] Pipas uyariq ninriyoq kan chayqa, iñiq t'aqakunaman Espírituq nisqanta uyarichun, nispan.