[1] Chaymantataqmi angelqa, kawsachiq unu, kristal hina k'ancharishaq llimphuy mayuta rikuchiwarqan. Chay mayuqa Diospa, hinallataq Korderoq kamachikuq tiyanankumantan lloqsimusharqan.
[2] Llaqtapi hatun kalleq chawpinpi, mayuq iskay lado kantunkunapi imataq, kawsay mallki kasharqan. Chay mallkiqa, sapa killa ruruspan, chunka iskayniyoq kutita watapi rururqan. Rap'inkunataqmi, suyukunaq hampikunankupaq karqan.
[3] Manataqmi chaypiqa ñakaypas kanqañachu. Aswanpas Diospa, hinallataq Korderoq kamachikuq tiyananmi chay llaqtapi kashanqa. Hinan kamachinkunaqa payta yupaychanqaku.
[4] Hinallataq uyantapas rikunqaku. Sutintaqmi mat'inkupi kashanqa.
[5] Señor Diosmi paykunata k'anchaykunqa. Hinan wiñaypa-wiñayninpaq kamachikunqaku. Chayraykun, chay llaqtapiqa, manaña tutaqa kanqañachu. Nitaqmi lámparaq k'anchaynintapas, nillataq intiq k'anchaynintapas nesesitanqakuñachu.
[6] Chaymantapas angelqa nillawarqantaqmi: ‘Kay simikunaqa, hunt'aqpuni, cheqaqpunitaqmi kanpas,’ nispa. Diospa rantinpi rimaqkunaq espiritunkuq Señor Diosnintaqmi, usqhaylla imakunachus pasanan kashasqanta kamachinkunaman rikuchinanpaq angelninta kachamurqan.
[7] Korderotaqmi nin: ‘¡Qhawariy, hamushanin! Kay libropi profetisasqa simikunata kasukuqqa kusisamiyoqmi kanqa,’ nispan.
[8] Ñoqa Juanmi, chay imaymanakunata uyariqpas, rikuqpas kani. Uyarispa rikuspaytaqmi, rikuchiwaqniy angelpa chakin pampaman payta hatunchanaypaq qonqoriykukurqani.
[9] Angeltaqmi ichaqa, niwarqan: ‘¡Qhawariy, amapuni qonqorikuwaychu! Ñoqaqa, qanpapas, Diospa rantinpi rimaq wawqeykikunaqpas, kay libropi kashaq simikunata kasukuqkunaqpas kamachimasillanmi kani. ¡Diosllatapuni hatunchay!’ nispan.
[10] Nillawarqantaqmi: ‘Tiempoqa qayllaykamushanñan. Chayrayku, kay libropi profetisasqa simikunataqa ama selloyraqchu,’ nispa.
[11] Korderotaqmi nin: ‘Mana chanin kaqta ruwaqqa, hinalla mana chanin kaqta ruwashachun. Hinallataq qhelli kawsaypi kawsaqpas, hinalla qhelli kawsaypi kawsashachun. Chanin kaqta ruwaqtaq ichaqa, chanin kaqllatapuni ruwashachun. Ch'uya kaqpas, aswantaraq ch'uyanchakushachun.
[12] Qhawariy, premioyta aparikuspaymi, usqhaylla hamushani. Hinan sapanka hukmanpas, maychus ruwasqankuman hina, chay premiota qosaq.
[13] Ñoqan Alfapas, Omegapas, ñawpaq kaqpas, qhepa kaqpas, qallariypas, p'uchukaypas kani,’ nispa.
[14] Kawsay mallkimanta mikhuyta atinankupaqwan, chay llaqtaman hatun punkunkunata haykuy atinankupaqwan, p'achankuta t'aqsakuqkunaqa kusisamiyoqmi.
[15] Ichaqa alqokunapas, layqakunapas, qhellipi puriqkunapas, runata wañuchiqkunapas, idolota yupaychaqkunapas, hinallataq llapan llullakuyllatapuni munaqkunapas, llullakuqkunapas, hawapin qhepakunqaku.
[16] Korderoqa nimullawarqantaqmi: ‘Ñoqa Jesusmi iñiq t'aqakunaman chay imaymanakunamanta willanasunkichispaq angelniyta kachamurqani. Ñoqan Davidpa saphinpas, mirayninpas, k'anchashaq pacha illariy ch'askapas kani,’ nispa.
[17] Espiritupiwan, kasarakuq warmipiwanmi ninku: ‘¡Hamullayña!’ nispanku. Pipas uyariqqa, nichun: ‘¡Hamullayña!’ nispa. Hinallataq pipas ch'akichikuqqa, hamuchun. Pipas munaqqa, kawsachiq unumanta yanqallan ukyachun.
[18] Pikunachus kay libropi profetisasqa simikunata uyariqkunamanmi ñoqaqa allin-allintapuni willani: ‘Sichus pipas kay simikunaman yapanqa chayqa, kay libropi qelqasqa kashaq plagakunatan Diosqa payman yapanqa.
[19] Sitaqchus pipas kay libropi profetisasqa simikunamanta qechunqa chayqa, Diosmi kawsay libromanta tupaqnintawan, ch'uya llaqtaman haykuynintawan, kay libropi imakunachus qelqasqa kasqanmantawan ima qechupunqa,’ nispay.
[20] Chay imaymanakunamanta willakuqmi nin: ‘Arí, usqhayllamanmi hamushani,’ nispan. Chay hinaqa, ¡ahinapuni kachun! Arí, Señor Jesús, hamullayña.
[21] Señorninchis Jesucristoq allinpaq qokuynin llapallaykichiswanpuni kachun. Ahinapuni kachun.