[1] Chaykuna qhepatataqmi, hanaq pachapi ancha askha runakunaq ancha kunkayoqtapuni, rimasqankuta hina uyarirqani. Nirqankutaqmi: ‘¡Aleluya! Qespichiypas, hatunchaypas, yupaychaypas, atiypas, Señor Diosnillanchispapunin kanku.
[2] Chaninchayninkunapas cheqaqllapuni, hinallataq chanillanpunin kanku. Diosqa, sinchi qhellipi puriq warmitapas chanincharqanmi. Chay warmiqa, hallp'a pachantinpi runakunatan qhellipi puriyninwan waqllichirqan. Makinwantaqmi, Diospa kamachinkunatapas wañuchirqan. Hinan Diosqa, kamachinkunaq yawarninmanta bengakurqan,’ nispanku.
[3] Hinan iskay kutinpipas nillarqankutaq: ‘¡Aleluya! Chay llaqtaq q'oshñiynintaqmi, wiñaymanta wiñaykama lloqsimushan,’ nispanku.
[4] Iskay chunka tawayoq umalliq kurak runakunataqmi, tawantin kawsashaqkunapiwan pampakama k'umuykukuspanku, kamachikuq tiyananpi tiyashaq Diosta yupaycharqanku. Nirqankutaq: ‘¡Ahinapuni kachun! ¡Aleluya!’ nispanku.
[5] Hinaqtinmi, chay kamachikuq tiyanamanta huk kunkata uyarirqani. Nimurqantaq: ‘Llapallan kamachinkuna, hinallataq payta manchakuqninkuna, hatunkunapas, huch'uykunapas, Diosninchista yupaychaychis,’ nispa.
[6] Hinan, ancha askha runakunaq kunkayoqta rimasqanta hina uyarirqani. Chay kunkaqa, askha unuq phaqchaynin hinaraq, hinallataq sinchi pacha t'oqyaykunaq kunununuynin hinaraqmi karqan. Nimurqantaqmi: ‘¡Aleluya! ¡Tukuy atiyniyoq Señor Diosninchismi kamachikushan!
[7] Q'ochukusunchis, kusikusunchis, hinallataq Diosninchisman yupaychayta qosunchis. Korderoq kasarakuyninmi chayaramunña. Paywan kasarakunanpaq kashaq warmipas, wakichikunñan,’ nispa.
[8] Kasarakunanpaq kashaq warmimantaqmi, llimphuy, k'ancharishaq, ancha balorniyoq lino telamanta p'achawan p'achakunanpaq qosqa karqan. Chay ancha balorniyoq lino telaqa, t'aqasqakunaq allin ruwayninkunan kanku.
[9] Angeltaqmi niwarqan: ‘Kayta qelqay: “Korderoq kasarakuy senanman waqyasqa kaqkunaqa, kusisamiyoqmi kanku,” nispayki,’ nispa. Chaymantapas nillawarqantaqmi: ‘Chay simikunaqa, Diospa cheqaq siminkunan kanku,’ nispa.
[10] Hinan ñoqaqa, yupaychanaypaq angelpa chakinpa kasqan pampapi pampakama k'umuykukurqani. Paytaqmi ichaqa, niwarqan: ‘¡Qhawariy, amapuni chaytaqa ruwaychu! Ñoqaqa kamachimasillayki, hinallataq Jesusmanta willakuyniyoq kaq wawqe-panaykikunaq kamachimasillanmi kani. Profetisay sonqoyoq kayqa, Jesusmanta willakuymi. Chayrayku, ¡Diosllatapuni yupaychayqa!’ nispa.
[11] Hinan, hanaq pachata kicharayashaqta rikurqani. Chayllamanmi, huk yuraq kaballoqa chaypi kasharqan. Chay kaballopi sillakuqnintaqmi, Hunt'aq, hinallataq Cheqaq sutiyasqa karqan. Payqa, chanin kaywanmi chaninchan, hinallataq awqa tinkuytapas ruwan.
[12] Ñawinkunaqa, yawrashaq nina hinan karqan. Umanpitaqmi, askha qorimanta koronakuna kasharqan. Paypitaqmi, huk suti qelqasqa kasharqan. Chay sutitaqa, manan pipas yacharqanchu. Aswanpas pay sapallanmi yacharqan.
[13] Hinallataqmi yawarman challpusqa p'achakunawan p'acharusqa kasharqan. DIOSPA SIMIN nisqa sutiwan sutichasqataqmi karqan.
[14] Hanaq pachapi kashaq ejersitokunataqmi, yuraq kaballopikama payta qatikusharqanku. Paykunaqa, llimphuy, yuraq, ancha balorniyoq lino telamanta p'achawan p'acharusqakaman kasharqanku.
[15] Suyukunata k'irinanpaqtaqmi, huk afilasqa espada siminmanta lloqsimusharqan. Hinan payqa, fierro barawan kamachikunqa. (Sal. 2:9) Paymi, Tukuy Atiyniyoq Diospa phiñakuynin, hinallataq k'arak phiñakuynin ubas saruna t'oqopi sarunqa.
[16] P'achanpiwan, chakanpiwan imataqmi huk suti qelqasqa kasharqan. Nirqantaq: REYKUNAQ REYNIN, HINALLATAQ SEÑORKUNAQ SEÑORNIN, nispa.
[17] Hinallataqmi, huk angelta intipi sayashaqta rikurqani. Paymi, hanaq pacha chawpipi phalashaq llapan phalaq animalkunata, ancha kunkayoqtapuni waqyakurqan. Nirqantaq: ‘¡Diospa hatun mikhuna fiestanman hamuychis, hinallataq huñukamuychis!
[18] Reykunaq, tribunokunaq, atiyniyoqkunaq, kaballokunaq, hinallataq kaballopi sillakuqkunaq aychankunatapas mikhunaykichispaq hamuychis. Llapan mana kamachi kaqkunaqtapas, kamachi kaqkunaqtapas, hatunkunaqña kaqtinpas, otaq huch'uykunaqña kaqtinpas, paykunaq aychanta mikhunaykichispaq hamuychis,’ nispa.
[19] Hinan wak'a animalta, hinallataq hallp'a pachapi reykunata ejersitontinta huñuykusqata rikurqani. Paykunaqa, kaballopi sillaykusqa kashaqpa kontranpiwan, ejersitonpa kontranpiwan ima awqa tinkuyta ruwanankupaqmi huñuykusqa kasharqanku.
[20] Chay wak'a animaltaqmi, paypa ñawpaqenpi señalkunata ruwaq falso profetapiwan kuska, hap'isqa karqanku. Chay falso profetaqa, señalkuna ruwasqanwanmi, wak'a animalpa markanta chaskiqkunata, hinallataq rikch'ayninta yupaychaqkunatapas q'otusqa karqan. Hinaqtinmi, wak'a animalqa, falso profetapiwan kuska, asufriwan yawrashaq nina qochaman kawsashaqkama wikch'uykusqa karqanku.
[21] Wakinkunataqmi llapallanku, kaballopi sillaykusqa kashaqpa siminmanta lloqsimuq espadawan wañuchisqa karqanku. Llapan phalaq animalkunataqmi, wañusqakunaq aychanwan anchatapuni saksaykurqanku.