Дәрк'әтьн 8
[1] Хӧдан готә Муса: «Һәр'ә щәм Фьрәwьн у бежә wи: ‹Хӧдан аһа дьбежә: Щьмә'та мьн бәр'дә кӧ хӧламтийа мьн бькә.
[2] Ле һәгәр тӧ нәхwәзи бәр'ди, ва йә әзе пе бәqа т'әмамийа т'опрахед тә хьм.
[3] Ч'әме бәqава бьк'ьмк'ьмә у әwе р'абьн бьк'әвьнә мала тә, ода тәйә р'азане, ньвина тә, малед хӧламед тә, нава щьмә'та тә, тәндуред тә у шкәва тәйә һәвир.
[4] У бәqе р'абьнә ль сәр тә, ль сәр щьмә'та тә у ль сәр һ'әму хӧламед тә›».
[5] Һьнге Хӧдан готә Муса: «Бежә Һарун: ‹Дәсте хwә шьвдарева дьрежи ль сәр ч'әма, щәwа у гола кә у ль сәр wәлате Мьсьре, бәqа дәрхә›».
[6] У Һарун дәсте хwә дьрежи ль сәр авед Мьсьре кьр. Бәq дәрк'әтьн у wәлате Мьсьре ньхамтьн.
[7] Сербаза жи бь сербазийа хwә ӧса кьрьн у ль сәр wәлате Мьсьре бәq дәрхьстьн.
[8] Фьрәwьн гази Муса у Һарун кьр у гот: «Р'әща жь Хӧдан бькьн, кӧ бәqа жь мьн у жь щьмә'та мьн дур хә у әзе щьмә'те бәр'дьм кӧ Хӧданр'а qӧрбане бьдьн».
[9] Һьнге Муса готә Фьрәwьн: «Тӧ хwәха мьнр'а wә'дә к'ьфш кә, әз к'әнге бона тә, бона хӧламед тә у бона щьмә'та тә р'әща бькьм, кӧ бәq жь тә у жь малед тә ӧнда бьн, т'әне әwе ч'емда бьминьн».
[10] У әwи гот: «Сьбе». Муса гот: «Бьра wәкә готьна тә бә! Кӧ тӧ бьзаньби, йәки мина Хӧдан Хwәдейе мә т'ӧнә.
[11] Бәqе жь тә, жь малед тә, жь хӧламед тә у жь щьмә'та тә wе дур к'әвьн, т'әне ч'емда wе бьминьн».
[12] Муса у Һарун жь щәм Фьрәwьн дәрк'әтьн у Муса бона wан бәqа, к'ижан кӧ Хӧдан анибунә сәр Фьрәwьн гази Хӧдан кьр.
[13] Хӧдан wәкә готьна Муса кьр, у бәqед малада, һ'әwшада у к'әwшәнада һ'ьшк бун.
[14] Әw к'ом-к'ом т'оп кьрьн у бин к'әтә wәлет.
[15] Ле гава Фьрәwьн дина хwә дайе кӧ р'ьһ'әти к'әте, дьле хwә кьрә кәвьр у гӧр'а wан нәкьр, чаwа кӧ Хӧдан готьбу.
[16] Һьнге Хӧдан готә Муса: «Бежә Һарун: ‹Бьра шьвдара хwә дьреж кә т'оза ә'рде хә, кӧ әw ль сәр т'әмамийа wәлате Мьсьре бьбә к'әрмеш›».
[17] У ӧса кьрьн. Һарун дәсте хwә шьвдара хwәва дьреж кьр, т'оза ә'рде хьст у к'әрмеш ль сәр мәрьва у һ'әйwен р'абун. Ль сәр т'әмамийа wәлате Мьсьре һ'әму т'оза ә'рде бу к'әрмеш.
[18] Сербаза жи бь сербазийед хwә кьрьн кӧ к'әрмеша дәрхьн, ле нькарьбун. У аwа ль сәр мәрьва у һ'әйwен к'әрмеш бун.
