[1] Hinaqtinmi, t'aqasqa cheqasmantapacha, qanchisnintin angelkunaman ancha kunkayoqtapuni nimushaqta uyarirqani. Chay kunkataqmi nimurqan: ‘Riychis, hinaspa Diospa k'arak phiñakuynin qanchisnintin p'ukukunata hallp'a pachaman hich'aykamuychis,’ nispan.
[2] Hinan ñawpaq kaq angelqa rispan, p'ukunta hallp'a pachaman hich'aykamurqan. Hinan wak'a animalpa markanwan markachikuq, hinallataq rikch'aynintapas yupaychaq runakunapi asnaq, lliq-nishaq ch'upu onqoy rikhurirqan.
[3] Iskay kaq angeltaqmi, p'ukunta mama-qochaman hich'aykamurqan. Hinan wañusqa runaq yawarninman hinaraq mamaqochaqa tukupurqan. Llapallan mama-qochapi kawsaqkunataqmi, wañupurqanku.
[4] Kinsa kaq angeltaqmi, p'ukunta mayukunaman, hinallataq pukyukunaman hich'aykamurqan. Hinan mayukunapas, pukyukunapas yawarman tukupurqanku.
[5] Unukunata kamachiq angeltaqmi uyarishaqtiy nirqan: ‘Señor, qanmi kankipas, karqankipas, hinallataq ch'uyapuni kanki. Kay imaymanakunatapas chaninninpin chanincharqanki. Chaymi qanqa chaninpuni kanki.
[6] Chay runakunaqa, t'aqasqakunaq yawarninkuta, hinallataq Diospa rantinpi rimaqkunaq yawarninkutan hich'arqanku. Chaymi qanqa, chay hina ruwanapaq kasqankurayku, yawarta ukyanankupaq qorqanki,’ nispa.
[7] Hinallataqmi, altarmanta wak kunkata uyarirqani. Nimurqantaq: ‘Cheqaqtapuni, tukuy atiyniyoq Señor Dios, chaninchayniykikunaqa cheqaqpuni, hinallataq chaninpunin kanku,’ nispa.
[8] Tawa kaq angeltaqmi, p'ukunta intiman hich'aykurqan. Hinan runakuna ninawan ruphachisqa kanankupaq, intiman atiy qosqa karqan.
[9] Hinan runakunaqa, ninaq sinchi qanqeyninwan rupha- pusqa karqanku. Hinallataqmi, chay plagakunapi munaychakuq Diospa sutinta k'arakta k'amirqanku. Chay tukuywanpas ichaqa, Diosta hatunchanankupaq manapunin yuyaymanqa kutirikurqankuchu.
[10] Phisqa kaq angeltaqmi, p'ukunta wak'a animalpa kamachikuq tiyananman hich'aykurqan. Hinan qhapaq suyunqa, laqha-tutayaqman tukupurqan. Runakunataqmi, nanaymanta qallunkutaraq k'utukurqanku.
[11] Nanayninkurayku, hinallataq asnaq lliq-nishaq ch'upu onqoyninkuraykun, hanaq pacha Diosta k'arakta k'amirqanku. Ichaqa manapunitaqmi mana allin ruwayninkumantaqa yuyayman kutirikurqankuchu.
[12] Soqta kaq angeltaqmi, p'ukunta Éufrates hatun mayuman hich'aykurqan. Hinan, inti lloqsimuy lado reykunaq ñanninku wakichisqa kananpaq, chay Éufrates mayuq ununqa ch'akirapurqan.
[13] Hinallataq, Dragonpa siminmantawan, wak'a animalpa siminmantawan, falso profetaq siminmantawan ima, k'ayraman rikch'akuq kinsa qhelli supaykunata lloqsimushaqta rikurqani.
[14] Paykunaqa, señalkunata ruwaq supaykunaq espiritunkunan kanku. Paykunaqa, hallp'a pachantinpi tiyaq runakunatawan, reykunatawan ima, tukuy atiyniyoq Diospa hatun p'unchayninpi awqa tinkuyman huñumunankupaqmi lloqsinku.
[15] Ñoqa Jesusmi nini: ‘Qhawariy, ñoqaqa suwa hinan hamushani. Pipas rikch'ashallanpuni, hinallataq mana q'alalla purishananpaq p'achanta waqaychakuqqa kusisamiyoqmi. Chay hinapin runakunaqa, p'enqayninta mana rikunqakuchu,’ nispay.
[16] Hinan hebreo simipi Armagedón nispa sutiyasqa cheqasman kamachikuqkunaqa huñumusqa karqanku.
[17] Qanchis kaq angeltaqmi, p'ukunta wayrantakama hich'aykamurqan. Hinan hanaq pachapi kashaq t'aqasqa cheqasmanta, hinallataq Diospa kamachikuq tiyananmanta huk kunkayoqta waqyakamurqan. Nimurqantaq: ‘¡Hunt'asqañan kashan!’ nispa.
[18] Hinan rayo lliphllikiykuna, pacha t'oqyaykuna, kunununuykuna, hinallataq huk hatun pacha chhaphchikuy karqan. Chay hina, hatun pacha chhaphchikuyqa, kay hallp'a pachapi runaq kasqanmantapacha manapunin hayk'aqpas karqanchu.
[19] Chay hatun llaqtataqmi kinsaman ch'eqtakurqan. Suyukunapi hatun llaqtakunataqmi urmaykapurqanku. Hinan hatun Babilonia llaqtaqa, Diospa sinchi k'arak phiñakuyninwan hunt'aykusqa binoyoq qerota chaskinanpaq, Diospa ñawpaqenpi yuyarisqa karqan.
[20] Hinaqtinmi, llapan islakunaqa ayqekurqanku. Hinallataq orqokunapas, manaña kapurqankuñachu.
[21] Hanaq pachamantataqmi, yaqapas huk talentota hina llasaq sinchi hatun chikchi runakunaman chayamurqan. Chay chikchi plagaqa sinchi hatunpunin karqan. Chayraykun, chay chikchi plagahawa runakunaqa Diosta k'arakta k'amirqanku.