[1] Т'әмамийа щьвина зар'ед Исраел жь Елиме р'ек'әтьн, һатьнә бәр'ийа Сине, кӧ ль навбәра Елиме у Синайеда йә, панздәһе мәһа дӧда бу кӧ жь wәлате Мьсьре дәрк'әтьбун.
[2] Т'әмамийа щьвина зар'ед Исраел бәр'ийеда, һьндава Муса у Һарунда бина хwә тәнг кьрьн.
[3] Зар'ед Исраел готьнә wан: «Хwәзи әм бь дәсте Хӧдан ль wәлате Мьсьреда бьмьрана, гава әм бәр ситьле гошт р'удьньштьн у мә т'ер нан дьхwар, wә әм дәрхьстьнә ве бәр'ийе кӧ т'әмамийа щьвине бьр'чийа бькӧжьн».
[4] Һьнге Хӧдан готә Муса: «Ва йә әзе wәр'а жь ә'змен нан бьбариньм, бьра щьмә'т һәр р'ож дәрк'әвә, чьqас лазьмә т'ера wе р'оже бәрәв кә, wәки wан бьщер'ьбиньм к'а әwе анәгори т'әмийа мьн бькьн йан на.
[5] У р'ожа шәша чь кӧ биньн бьра һазьр кьн, әw сәр т'опкьрьна һәр р'ожир'а дӧбарә бә».
[6] Муса у Һарун готьнә һ'әму зар'ед Исраел: «Ве еваре һуне бьзаньбьн кӧ Хӧдан һун жь wәлате Мьсьре дәрхьстьнә.
[7] Сәре сьбәһе һуне р'умәта Хӧдан бьбиньн, чьмки әwи бьһист әw бинтәнгийа wәйә һьндава Хӧданда. Әм к'и нә кӧ һун һьндава мәда бинтәнгийе дькьн?»
[8] Муса гот: «Хӧдане еваре бона хwарьне гошт бьдә wә у сәре сьбәһе жи нан бьдә һ'әта кӧ һун т'ер бьхwьн, чьмки Хӧдан бьһист әw бинтәнгийа wә. Әм к'и нә? Һун бина хwә ль мә тәнг накьн ле ль Хӧдан».
[9] Муса готә Һарун: «Бежә т'әмамийа щьвина зар'ед Исраел: ‹Ль бәр Хӧдан бьсәкьньн, чьмки әwи бинтәнгийа wә бьһист›».
[10] Гава Һарун т'әмамийа щьвина зар'ед Исраелр'а хәбәр дьда, wана дина хwә да бәр'ийе, ва йә р'умәта Хӧдан ль нав ә'wрда һатә хане.
[11] Хӧдан т'әв Муса хәбәр да у готе:
[12] «Мьн бинтәнгийа зар'ед Исраел бьһист. Т'әви wан хәбәр дә у бежә wан: ‹Бәре еваре һуне гошт бьхwьн у сәре сьбәһе жи һуне бь нан т'ер бьн, һьнге һуне бьзаньбьн кӧ әз Хӧдан Хwәдейе wә мә›».
[13] Ӧса qәwьми кӧ еваре qар'итк фьр'ин һатьн у зомә ньхамтьн, сәре сьбәһе дор-бәре зоме qьр'авийе дани.
[14] Гава әw qьр'авийа дани һьлат, ва йә сәр р'уйе бәр'ийе тьштәки мина капәке һур, гьловәр', мина qьше ль сәр ә'рде һәбу.
[15] Гава зар'ед Исраел дитьн, готьнә һәв: «Әв чь йә?» Чьмки ньзаньбун әw чь йә. Муса готә wан: «Әв әw нан ә кӧ Хӧдан бона хwарьна wә да.
[16] Т'әмийа Хӧдан әв ә: ‹Бьра һәр кәси wә qаси хwарьна хwә жь wи бәрәв кә. Сәре һәр нәфәреft омерәки бәрәв кә, wәкә һ'әсабе wан нәфса, чьqас кӧ коне һәр кәсида һәнә›».