[19] Сербаза готә Фьрәwьн: «Әва т'ьлийа Хwәде йә». Ле дьле Фьрәwьн бу кәвьр у гӧр'а wан нәкьр, чаwа кӧ Хӧдан готьбу.
[20] Хӧдан готә Муса: «Сәре сьбәһе зу р'абә һәр'ә ль бәр Фьрәwьн бьсәкьнә. Ва йә әwе бәрбь аве һәр'ә у бежә wи: ‹Хӧдан аһа дьбежә: Щьмә'та мьн бәр'дә кӧ хӧламтийа мьн бькә.
[21] Ле һәгәр тӧ щьмә'та мьн бәр'нәди, аwа әзе ль сәр тә, ль сәр хӧламед тә, ль сәр щьмә'та тә у ль сәр малед тә п'әр'анийа меш-моза бьшиньм у малед мьсьрийа бь п'әр'анийа меш-мозава wе т'ьжи бьн, ӧса жи сәр wи ә'рде кӧ әw дьминьн.
[22] Ле wе р'оже т'опраха Гошәнейә к'ӧ щьмә'та мьн ле дьминә, әзе башqә кьм у wе дәре п'әр'анийа меш-моза wе т'ӧнә бә, кӧ тӧ бьзаньби wәлетда әз Хӧдан ьм.
[23] У әзе ль нав щьмә'та хwә у щьмә'та тәда фьрqийе дайньм. Сьбе әв нишане бьqәwьмә›».
[24] Хӧдан ӧса жи кьр. П'әр'анийа меш-мозайә мәзьн һатә ль сәр мала Фьрәwьн, малед хӧламед wи у ль сәр т'әмамийа wәлате Мьсьре, жь дәст п'әр'анийа меш-моза wәлат wеран бу.
[25] Фьрәwьн гази Муса у Һарун кьр, гот: «Һәр'ьн ви wәлатида Хwәдейе хwәр'а qӧрбане бьдьн».
[26] Ле Муса готе: «Нә щайиз ә кӧ әм ве йәке бькьн, чьмки әw qӧрбана кӧ әме Хӧдан Хwәдейе хwәр'а бьдьн, әв йәк мьсьрийар'а һ'әрами йә. Һәгәр әм бь wе qӧрбандайина кӧ бона мьсьрийа һ'әрам ә, р'абьн ль бәр ч'ә'ве wан бьдьн, гәло әwе мә нәдьнә ль бәр кәвьра?
[27] Әме р'ийа се р'ожа һәр'ьнә бәр'ийе у Хӧдан Хwәде хwәр'а qӧрбане бьдьн, чаwа кӧ әw мәр'а бежә».
[28] У Фьрәwьн гот: «Әзе wә бәр'дьм кӧ һун һәр'ьнә бәр'ийе Хӧдан Хwәдейе хwәр'а qӧрбане бьдьн, ле т'әне дур нәчьн. Бона мьн р'әща бькьн».
[29] Муса готе: «Ва йә әзе жь щәм тә дәрк'әвьм у р'әща жь Хӧдан бькьм, кӧ сьбе п'әр'анийа меш-моза жь Фьрәwьн, жь хӧламед wи у жь щьмә'та wи дур к'әвә, ле т'әне бьра Фьрәwьн иди щьмә'те нәхапинә у нәгьрә кӧ qӧрбане бьдьнә Хӧдан».
[30] Муса жь щәм Фьрәwьн дәрк'әт у р'әща жь Хӧдан кьр.
[31] Хӧдан wәкә готьна Муса кьр. П'әр'анийа меш-моза жь Фьрәwьн, жь хӧламед wи у жь щьмә'та wи дур хьст, qәт йәк жи нәма.
[32] Фьрәwьн ве щаре жи дьле хwә кьрә кәвьр у щьмә'т бәр'нәда.