[1] Ñawpa hanaq pachapas, ñawpa hallp'a pachapas manañan kapurqanñachu. Mama-qochapas manañan kapurqanñachu. Chayraykun huk mosoq hanaq pachatawan, huk mosoq hallp'a pachatawan rikurqani.
[2] Ñoqa Juantaqmi, mosoq Jerusalén ch'uya llaqtata, Diospa kasqan hanaq pachamanta uraykamushaqta rikurqani. Chay llaqtaqa, qosanwan kasarakunanpaq wakichisqa sumaq p'acharusqa sipas hinan, uraykamusharqan.
[3] Hinan hanaq pachamanta huk kunkayoqtapuni uyarirqani. Nimurqantaqmi: ‘Qhawariychis, Diospaq ruwasqa paypa karpanqa runakunawanñan kashan. Hinaqa Diosmi runakunawan tiyanqa. Paykunataqmi Diospa llaqtan kanqaku. Kikin Diostaqmi, paykunawan kashanqa, hinan Diosninkupuni kanqa.
[4] Diostaqmi paykunaq ñawinkumanta llapan weqeta pichanqa. Hinan ñawpaq kaq imakunachus kaqkunaqa, manañan kapurqanñachu. Chayrayku manaña wañuypas, nitaq waqapakuypas, nitaq waqaypas, nillataq nanaypas kanqañachu,’ nispa.
[5] Kamachikuq tiyanapi tiyashaqtaqmi nimurqan: ‘Qhawariy, llapan imakunatapas ñoqaqa mosoqyachishanin,’ nispan. Hinan ñoqata nimuwarqan: ‘Kay simikunaqa hunt'aqpuni, cheqaqpunitaqmi. Chayrayku qelqaypuni,’ nispa.
[6] Nimullawarqantaqmi: ‘¡Ruwasqañan kashan! Ñoqan Alfapas, Omegapas, hinallataq qallariypas, p'uchukaypas kani. Pipas ch'akichikuqmanqa, kawsachiq unu pukyumantan yanqallanmanta ukyachisaq.
[7] Pipas atipaqqa tukuy imaymanakunatan chaskinqa. Ñoqan paypa Diosnin kasaq. Paytaqmi ñoqaq waway kanqa.
[8] Ichaqa manchalikunaq, mana iñiqkunaq, millakuy kawsaqkunaq, runa wañuchiqkunaq, qhellipi puriqkunaq, layqakunaq, idolota yupaychaqkunaq, hinallataq llapan llullakunaqpas, asufriyoq yawrashaq nina qochan tupaqninku kanqa. Chay nina qochaqa, iskay kaq wañuymi,’ nispa.
[9] P'uchukay qanchis plagakunawan hunt'aykusqa kashaq qanchis p'ukukunata hap'ishaq qanchisnintin angelkunamanta huknintaqmi hamurqan. Hinan ñoqawan rimarqan. Niwarqantaq: ‘Kayman hamuy, hinaspa Korderoq kasarakunanpaq wakichisqa kashaq esposanta rikuchisayki,’ nispan.
[10] Espiritupitaqmi, huk hatun alto orqo pataman pusawarqan. Hinan Diospa kasqan hanaq pachamanta uraykamushaq ch'uya Jerusalén hatun llaqtata rikuchiwarqan.
[11] Chay hatun llaqtaqa, Diospa hatun k'anchariyninwan k'anchaykusqan kasqa. Hinallataqmi lliphllikiyninpas ancha-anchallaña balorniyoq kaq haspe qespi rumi hinapuni kasqa.
[12] Hatun alto perqayoqmi kasqa. Hinallataq chunka iskayniyoq hatun punkukunayoq kallasqataq. Chay hatun punkukunapitaqmi, chunka iskayniyoq angelkuna kasharqan. Hinan chay punkukunapiqa, Israelpa wawankunaq, chunka iskayniyoq aylluntinpa sutinkupas qelqasqa kasharqan.
[13] Kinsa hatun punkukunaqa, inti lloqsimuy lado qhawaqmi kasqa. Kinsa hatun punkukunataq, wichay lado qhawaq, kinsa hatun punkukunañataq, uray lado qhawaq, hinallataq kinsa hatun punkukunapas, inti haykuy lado qhawaq kasqa.
