[1] Hanaq pachapitaqmi, huk hatun señal rikhurimurqan. Hinan huk warmi, intiwan p'achasqa kasharqan. Chakinpa pachanpitaq, killapas kasharqan. Umanpitaqmi, chunka iskayniyoq ch'askakunamanta huk korona kasharqan.
[2] Wiksallisqa kaspantaqmi, wachakuy nanaywan qaparisharqan. Hinallataqmi wachakunan patapiña kashaspa, sinchitapuni ñak'arisharqan.
[3] Hinan wak señal hanaq pachapi rikhurimurqan. Qhawariy, huk hatun yawar-puka dragonmi, qanchis umakunayoq, hinallataq chunka waqrakunayoq kasharqan. Dragonpa qanchisnintin umankunataqmi, qorimanta pilluyoqkama kasharqan.
[4] Chupantaqmi, hanaq pachapi ch'askakunamanta kinsa kaq partinta aysarikuspa, hallp'a pachaman wikch'uykamurqan. Hinan Dragonqa wachakunan patapiña kashaq warmiq ñawpaqenpi sayaykurqan. Warmi wachakuqtin hina, wawanta mikhurapunanpaqmi sayaykurqan.
[5] Hinan chay warmiqa, huk qhari wawata wachakurqan. Imaynan qelqasqa kashan: ‘Llapa suyukunatan fierro barawan michinqa,’ nispa, (Sal. 2:9) chayman hinataqmi, chay wachakusqan wawaqa Diosman, hinallataq kamachikuq tiyananman hoqarisqa karqan.
[6] Warmitaqmi, maypichus Diospa wakichipusqan ch'inniq cheqasman ayqekurqan. Waranqa iskay pachak soqta chunka p'unchay mikhuchisqa kananpaqmi, Diosqa chay cheqasta wakichipurqan.
[7] Hinaqtinmi, hanaq pachapi huk awqa tinkuy qallarirqan. Miguelmi, angelninkunantin dragonpa kontranpi maqanaku- sharqan. Dragonpas angelninkunantin, Miguelpa kontranpi maqanakushallarqantaq.
[8] Chay dragontaqmi ichaqa, mana churapakuyta atirqanchu. Manataqmi paypaqpas, angelninkunapaqpas hanaq pachapi kampoqa tarikurqanñachu.
[9] Hinan hatun dragonqa hanaq pachamanta wikch'uykamusqa karqan. Ñawpa mach'aqwayqa paymi. Saqra hinallataq Satanasmi paypa sutinqa. Teqsimuyuntinta q'otuqqa payllataqmi. Payqa hallp'a pachaman wikch'uykamusqan karqan. Hinallataq angelninkunapas, paywan kuska wikch'uykamusqan kallarqankutaq.
[10] Hinan huk alto kunkata hanaq pachapi uyarirqani. Chay kunkaqa nimurqanmi: ‘Diosninchispa ñawpaqenpi wawqe-pananchiskunata tuta-p'unchay yanqanmanta huchachaqqa wikch'uykapusqañan kapun. Chayraykun, Diosninchispa qespichiynin, atiynin, qhapaq suyun, hinallataq Cristonpa kamachikuyniyoq kayninpas kunan chayamun.
[11] Wawqe-pananchiskunaqa, Korderoq yawarninpa chawpinta, hinallataq willakusqanku simikunaq chawpintan atiparqanku. Paykunaqa, wañunankukamaraqmi kikinkuq kawsayninkutapas pisicharqanku.
[12] Chayrayku, hanaq pachakuna, hinallataq chaypi tiyaqkunapas kusikuychis. Saqraqa, pisi tiempollaña paypaq kashasqanta yachasqanraykun, sinchi k'arak phiñakuywanraq uraykamun. Chayrayku, ¡ay! hallp'a pachapi tiyaqkunamantapas, mama-qochapi kawsaqkunamantapas, ¡imaynaraq kanqa!’ nispa.
[13] Dragonqa, hallp'a pachaman wikch'uykusqaña kasqanta rikukuspantaqmi, qhari wawata wachakuq warmita qatiykacharqan.
[14] Warmimantaqmi huk hatun ankaq iskay raphrankunata, mach'aqwaypa qayllanmanta ch'inniqman phalananpaq qosqa karqan. Hinan chay ch'inniq cheqaspi, huk tiempota, tiempokunata, hinallataq kuskan tiempotawan mikhuchisqa karqan.
[15] Mach'aqwaytaqmi, warmiq qhepanman siminmanta mayuta hinaraq unuta aqtumurqan. Chay mayuwantaqmi, warmita apachiyta munarqan.
[16] Hallp'a pachataqmi, warmita yanaparqan. Hinan hallp'a pachaqa, siminta kicharispan, dragonpa siminmanta aqtumusqan mayuta millp'urapurqan.
[17] Hinaqtinmi dragonqa, warmiq kontranpi sinchi k'arakta phiñakurqan. Hinan warmiq wakin mirayninkunaq kontranpi, awqa tinkuyta ruwamunanpaq ripurqan. Paykunaqa, Diospa kamachikuynin waqaychaqkuna, hinallataq Jesucristoq willakuynin willakuyniyoqmi kanku.