[1] Hinaqtinmi, qanchis p'ukukunata hap'iq, qanchis angelkunamanta huknin hamuspa, ñoqawan rimarqan. Niwarqantaq: ―Kayman hamuy, hinaspa askha unu patapi tiyashaq sinchi qhellipi puriq warmiq huchachasqa kasqanta rikuchisayki.
[2] Paywanmi, hallp'a pachantinpi reykunaqa, qhelli puriypi purirqanku. Hinallataq hallp'a pachantinpi tiyaq runakunapas, qhellipi puriynin binowan macharqanku, nispa.
[3] Hinaqtinmi angelqa, ch'inniqman Espiritupi pusawarqan. Hinan huk yawar-puka wak'a animalpi sillaykusqa kashaq huk warmita rikurqani. Chay wak'a animalqa, Diosta k'arakta k'amiq sutikunawan hunt'aykusqan kasharqan. Hinallataq, qanchis umakunayoq, chunka waqrakunayoq iman karqan.
[4] Chay warmiqa, sani-puka, hinallataq yawar-puka p'achawan p'acharusqan kasharqan. Hinallataqmi, qoriwan, umiña rumikunawan, hinallataq perlakunawan achalarusqa kasharqan. Makinpitaqmi, qorimanta qerota hap'isharqan. Chay qeroqa, millakuykunawan, hinallataq millay qhellipi puriykunawan hunt'aykusqan kasharqan.
[5] Mat'inpitaqmi huk pakasqa yachayniyoq suti qelqasqa kasharqan. Nirqantaq: HALLP'A PACHANTINPI MILLAKUYKUNAQ, HINALLATAQ QHELLIPI PURIQ WARMIKUNAQ MAMAN HATUN BABILONIA, nispa.
[6] Hinan warmita, t'aqasqakunaq yawarninwan, hinallataq Jesusrayku wañuqkunaq yawarninwan machashaqta rikurqani. Rikuruspaytaqmi, may hatun utirayaywan utirayasqa qhepakurqani.
[7] Hinan angelqa niwarqan: ‘¿Imanaqtintaq utirayasqari kashanki? Ñoqan, chay warmimantawan, q'epiqnin qanchis umakunayoq, hinallataq chunka waqrakunayoq wak'a animalmantawan pakasqa yachayta sut'inchasayki.
[8] Rikusqayki wak'a animalqa, karqanmi, kunantaq manaña kanñachu. Wañuy ñak'ariyninman rinanpaqmi, chinkay-chinkay ukhu pachamanta lloqsimunanpaqña kashan. Chay wak'a animalqa, karqanmi, kunantaq mana kanñachu, qhepamantaqmi ichaqa, kanqa. Hallp'a pachantinpi tiyaq runakuna payta rikuruspankutaqmi, muspharinqaku. Chay runakunaq sutinkun, kay pachaq qallariyninmantapacha kawsay libropiqa manapuni qelqasqachu kashan.
[9] Yachayniyoq kaq yuyayqa, kaypin kashan. Chay qanchis umakunaqa, qanchis orqokunan kanku. Chay orqokuna patapitaqmi, chay warmiqa tiyashan.
[10] Hinallataqmi chay qanchis umakunaqa, qanchis reykuna kanku. Paykunamanta phisqa reykunaqa urmaykapunkuñan. Huk kaqmi, kunan kashanña. Huk kaqtaqmi, manaraq hamunraqchu. Hamuqtintaqmi ichaqa, huk pisi tiempollapaq qhepakunanpuni kashan.
[11] Chay wak'a animalqa karqanmi, kunantaq mana kanñachu. Pusaq kaq reyqa payllataqmi. Payqa, qanchisnintin reykunamanta hukninmi. Hinan wañuy ñak'ariyman rishan.
[12] Chay rikusqayki chunkantin waqrakunataqmi, qhapaq suyuta manaraq chaskiq chunka reykuna kanku. Ichaqa, wak'a animalwan kuskan, huk orallapaq, rey hina kamachikuyniyoq kayta chaskinqaku.
[13] Paykunaqa ch'ulla yuyaykuyllayoqmi kanku. Hinan atiyninkutapas, kamachikuyniyoq kayninkutapas, wak'a animalman hap'iykachipunqaku.
[14] Hinan paykunaqa, Korderoq kontranpi awqa tinkuyta ruwanqaku. Korderoqa, señorkunaq Señorninpuni, hinallataq reykunaq Reyninpunin. Chaymi Korderoqa, paykunata atipanqa. Paywan kashaqkunataqmi waqyasqakuna, akllasqakuna, hinallataq hunt'aqkuna kanku,’ nispa.
[15] Angelqa nillawarqantaqmi: ‘Rikusqayki qhellipi puriq warmiq tiyashasqan chay unuqa, llaqtakuna, ancha askha runakuna, suyukuna, hinallataq wak simi rimaypi rimaqkunan kanku.
[16] Rikusqayki wak'a animalpa chunka waqrankunaqa, qhellipi puriq warmitan cheqnikunqaku. Paytaqa llapallan kaqninkunata ch'utispankun, q'alallata saqepunqaku. Aychantataqmi mikhupunqaku, puchuqnintataq ninawan kanaykunqaku.
[17] Diostaqmi, paypa munayninta ruwanankupaq, ch'ulla yuyaylla kanankupaq, hinallataq Diospa simin hunt'akunankama qhapaq suyunkuta wak'a animalman hap'iykachinankupaq paykunaq sonqonkuman churarqan.
[18] Chay rikusqayki warmiqa, hatun llaqtan. Payqa, hallp'a pachantinpi reykunaq kamachiqninmi,’ nispa.