[14] Hatun llaqtaq perqanqa chunka iskayniyoq teqsikunayoqmi kasqa. Chay teqsikunapitaqmi, Korderoq chunka iskayniyoq apostolninkunaq chunka iskayniyoq sutinku kasqa.
[15] Ñoqawan rimashaqpa tupuna soqosnintaqmi qorimanta karqan. Chay tupunaqa llaqtata, hatun punkunkunatawan, perqantawan tupunapaqmi karqan.
[16] Hinan chay llaqtaqa, tawantin ladomanpas sayaypura kasqa. Wask'anmanpas, kinrayninmanpas sayaypuran kasqa. Chay angeltaqmi, tupuna soqoswan tupurqan. Hinan chunka iskayniyoq waranqa estadiokuna hina kasqa. Wask'anmanpas, kinrayninmanpas, sayayninmanpas sayaypuran kasqa.
[17] Llaqtaq perqanta tupuqtintaqmi, pachak tawachunkan tawayoq maki khukuchu karqan. Chay angelpa tupusqanqa, runaq tupunan tupuyllawantaqmi karqan.
[18] Chay llaqtaq perqantaqmi, haspe rumimanta ruwasqa karqan. Hatun llaqtataqmi ch'uyay-ch'uyayllaña qespi hinaraq, ch'uya qorimanta karqan.
[19] Hinallataq, chay llaqtaq perqanpa teqsinkunaqa, lliw ancha balorniyoq rumikunawan sumaqchasqan kashasqa. Ñawpaq kaq teqsiqa jaspe rumikunawan, iskay kaqtaq safiro rumikunawan, kinsa kaqtaq ágata rumikunawan, tawa kaqtaq esmeralda rumikunawan sumaqchasqa kasqa.
[20] Phisqa kaq teqsitaq, ónise rumikunawan, soqta kaqtaq kornalina rumikunawan, qanchis kaqtaq krisólito rumikunawan, pusaq kaqtaq berilo rumikunawan, isqon kaqtaq topasio rumikunawan, chunka kaqtaq krisopraso rumikunawan, chunka hukniyoq kaqtaq jasinto rumikunawan, chunka iskayniyoq kaqtaq amatista rumikunawan sumaqchasqa kasqa.
[21] Chay llaqtaq chunka iskayniyoq hatun punkunkunaqa, chunka iskayniyoq perlakunan kasqaku. Sapanka hatun punkutaqmi huk perlallamanta ruwasqa kasqa. Hatun kallentaqmi ichaqa, rikukuqlla qespi hina ch'uyanchasqa qorimanta kasqa.
[22] Chay llaqtapi, Dios yupaychana wasitaqa manañan rikurqaniñachu. Aswanpas, yupaychana wasiqa, Tukuy Atiyniyoq Señor Diospiwan, Korderopiwanmi kasqaku.
[23] Diospa k'anchariy- ninmi, chay llaqtataqa k'anchaykun. Korderollañataqmi, chay llaqtaq lamparanpas kasqa. Chayrayku, chay llaqtapiqa, manañan intiq k'anchaynintapas, nitaq killaq k'anchaynintapas nesesitakuñachu.
[24] Chay k'anchaypitaqmi qespisqa suyukunaqa purinqaku. Hinallataqmi hallp'a pachapi reykunapas yupaychayninkutapas, hinallataq hatunchayninkutapas chay llaqtaman apamunqaku.
[25] Chay llaqtapiqa, manan tutapas kanqañachu. Chaymi hatun punkunkunapas p'unchayqa mana hayk'aqpas wisq'asqañachu kanqa.
[26] Hinan suyukunaq yupaychayninkupas, hatunchayninkupas chay llaqtaman apasqa kanqa.
[27] Manapunin ima qhellichaqpas, millakuy kawsaqpas, llullakunapas chay llaqtamanqa haykunqakuchu. Aswanpas Korderoq kawsay libronpi qelqasqakunallan haykunqaku.