<Дәрк'әтьн 5

[1] Пәй һаqас тьштр'а Муса у Һарун чунә щәм Фьрәwьн у готьне: «Хӧдан Хwәдейе Исраел аһа дьбежә: ‹Изьна щьмә'та мьн бьдә кӧ бәр'ийеда мьнр'а щәжьне бькьн›».

[2] Фьрәwьн гот: «Хӧдан к'и йә кӧ әз гӧр'а готьна wи бькьм у изьна Исраел бьдьм? Әз Хӧдан нас накьм у изьна Исраел жи надьм».

[3] Wана готе: «Хwәдейе ибранийа мәва хӧйа бу. Изьна тә һәбә әм р'ийа се р'ожа һәр'ьнә бәр'ийе у Хӧдан Хwәдейе хwәр'а qӧрбане бьдьн, кӧ нәбә әw бь нәхwәшийа һ'ал йан шур qьр'а мә бинә».

[4] П'адше Мьсьре готә wан: «Муса у Һарун, һун чьма щьмә'те жь хәбата wан паш дехьн? Һәр'ьнә сәр борще хwә».

[5] Фьрәwьн гот: «Ва йә ньһа щьмә'та wәлет гәләк ә, ле һун наһельн кӧ әw борще хwә бьqәдиньн».

[6] Һәма wе р'оже Фьрәwьн кьрә сәр сәрwер у сәрк'аред щьмә'те, гот:

[7] «Мина һәр гав бона к'әлпич' чекьрьне кайе нәдьнә щьмә'те, бьра әwана хwәха һәр'ьн у хwәр'а кайе т'оп кьн.

[8] Һ'әсабе к'әлпич'а жь сәр wан кем нәкьн, һаqаси жи жь wан бьхwазьн, чьqас wан һәр гав чедькьрьн, чьмки әwә хwәр'анәдити нә, ләма дькьнә qар'ин у дьбежьн: ‹Әм һәр'ьн qӧрбане Хwәдейе хwәр'а бьдьн›.

[9] Бьра шьхӧл ль сәр ван мәрьва гьран бә, кӧ хәбатева гиро бьн у пәй готьнед дәрәw нәк'әвьн».

[10] Сәрwер у сәрк'аред щьмә'те дәрк'әтьн щьмә'тер'а хәбәрдан у готьн: «Фьрәwьн аһа дьбежә: ‹Әз кайе надьмә wә,

[11] һун хwәха һәр'ьн жь к'ӧ дьхwазьн хwәр'а кайе дәстхьн, ле жь шьхӧлед wә тьштәк же кем нәбә›».

[12] Һьнге щьмә'т ль т'әмамийа wәлате Мьсьре бәла бу, дәwса кайе хозан т'оп кьр.

[13] Сәрwера п'ейи ль сәр wан дькьрьн дьготьн: «Хәбата хwәйә һәр р'ож ӧса бьqәдиньн, чаwа һьнге кӧ кайа wә һәбу».

[14] К'аркәред Фьрәwьн сәрк'аред сәр зар'ед Исраел к'ьфшкьри к'ӧтан у готьн: «Wә чьма дӧһӧ у иро һ'әсабе к'әлпич'а мина һәр гав т'әмам нәкьрийә?»

[15] Сәрк'аред зар'ед Исраел һатьнә щәм Фьрәwьн газьне хwә кьрьн у готьне: «Тӧ чьма ӧса сәре хӧламед хwә дьки?

[16] Кайе надьнә хӧламед тә, ле мәр'а дьбежьн: ‹К'әлпич'а чекьн!› Ва йә әм һатьнә к'ӧтане, ле нәһәqи алийе щьмә'та тәда йә».

[17] Ле әwи гот: «Һун хwәр'анәдити нә! Хwәр'анәдити! Ләма дьбежьн: ‹Әм һәр'ьн Хӧданр'а qӧрбане бьдьн›.

[18] Дә ньһа һәр'ьн у бьхәбьтьн, кайе wәр'а нәйе дайине, ле һ'әсабе к'әлпич'а wе жь wә бе хwәстьне».

[19] Һьнге сәрк'аред зар'ед Исраел хwә охьрме гьранда дитьн гава һатә готьне: «Һ'әсабе к'әлпич'айә кӧ һәр р'ож жь wә те хwәстьне кем нәкьн».

[20] Гава әw жь щәм Фьрәwьн дәрк'әтьн, р'асти Муса у Һарун һатьн кӧ әw һивийа wан бун

[21] у готьнә wан: «Бьра Хwәде сәр wәда бьньһер'ә у диwана wә бькә, wәки wә әм бәр ч'ә'ве Фьрәwьн у хӧламед wи р'әш кьрьн у шур жи да дәсте wан кӧ мә бькӧжьн».

[22] Һьнге Муса вәгәр'ийа щәм Хӧдан у гот: «Йа Хwәйе мьн! Тә чьма әв щьмә'та авитә нава охьрмед гьран? Тә бона чь әз шандьм?

[23] Чьмки wе һьнгева, гава әз һатьмә щәм Фьрәwьн у пе наве тә хәбәр дайә, әw хьрабийе ве щьмә'те дькә, ле бәле тә щьмә'та хwә хьлаз нәкьр».