[17] Зар'ед Исраел ӧса жи кьрьн. Бәрәв кьрьн һьнәка гәләк, һьнәка һьндьк.
[18] У гава чап кьрьн , к'е гәләк т'оп кьр, зедә нәбу у к'е һьндьк т'оп кьр, кем нәбу. Һәр йәки qаси хwарьна хwә бәрәв кьр.
[19] Муса готә wан: «Бьра т'ӧ кәс жь wи һ'әта сәре сьбәһе нәһелә».
[20] Wана гӧр'а Муса нәкьр, жь wан һьнәка һ'әта сәре сьбәһе жь wи һьштьн. Бин к'әте у кӧрми бу. Муса сәр wан һерс к'әт.
[21] Һәр сәре сьбәһе, һәр йәки т'ера хwарьна хwә жь wи бәрәв дькьр у чахе гәрмайийа тә'ве дьдайе әw дьһ'әлийа.
[22] Ле р'ожа шәша әw нан дӧбарә бәрәв кьрьн, аwа готи сәре һәр йәки дӧft омер . Һ'әму сәрwеред щьвине һатьн гиһандьнә Муса
[23] у wи готә wан: «Әв готьна Хӧдан ә: ‹Сьбе р'ожа р'ьһ'әтийе йә, шәмийа Хӧданә пироз ә, чь кӧ һуне бьпежьн, бьпежьн у чь кӧ һуне бьк'әлиньн, бьк'әлиньн у һәр чь кӧ зедә бә, бьһельн бона р'ожа дьн›».
[24] Әwе зедә буйи һ'әта сәре сьбәһе һьштьн, чаwа кӧ Муса готьбу, нә бин к'әте, нә жи кӧрми бу.
[25] Муса гот: «Иро wи бьхwьн, чьмки иро р'ожа р'ьһ'әтийейә бона Хӧдан ә, һуне иро жь wи чоледа нәбиньн.
[26] Һуне шәш р'ожа жь wи бәрәв кьн, ле р'ожа һ'әфта кӧ шәми йә, wе т'ӧнә бә».
[27] У ӧса qәwьми кӧ р'ожа һ'әфта жь щьмә'те һьнәк дәрк'әтьн кӧ бәрәв кьн, ле нәдитьн.
[28] Һьнге Хӧдан готә Муса: «Һ'әта к'әнге һуне нәхwазьн т'әми у һинкьрьнед мьн хwәй кьн?
[29] Бьньһер'ьн, Хӧдан шәми да wә, ләма р'ожа шәша нане дӧ р'ожа дьдә wә, бьра һәр кәс щийе хwәда бьминә, р'ожа һ'әфта, т'ӧ кәс жь щийе хwә нәләqә».
[30] Щьмә'т р'ожа һ'әфта р'ьһ'әт бу.
[31] Мала Исраел наве wи данин мана , әw мина жь к'ома т'охьме мехьке, сьпи у тә'ма wе мина к'ате пе һьнгьв бу.
[32] Муса гот: «Әв т'әмийа Хӧдан ә: ‹Жь wи омерәки дагьрьн кӧ нава ньсьлед wәда бе хwәйкьрьне, wәки әwана wи нани бьбиньн к'ижан кӧ мьн һун бәр'ийеда данә хwарьне, гава мьн һун жь wәлате Мьсьре дәрхьстьн›».
[33] Муса готә Һарун: «Щер'әки һьлдәft омер ә манә т'ьжи кә у дайнә ль бәр Хӧдан, бона кӧ нав ньсьлед wәда бе хwәйикьрьне».
[34] Чаwа Хӧдан т'әми да Муса, Һарун ӧса әw дани ль бәр Шә'дәтийе кӧ бе хwәйикьрьне.
[35] Зар'ед Исраел чьл сали мана хwарьн, һ'әта кӧ гьһиштьнә wәлате шен. Мана хwарьн һ'әта кӧ гьһиштьнә синоре wәлате Кәнане.