[1] Chay hinaqa, qanchisnintin sellosqakunamanta ñawpaq kaqninta, Korderoq kicharisqantan rikurqani. Hinan tawantin kawsashaqkunamanta hukninqa, pacha t'oqyay kunkawanraq waqyakushaqta uyarirqani. Nirqantaq: ‘¡Hamuy, hinaspa qhawaykuy!’ nispan.
[2] Chayllaman qhawaykuqtiytaqmi, chaypi huk yuraq kaballo kashasqa. Chay kaballopi sillakuqtaqmi, arkoyoq kasharqan. Hinan payman huk korona qosqa karqan. Hinaspan llallispa llallinanpaq lloqsimurqan.
[3] Iskay kaq sellosqata kichariqtintaqmi, iskay kaq kawsashaqpa nisqanta uyarirqani. Nirqantaq: ‘¡Hamuy, hinaspa qhawaykuy!’ nispan.
[4] Hinan huk kaq sansaq puka kaballopas lloqsimullarqantaq. Chay kaballopi sillakuqmantaq hallp'a pachamanta thak kayta qechunanpaq atiy qosqa karqan. Hinallataq runakuna hukkuna-hukkunawan wañuchinakuyta hatarichinanpaq payman atiy qosqa karqan. Hinallataqmi huk hatun espadapas qosqa kallarqantaq.
[5] Kinsa kaq sellosqata kichariqtintaqmi, kinsa kaq kawsashaqpa nisqanta uyarirqani. Nirqantaq: ‘¡Hamuy, hinaspa qhawaykuy!’ nispan. Chayllaman qhawaykuqtiytaqmi, huk yana kaballopas kashallasqataq. Chay kaballopi sillakuqtaqmi, huk balansata makinpi hap'isharqan.
[6] Hinallataqmi tawantin kawsashaqkunaq chawpinkupi huk kunkata uyarirqani. Nirqantaqmi: ‘Huk medida trigoqa huk denario qolqepaqmi. Hinallataq, kinsa medida sebadapas huk denario qolqellapaqtaqmi. Aseititawan, binotawanmi ichaqa, ama imanankipaschu,’ nispan.
[7] Tawa kaq sellosqata kichariqtintaqmi, tawa kaq kawsashaqpa kunkanta uyarirqani. Nirqantaq: ‘¡Hamuy, hinaspa qhawaykuy!’ nispan.
[8] Chayllaman qhawaykuqtiytaqmi, chaypi huk q'elloq'omer kaballo kasharqan. Chay kaballopi sillakuqtaqmi, Wañuy nispa sutiyasqa karqan. Hadestaqmi payta qatikusharqan. Paymanmi, hallp'a pachamanta tawa kaq partinta, espadawan, yarqaywan, wañuywan, hinallataq teqsimuyuntinpi phiña animalkunawan wañuchinanpaq kamachikuyniyoq kay qosqa karqan.
[9] Phisqa kaq sellosqata kichariqtintaqmi, altarpa pachanpi wañuchisqa kaqkunaq almankuta rikurqani. Paykunaqa, Diospa siminrayku, hinallataq Korderomanta willakusqankuraykun wañuchisqa karqanku.
[10] Hinan ancha kunkayoqtapuni waqyakuspa nirqanku: ‘Ch'uya, hinallataq cheqaq Señorniyku, ¿hayk'aqkaman hallp'a pachantinpi tiyaq runakunata yawarniykumanta mana chaninchankichu, nitaq bengakunkipaschu?’ nispanku.
[11] Sapanka hukmantaq, pampakama yuraq p'acha qosqa karqan. Hinan huk pisi tiempollatawanraq samaykunankupaq paykunaman nisqa karqan. Hinallataq, kamachimasinkupas, wawqepanankupas paykuna hina usqhayllaman wuñuchisqa kaqkunaq yupaynin hunt'akunankama, samaykuyqa paykunaman nisqa karqan.
[12] Soqta kaq sellosqata kicharisqanta qhawaykuqtiytaqmi, chayllaman huk ancha hatun pacha chhaphchikuy karqan. Intipas luto p'acha hinan yanaman tukupurqan. Killataqmi yawarman hina pukayapurqan.
[13] Sinchi wayra igos sach'ata chhaphchiriqtinmi, mana poqosqa igoskunaqa t'akarikunku. Chay hinataraqmi ch'askakunapas, hanaq pachamanta hallp'a pachaman urmaykamurqanku.
[14] Imaynan huk qelqa k'uyu k'uyuykukun, chay hinataraqmi hanaq pachapas t'aqarikapurqan. Hinallataq llapan orqokunapas, islakunapas maypichus kashasqankumanta suchurichisqa karqanku.
[15] Hinallataq hallp'a pachapi reykunapas, allinpaq qhawarisqakunapas, qhapaqkunapas, tribunokunapas, atiyniyoqkunapas, llapan kamachi kaqkunapas, hinallataq llapan mana kamachi kaqkunapas mach'aykunapi, qaqa-qaqa orqo k'aktukunapi ima pakakurqanku.
[16] Orqokunatawan, qaqakunatawantaqmi nirqanku: ¡Ñoqayku pataman urmaykamuwayku, hinaspa kamachikuq tiyanapi tiyashaqpa uyanmanta, hinallataq Korderoq k'arak phiñakuyninmanta pakaykuwayku!
[17] Paypa k'arak phiñakuynin hatun p'unchaymi chayamun. Chay hinaqa, ¿pitaq chakimanta sayaytaqa atinman? nispanku.