<Дәрк'әтьн 2

[1] Мәрьвәки жь мала Леwи, чу qизәкә леwийа хwәр'а хwәст.

[2] Әw жьн һ'әмлә дәрк'әт кӧр'әк ани, әwе дина хwә дайе кӧ әw бәдәw бу, се мәһа әw вәшарт.

[3] Ле гава әwе иди нькарьбу әw вәшарта, һьнге сәпәтәкә жь щур'әки qамиша һьлда, әw хиж у qир кьр, әw кӧр'ьк кьре у дани нав qамишед дәве Ниле.

[4] Хушка зар'оке дур сәкьни, wәки бьзаньбә к'а wе чь бьqәwьмә сәре wи.

[5] У qиза Фьрәwьн бәрбь Ниле чу кӧ аве хwә кә, щарийед wе жи дәве ч'ем дьгәр'ийан. Әwе сәпәтәк нав qамишада дит у щарийа хwә шанд чу әw ани.

[6] Гава вәкьр кӧр'ьк дит. Кӧр'ьк дьгьрийа, дьле wе сәр шәwьти у гот: «Әва жь зар'ед ибранийа йә».

[7] Һьнге хушка wе зар'е готә qиза Фьрәwьн: «Дьхwази әз һәр'ьм бона тә гази к'ӧлфәтәкә ибранийайә бәрдәргуш кьм, кӧ бе бона тә бьстен бьдә әве зар'е?»

[8] Qиза Фьрәwьн готә wе: «Һәр'ә». Qизьке жи чу гази дийа зар'оке кьр.

[9] Qиза Фьрәwьн готә wе к'ӧлфәте: «Һане ви кӧр'и мьнр'а хwәй кә, әзе һәqе тә бьдьм». К'ӧлфәте әw кӧр'ьк һьлда у хwәй кьр.

[10] Гава кӧр'ьк мәзьн бу, әwе ани да qиза Фьрәwьн, әwе жи әw хwәр'а кьрә кӧр' у наве wи дани Муса , гот: «Чьмки мьн әw жь аве дәрхьст».

[11] Еп'ещә wәхт дәрбаз бу, гава Муса мәзьн бу , р'абу чу щәм бьратийа хwә, әwи дина хwә да шьхӧлед wани гьран, дит wе йәки мьсьри бьраки wийи ибрани дьк'ӧтә,

[12] дор хwә ньһер'и, дина хwә дайе кӧ кәс т'ӧнә, лехьст йе мьсьри кӧшт у qумеда вәшарт.

[13] Р'ожа дьне р'абу чу, дина хwә дайе wе дӧ мәрьвед ибрани һәвр'а шәр' дькьн, һьнге готә йе нәһәq: «Чьма тӧ ль һәвале хwә дьхи?»

[14] Әwи жи ле вәгәр'анд: «К'е тӧ сәр мә сәрwер у һ'акьм к'ьфш кьри? Дьбә кӧ дьхwази мьн жи бькӧжи чаwа тә йе мьсьри кӧшт?» Муса тьрсийа у гот: «Р'аст әв тьшта дәрк'әтийә».

[15] Фьрәwьн әв тьшт бьһист, хwәст кӧ Муса бькӧжә, ле Муса жь бәр Фьрәwьн р'әви чу wәлате Мьдйанеда ма, ль сәр бирәке р'уньшт.

[16] Һ'әфт qизед т'әреqе Мьдйане һәбун. Әвана һатьн ав к'ьшандьн, к'ӧр'н т'ьжи кьрьн кӧ пәзе баве хwә авдьн.

[17] Шьвана һат бәри wан дан. Һьнге Муса р'абу пьшта wан гьрт у пәзе wан авда.

[18] Әвана чунә щәм баве хwә Р'ьһуел , әwи пьрси: «Әв чаwа бу кӧ һун иро ӧса зу һатьн?»

[19] Wана гот: «Мәрьвәки мьсьри әм жь дәсте шьвана хьлаз кьрьн, ав жи бона мә к'ьшанд у пәзе мә авда».

[20] Һьнге әwи готә qизед хwә: «Ле әw к'ане йә? Wә чьма әw мәри ӧса бәр'да? Гази wи кьн бьра бе нан бьхwә».

[21] Ль Муса хwәш һат кӧ щәм wи мәрьви бьминә у әwи qиза хwә Сиппораһ да Муса.

[22] Әwа һ'әмлә дәрк'әт, кӧр'әк ани у Муса наве wи дани Гершом , чьмки гот: «Әз wәлате хәлqеда к'әтьмә хәрибийе».

[23] Пәй гәләк wәхтр'а п'адше Мьсьре мьр. Зар'ед Исраел жь дәст хӧламтийе кьрьнә зарин. У әw һәwар-газийа wанә жь дәст хӧламтийе гьһиштә Хwәде.

[24] Хwәде һеwәрза wан бьһист у Хwәде әw пәймана хwә бир ани, йа кӧ т'әви Бьраһим, Исһаq у Аqуб гьредабу.

[25] Хwәде дина хwә да зар'ед Исраел у һ'але wан пе һ'әсийа.